باسقارما سايتىندا وسى جەرگىلىكتى ماڭىزى بار جولداردىڭ 1159,2 كيلومەترى, ياعني 23%-ى عانا اسفالتتالعانى كورسەتىلگەن. 2150,9 كم (42%) جولعا قيىرشىقتاس توسەلگەن. ال 1793,6 كم جول(35%) – شاڭى شىققان كادىمگى قارا جول.
جوعارىدا ايتىلعان سانداردى تۇسىنىكتى تىلگە اۋدارساق, وبلىستىق جانە اۋداندىق مارتەبەدەگى اۆتوجولداردىڭ ىشىندە جاقسى جانە قاناعاتتانارلىق دەڭگەيدەگى بولىگى – 1429,04 كم (28%). ال 72%-ى, ياعني 3674,67 كم جول قاناعاتتانارلىقسىز جاعدايدا. بۇل – رەسمي مالىمەت.
سوڭعى جىلدارى وڭىردەگى اۆتوكولىك جولدارىنىڭ جوندەلۋى ارتقانى راس. 2019 جىلى «نۇرلى جول» باعدارلاماسى بويىنشا وبلىسقا 34,7 ملرد تەڭگە بولىنگەن, سول ارقىلى جىل سوڭىنا دەيىن وڭىردەگى قاناعاتتانارلىق جول مولشەرىن 31%-عا جەتكىزۋ جوسپارلانعان.
بەسجىلدىق جوسپار
– ءوڭىردىڭ وزەكتى ماسەلەلەر وندىعىندا – جول ماسەلەسى ءبىرىنشى ورىندا ەكەنى ءسوزسىز! بۇل – وبلىس اكىمى عالي ەسقاليەۆتىڭ ءسوزى.
اكىمنىڭ ايتۋىنشا, سوڭعى ءۇش جىلدا وبلىس بويىنشا 1200 كم جول جوندەلگەن. وتكەن جىلدىڭ وزىندە 34 ملرد تەڭگە يگەرىلىپ, 452 كم جول جوندەلدى. جاقسى جانە قاناعاتتانارلىق كۇيدەگى جولدار ۇلەسى 26%-دان 28,7%-عا ارتتى. 2019 جىلى 500 كم جول جوندەۋ جوسپارلانىپ, 30 ملرد تەڭگەدەن استام قارجى بولىنگەن.
– تۇڭعىش پرەزيدەنت – ەلباسى ن.ءا.نازارباەۆتىڭ تاپسىرماسىنا سايكەس ءۇش اۋدان ورتالىعىن وبلىسپەن قوسۋ جۇمىستارى باستالىپ تا كەتتى. بۇل تۋرالى مەملەكەت باسشىسى ق.توقاەۆ تا وڭىردە بولعان جۇمىس ساپارى كەزىندە اتاپ وتكەن بولاتىن. بۇل باعىتتا كونكۋرستىق جۇمىستار اياقتالىپ, جانىبەك – سايحىن تاس جولىنىڭ قۇرىلىسى باستالادى. سونداي-اق ورىنبور وبلىسىنا دەيىنگى 150 كم جولدى باستايمىز, – دەيدى ءوڭىر باسشىسى.
وڭىردە قۇرىلىس جانە جول قۇرىلىسى بويىنشا بەسجىلدىق جوسپار قابىلداندى. اسىرەسە اۋدانداردى ءوزارا جالعايتىن جولداردى جوندەۋ باستالدى. مىسالى, اقجايىق جانە بايتەرەك اۋداندارىن قوساتىن «ۆەچنىي – بولشوي چاگان – پەرەمەتنوە» جولى جانە قازتالوۆ پەن تاسقالا اۋداندارىن جاقىنداتا تۇسەتىن «تاسقالا – اققۋراي – بولاشاق» (97 كم) جولى سالىنۋدا. سونداي-اق شىڭعىرلاۋ مەن قاراتوبە اۋداندارىن قوساتىن «شىڭعىرلاۋ – لۋبەنكا – لەبەدەۆكا» جولى جانە ءبورلى مەن سىرىم اۋداندارىن قوساتىن جول قۇرىلىسى جۇرۋدە. بۇل جۇمىستار جول ۋاقىتىن قىسقارتىپ, ەلدى مەكەن حالقىنا كاسىبىن دامىتۋعا مۇمكىندىك بەرەدى.
جايىقتىڭ بۇقار بەتى جول كۇتەدى
ءوڭىردى جايىق وزەنى قاق جارىپ اعادى. وزەندى جاعالاي ورنالاسقان ەلدى مەكەندەر ءۇشىن جايىق – ءبىر جاعىنان تىرشىلىك تىرەگى, سۋ كوزى بولسا, ەكىنشى جاعىنان ۇلكەن كەدەرگى. ويتكەنى وبلىستا ورال قالاسىنان تومەن قاراي اتىراۋ وبلىسىنىڭ يندەر كەنتىنە دەيىن بىردە-ءبىر كوپىر جوق. بۇل – 325 شاقىرىم جەر. سوندىقتان وزەننىڭ سول جاعىندا, بۇقار بەتتە ورنالاسقان سارىتوعاي, بازارشولان, بازارتوبە, قاراۋىلتوبە, ەسەنساي, كونەككەتكەن, قۇرايلىساي, شاعاتاي, اقسوعىم سەكىلدى ءىرى اۋىلدىق وكرۋگتەردىڭ حالقى وبلىس ورتالىعىمەن قاتىساتىن 300 شاقىرىم جولدىڭ ازابىن ءجيى كورەدى.
ولار پايدالاناتىن «بارباستاۋ – اقجايىق – يندەر» اۆتوجولى كەڭەس كەزىنەن بەرى اسفالت جابىندىسىن كورمەگەن. جول جوقتىعىنىڭ كەسىرىنەن كۇز, قىس جانە كوكتەم ايلارىندا لايساڭ كەزدە كەيبىر اۋىلدارعا جول قاتىناسى مۇلدەم توقتاپ قالادى. بۇل جونىندە «Egemen Qazaqstan» گازەتىنىڭ 18 شىلدە كۇنگى سانىندا ءبىرجان كارىم ۇلى ەسىمدى وقىرمانىمىزدىڭ «20 مىڭعا جۋىق ادامنىڭ ازابى – جول» اتتى ماقالاسى جارىق كورگەن بولاتىن.
وڭىردە ءتۇرلى دارەجەدەگى جولداردى جوندەۋ تۋرالى جوسپار ءجيى قوزعالعانىمەن, جايىقتىڭ سول جاعالاۋىمەن جۇرەتىن ەجەلگى كۇرە جولدىڭ جوندەلۋى كەشەۋىلدەپ تۇر. جوعارىدا ايتىلعان باسقارما سايتىندا: «بارباستاۋ – اقجايىق – يندەر» اۆتوجولىنىڭ 43-93 كم تەلىمىن قايتا جاڭعىرتۋ بويىنشا «جوبالىق-سمەتالىق قۇجاتتامالارىن جاساقتاۋ جوسپارلانۋدا» دەگەن اقپارات تۇر. ياعني, جوبالاۋدىڭ ءوزى جوبادا تۇر.
جايىق وزەنىنىڭ سول جاعىن جاعالاي جۇرەتىن, وبلىستىڭ اقجايىق ەلدى مەكەنى مەن اتىراۋ وبلىسىنىڭ يندەر كەنتىن جالعايتىن گرەيدەردى اسفالتتاۋ – وڭىرلىك دارەجەدە وتە ماڭىزدى ماسەلەنىڭ ءبىرى. وسى جولدىڭ ناشارلىعى كوپتەگەن الەۋمەتتىك قيىندىققا باستاۋ بولدى. بازارشولان اۋىلىندا تۇراتىن ۇستاز توقجان مۇقانوۆا «جول مəسەلەسى شەشىمىن تاپسا, حالىقتىڭ تۇراقتانۋىنا سەبەپ بولار ەدى. جاستار اۋىلعا كەلۋىن ازايتتى. اۋىل حالقى قارتايىپ بارا جاتىر» دەپ دابىل قاعىپ وتىر. بۇل – كوپتىڭ تىلەگى.
باتىس قازاقستان وبلىسى
