تۇركسوي باس حاتشىسى دۇيسەن قاسەيىنوۆتىڭ باسشىلىعىمەن وتكەن شاراعا تۇرىكمەنستاننىڭ تۇركياداعى ەلشىسى يشانقۋلي امانليەۆ, انكارا قاجى بايرام ۆەلي ۋنيۆەرسيتەتىنىڭ پروفەسسورى, دوكتور چەتين پەكادجار, رەسەي فەدەراتسياسى داعىستان رەسپۋبليكاسىنىڭ ءبىلىم بەرۋدى دامىتۋ ينستيتۋتىنان اقىن, دوكتور مياسات ءمۇسليموۆا, «تاڭشولپان» جۋرنالىنىڭ باس رەداكتورى اقىن سۋپيانات ماماەۆا, تۇركسوي باس حاتشىسىنىڭ ورىنباسارى بيلال چاكىدجى, تۇرىك ءتىلى ورتالىعىنىڭ باسشىسى پروفەسسور گۇرەر گۇلسەۆين, اتاتۇرىك اتىنداعى زەرتتەۋ ورتالىعىنىڭ جەتەكشىسى, پروفەسسور الي بەيحان, انكاراداعى ديپلوماتيالىق كورپۋس, ونەر جانە ادەبيەت قاۋىمداستىعىنىڭ وكىلدەرى, اقىن-جازۋشىلار مەن باسقا دا شاقىرىلعان قوناقتار قاتىستى.
جيىن تۇركسوي تۋرالى دەرەكتى فيلم مەن بادرۋتدين ماگومەدوۆتىڭ «ۇزىلگەن ۇزەڭگى» اتتى كىتابى تۋرالى دەرەكتى ءفيلمنىڭ كورسەتىلىمىمەن باستالدى.
جيىن العىسوزىندە دۇيسەن قاسەيىنوۆ تۇركى الەمىندە جاقسى تانىلعان قۇمىق اقىنى مەن زەرتتەۋشىسى ب.ماگومەدوۆتىڭ تۇركى الەمىنە ورتاق ادەبيەت پەن بىلىمىنە ۇلكەن ميراس قالدىرعانىن ايتتى.
كىتاپتى تۇرىك تىلىنە اۋدارعان پروفەسسور چەتين پەكادجار كىتاپتىڭ باستى تاقىرىبى بولعان ماجارستان تۇركولوگى كوڭىردىڭ ءوزىنىڭ ءتۇپ تامىرىن تابۋ وقيعاسى مەن اتا-بابالارىنىڭ ىزىمەن جۇرگەنى, داعىستانداعى كەزدەسۋلەرى مەن زەرتتەۋلەرى تۋرالى قىسقاشا ايتىپ بەردى.
شاراعا شاقىرىلعان بادرۋتدين ماگومەدوۆتىڭ قىزى ايدا ماگومەدوۆا كىتاپتىڭ تۇرىك تىلىنە اۋدارىلۋىنا اتسالىسقان ادامدارعا العىسىن ءبىلدىرىپ, ريزا ەكەنىن ايتتى.
كىتاپتا الەمگە ايگىلى ماجارستان تۇركولوگى ىشتۆان ماندوكي كوڭىر مەن قۇمىق ادەبيەتىنىڭ جارىق جۇلدىزى بادرۋتدين ماگومەدوۆتىڭ دوستىعى تۋرالى دا جازىلعان. سونىمەن بىرگە كوڭىر ماندوكيمەن رەپورتاجدار, جولساپار وچەركتەرى, ماگومەدوۆتىڭ ولەڭدەرى كورىنىس تاپقان.
