كەمەل كەلەشەك كەپىلى
سەيسەنبى, 5 ناۋرىز 2013 7:25
قازاقستان 2050 جىلعا قاراي الەمنىڭ ەڭ دامىعان وتىز ەلىنىڭ قاتارىندا بولۋعا ءتيىس.
پرەزيدەنت ن.ءا. نازارباەۆتىڭ قازاقستان حالقىنا جولداۋىنان
ەلىمىزدىڭ دامىپ, وزگە كەرەگەسى كەڭ ەلدەرمەن تەرەزەسىن تەڭەستىرىپ جاتقانى – ەلباسىمىزدىڭ كورەگەن, سارابدال ساياساتىنىڭ جەمىسى. قازاقتا «وتكەن كۇننەن الىس جوق, كەلەر كۇننەن جاقىن جوق» دەگەن ءسوز بار. بۇل ءسوز تەكتەن-تەك ايتىلماسا كەرەك. ءبىز تاۋەلسىزدىك الىپ, جەكە-دارا مەملەكەت بولعان كەزدە ەل تىزگىنىن قولعا العان ن.نازارباەۆتىڭ ارقاسىندا قازاقستان كەمەلدەنە ءتۇستى.
سەيسەنبى, 5 ناۋرىز 2013 7:25
قازاقستان 2050 جىلعا قاراي الەمنىڭ ەڭ دامىعان وتىز ەلىنىڭ قاتارىندا بولۋعا ءتيىس.
پرەزيدەنت ن.ءا. نازارباەۆتىڭ قازاقستان حالقىنا جولداۋىنان
ەلىمىزدىڭ دامىپ, وزگە كەرەگەسى كەڭ ەلدەرمەن تەرەزەسىن تەڭەستىرىپ جاتقانى – ەلباسىمىزدىڭ كورەگەن, سارابدال ساياساتىنىڭ جەمىسى. قازاقتا «وتكەن كۇننەن الىس جوق, كەلەر كۇننەن جاقىن جوق» دەگەن ءسوز بار. بۇل ءسوز تەكتەن-تەك ايتىلماسا كەرەك. ءبىز تاۋەلسىزدىك الىپ, جەكە-دارا مەملەكەت بولعان كەزدە ەل تىزگىنىن قولعا العان ن.نازارباەۆتىڭ ارقاسىندا قازاقستان كەمەلدەنە ءتۇستى.
ەلباسىنىڭ كوپتىڭ ويىن تىڭداپ, بىرلىككە توقتاپ جاسايتىن جۇمىستارى جالپى جۇرتتىڭ جۇرەگىنە جول تاۋىپ جاتادى. پرەزيدەنتىمىز ءوزىنىڭ «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» اتتى قازاقستان حالقىنا جولداۋىندا ەلىمىزدىڭ بۇدان ءارى قارىشتاپ, ەسەلەپ دامۋىنا جول كورسەتىپ بەردى. 1997 جىلعى «قازاقستان-2030» ستراتەگيالىق باعدارلاماسى جاريالانىپ, ەلىمىز ەل تاريحىندا بۇرىن-سوڭدى بولماعان دامۋدىڭ داڭعىل جولىنا ءتۇستى. شەتەلدىك تىسقاققان ساياساتكەرلەر مەن جاھاندىق ساياساتتانۋشىلار الەمدە ەشبىر مەملەكەت مۇنداي دەڭگەيدە دامىماعانىن ايتادى. مۇنىڭ بارلىعى – ەسەلى ەڭبەككە, قاجىر-قايراتپەن جاسالعان جۇمىسقا بەرىلگەن باعا.
«نۇر وتان» حدپ-نىڭ ءماجىلىستەگى فراكتسياسىنىڭ شەشىمىنە سايكەس دەپۋتاتتار ەلىمىزدىڭ ءوڭىرلەرىنە بارىپ, سايلاۋشىلارمەن كەزدەسۋلەر وتكىزۋى – قالىپتاسقان ءداستۇر. بۇرىنعىداي ءار دەپۋتات ءوزى تۋىپ-وسكەن نەمەسە قىزمەت جاساعان وڭىرىنە بارۋمەن شەكتەلمەي, پارلامەنتتىك فراكتسيا شەشىمىنە سايكەس ەلىمىزدىڭ ءار وڭىرلەرىنە اتباسىن تىرەيدى. ماسەلەن, ءوزىم وڭتۇستىك قازاقستان وبلىسىندا تۋىپ-ءوسىپ, قىزمەت جاساعان ەدىم, بىراق پارتيانىڭ شەشىمىمەن وتكەن جولعى ساپارىمدا قىزىلوردا ءوڭىرىن ارالاعان بولسام, جىلدىڭ باسىندا ەلباسىمىزدىڭ «قازاقستان-2050» ستراتەگياسىن ناسيحاتتاۋ جانە ءتۇسىندىرۋ ماقساتىندا جامبىل وبلىسىنا بارىپ, 18 ەلدى مەكەندە بولدىم. سونىڭ ىشىندە تاراز قالاسىندا, وبلىستىڭ جامبىل, جۋالى, تۇرار رىسقۇلوۆ جانە قورداي اۋداندارىندا بولىپ, تۇرعىندارمەن 22 رەت كەزدەسۋ ءوتتى. ەل اراسىندا جۇرگەندە حالىقتىڭ ەلباسىنا دەگەن ەرەكشە قۇرمەتىن بايقادىم. قاي جەردە بولسا دا مەكتەپ وقۋشىسىنان باستاپ, زەينەتتەگى قارت كىسىلەرگە دەيىن مەملەكەت تاراپىنان ەرەكشە قامقورلىق, قولداۋ كورسەتىلىپ وتىرعانىن ايتتى, ەلباسىنا راحمەتتەرىن جەتكىزىپ, ول كىسىنىڭ امان-ساۋلىعىن تىلەدى.
كەزدەسۋلەردىڭ بىرىندە ءسوز العان قاريا: «مەن قالادا تۇرايىنشى دەپ اۋرە بولمايمىن. قازىر اۋىلداعى ۇيىمدە دە بارلىق جاعدايىم جاسالعان. باياعىدا شەتەلدىڭ كينولارىنان قالادان ءبىر دە كەم تۇسپەيتىن اۋىلدارىن كورىپ, اۋزىمىزدىڭ سۋى قۇريتىن, ءسىرا ءبىزدىڭ ەلىمىز مىناداي جاعدايعا جەتۋ ءۇشىن كەمى ءجۇز, ءجۇز ەلۋ جىل كەرەك بولار دەپ ويلايتىنمىن. كوزدى اشىپ-جۇمعانشا ءجۇز, ءجۇز ەلۋ جىلدا جەتەمىز دەپ جۇرگەن دامىعان ەلدەردەگىدەي اۋىلعا ءبىزدىڭ ەل اينالاسى ون-ون بەس جىلدىڭ ىشىندە جەتتى. سارقىراپ سۋ كەلىپ تۇر, كەلىندەر بۇرىنعىداي وت جاعىپ اۋرە بولمايدى, گاز جاعامىز, ءۇيدىڭ ءىشى جىلى. بۇدان ارتىق جانىڭا نە كەرەك؟ وعان قوسا, اۋىل دۇكەنىنەن تۇرمىسىڭا كەرەكتىنىڭ ءبارىن تاباسىڭ. بۇرىنعىداي قالاعا سابىلمايسىڭ. ءبىر جەرىمىز اۋىرسا, اۋىلدىق امبۋلاتوريادان ەم-دوم الامىز. قورامدا بەس-التى جىلقى, جەتى-سەگىز ءىرى قارا, وتىز شاقتى قويىم بار. جاعدايىمىز ەشكىمنەن كەم ەمەس. حالقىمىز: «تويساڭ, تاۋبە قىل» دەگەن. وسىنداي جاعداي جاساپ بەرگەن ەلباسىنا راحمەت! استاناعا بارعاندا ەلدەن ۇلكەن سالەم ايتىڭىزدار, امان بولسىن!» دەپ ىستىق ىقىلاسىن ءبىلدىردى.
قاريانىڭ سوزىنەن سوڭ, حالىق دۋ قول شاپالاقتاپ تۇرىپ الدى. مىنە, اۋىلدا بولعان كەزدەسۋدە حالىقتىڭ ەلباسىنا دەگەن ىستىق ىقىلاسى وسىنداي زور ەكەن. جولداۋدا نۇرسۇلتان ءابىش ۇلى: «قازاقستان-2030» ستراتەگياسى ءبىزدىڭ مەملەكەتتىلىگىمىزدىڭ قالىپتاسۋ كەزەڭى ءۇشىن جاسالعان بولاتىن. ءوزىنىڭ بازالىق ولشەمى بويىنشا ول ورىندالدى. ءبىزدىڭ باستى ماقساتىمىز – 2050 جىلعا قاراي جالپىعا ورتاق ەڭبەك قوعامىن قۇرۋ. قازاقستان ءححى عاسىردىڭ ورتاسىنا قاراي الەمنىڭ ەڭ دامىعان 30 ەلىنىڭ قاتارىندا بولۋعا ءتيىس», – دەگەن كەزدە قازاقستاننىڭ بولاشاقتا تاعى دا وتە جوعارى قارقىنمەن داميتىنىن سەزىندىك.
سەنىمدى قادامدار جاساي بىلەتىن ەلباسىنىڭ ۇلكەن ەرلىگىنىڭ ءبىرى – استانا قالاسىن سالۋى. قايسىبىر ءىستى باستاۋعا ۇلكەن ەرىك-جىگەر, قاجىر-قايرات كەرەك. سوندا عانا ءىسىڭ وڭدى بولىپ, جۇرت الدىنداعى قاعيداڭ ايقىن, ءجۇزىڭ جارقىن بولادى. وسىنداي قايسار دا پاراساتتى مىنەز بويىڭنان تابىلسا عانا قالا سالاسىڭ. حالىقتىڭ ساناسىن الدىعا جەتەلەيسىڭ. جاڭاشىلدىق ءۇردىستىڭ وتىن جاعاسىڭ. وسىنداي اسىل قاسيەتتەردى ءبىر بويىنا جيناعان ادام عانا الەمدى مويىنداتقان استاناداي قالا سالىپ, حالقىن ءبىر ورتالىققا ۇيىتادى. ال نۇرسۇلتان ءابىش ۇلى سياقتى از عانا ۋاقىتتا استانا سالۋ – كەز كەلگەن ەل باسقارعان ازاماتتىڭ قولىنان كەلە بەرمەيتىن ءىس. مۇنداي ۇلى ءىس – ۇلكەن ازاماتتىق. ال ونى مويىنداماۋ – اعاتتىق. تاريح الدىنداعى قاتەلىك. تاريح دەمەكشى… نۇرسۇلتان ءابىش ۇلى – قازاق ءۇشىن ۇلكەن ءىس تىندىرعان تاريحي تۇلعا. قازاقتا: «ءبىتەر ءىستىڭ باسىنا جاقسى كەلەر قاسىنا» دەيدى. تاۋبە! قازاق تاريحىنا كوز جۇگىرتسەك, نەشەمە ناۋبەت زامانداردان امان قالعانىمىزدى كورەمىز. ءتىپتى حالىق بولىپ جەر بەتىنەن جويىلىپ جەتۋگە شاق قالعان كەزدەرىمىز بولعان. سونشاما زارلى كۇندەردە جاسىماي, وسى ارايلى كۇندەردىڭ كەلەرىنە سەنگەنبىز. سەنىم اقتالدى.
تاۋەلسىزدىك تاڭىمىزداعى تال بەسىگىمىز – ەلوردامىز. ول – ەلباسىنىڭ ءتول تۋىندىسى. وسى تۇستا اۋەزوۆشە ايتار بولساق, «ەل بولامىن دەسەڭ بەسىگىڭدى تۇزە!» مىنە, تاڭىمىز تاۋەلسىز اتقان تۇستا ءبىرقالىپتى ءوزىنىڭ ىرعاعىمەن تەربەلىپ كەلە جاتقان استانا قازاقتىڭ تال بەسىگى. ءبىز – استانا دەگەندە كوز الدىمىزعا نۇرسۇلتان نازارباەۆ, ال نۇرسۇلتان ءابىش ۇلى دەگەندە كوز الدىمىزعا ارمان قالا استانا, تاۋەلسىز قازاقستان, ەزۋلەرىنە كۇلكى ۇيىرىلگەن باقىتتى ادامدار ەلەستەيتىن كۇنگە جەتتىك. استانا ارقاشان قازاقتىڭ ماقتانىشى بولا بەرگەي!
ن.نازارباەۆتىڭ باتىل جوسپارىنىڭ ءبىرى جانە بىرەگەيى «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» اتتى قازاقستان حالقىنا جولداۋى. ەلباسىمىز ءار جىل سايىن قازاقستان حالقىنا جولداۋ ارنايدى. سول تاريحي قۇجاتتاردىڭ نەگىزى بولىپ كەلگەن «قازاقستان-2030» ستراتەگيالىق باعدارلاماسىنىڭ باسىم بولىگى ورىندالدى. سوندىقتان ۇزاق مەرزىمدى كەلەسى باعدارلامانىڭ قاجەتتىلىگى تۋىندادى. ال «قازاقستان-2050» ستراتەگياسى كەمەل كەلەشەكتى كورە ءبىلۋ. ەلىمىزدىڭ جان-جاقتى دامۋىنا ءتۇرلى باعدارلامالار جاسالعانى جانە ونىڭ ماقساتتى تۇردە ورىندالىپ كەلە جاتقانىن حالىقتىڭ ءال-اۋقاتىنىڭ جاقسارعانىنان بايقايمىز. ماسەلەن, ۇدەمەلى يندۋستريالاندىرۋ باعدارلاماسى اياسىندا 2010 جىلدان باستاپ جالپى قۇنى 1 797 ملرد. تەڭگە بولاتىن 397 ينۆەستيتسيالىق جوبا ىسكە اسىرىلىپ, 44 مىڭنان استام جۇمىس ورنى اشىلدى.
تاعى دا ەلدە بولعان كەزدەسۋلەردىڭ ءبىرى ورتا بۋىن وكىلدەرىمەن جانە ستۋدەنتتەرمەن ءوتتى. سوندا بايقاعانىم, پرەزيدەنت جولداۋى, اسىرەسە, جاستارعا ۇلكەن سەرپىلىس بەرگەن ەكەن. ولار ەلدىك ماڭىزى زور جولداۋداعى كوزدەلىپ وتىرعان ەكونوميكالىق, الەۋمەتتىك مەجەلەردى ورىنداۋعا حالىق بولىپ اتسالىسۋ قاجەتتىگى جونىندەگى ويلارىن ورتاعا سالدى. سونداي-اق جاستار ءپاتريوتيزمدى جانە مەملەكەتتىك ءتىلدى دامىتۋ, تاۋەلسىز ەلدىڭ وزىق ويلى ازاماتتارىن قالىپتاستىرۋ تۋرالى وي-پىكىرلەرىمەن ءبولىستى. ءسوز العان ءبىر ستۋدەنت جولداۋدىڭ مىنا ءبىر ءۇزىندىسىن تولعانىسپەن وقىپ بەردى. «قازىردىڭ وزىندە ەلىمىزدەگى وقۋشىلاردىڭ 60 پايىزدان استامى مەملەكەتتىك تىلدە وقيدى. مەملەكەتتىك ءتىل بارلىق مەكتەپتەردە وقىتىلادى. بۇل, ەگەر بالا بيىل مەكتەپكە بارسا, ەندى ون-ون ەكى جىلدان سوڭ جاپپاي قازاقشا بىلەتىن قازاقستاندىقتاردىڭ جاڭا ۇرپاعى قالىپتاسادى دەگەن ءسوز. قازاقستاننىڭ بولاشاعى قازاق تىلىندە. قازاق ءتىلى 2025 جىلعا قاراي ءومىردىڭ بارلىق سالاسىندا ۇستەمدىك ەتىپ, كەز كەلگەن ورتادا كۇندەلىكتى قاتىناس تىلىنە اينالادى. وسىلاي تاۋەلسىزدىگىمىز بۇكىل ۇلتتى ۇيىستىراتىن ەڭ باستى قۇندىلىعىمىز – تۋعان ءتىلىمىزدىڭ مەرەيىن ۇستەم ەتە تۇسەدى. تاۋەلسىزدىگىن العان تۇستا ەلىمىزدەگى قازاقتىڭ سانى 6,8 ميلليون نەمەسە 41% بولسا, قازىر 11 ميلليونعا جەتىپ, 65%-دان استى», دەي كەلە: «قازاقستانداي كەڭ بايتاق ەلىم باردا, بولاشاقتى كورە ءبىلەتىن نۇرسۇلتان ءابىش ۇلىنداي پرەزيدەنتىم باردا مەنىڭ تەرەڭ ءبىلىم يەسى بولماۋىم ازاماتتىعىما سىن. سەبەبى, مەنىڭ جان-جاقتى ءبىلىم الۋىما مەملەكەت بار جاعدايىمدى جاساپ قويعان. شەتەلدىڭ الدىڭعى قاتارلى وقۋ ورنىنا ءتۇسۋ مەن ءۇشىن ۇلكەن ماسەلە ەمەس. ويتكەنى, ەلباسىمىز ارنايى «بولاشاق» باعدارلاماسىن بەكىتتى جانە ول كىسىنىڭ الەمدىك دەڭگەيدەگى ابىرويىنىڭ ارقاسىندا كەز كەلگەن مەملەكەتتە قازاق بولىپ ماقتانىشپەن وقىپ ءبىلىم الۋىما بولادى», دەپ ءسوزىن اياقتادى. وسى ءسوزدى ەستىگەندە ەلباسىمىزدىڭ: «قازاقستاننىڭ بولاشاعى ءبىلىمدى جاستاردا», دەگەن ۇستانىمى ويىما ورالدى. وسى ورايدا, مەملەكەت باسشىسى قازاقستان ءپاتريوتيزمىنىڭ ىرگەتاسى – بارلىق ازاماتتاردىڭ تەڭ قۇقىلىعى جانە ولاردىڭ وتان نامىسى الدىنداعى جالپى جاۋاپكەرشىلىگى ەكەندىگىن اتاپ وتكەنى انىق.
«نۇر وتان» حدپ-نىڭ قوعامدىق قابىلداۋلارىندا جانە جەرگىلىكتى جەرلەردە ازاماتتاردى قابىلداپ, سۇراقتارىنا جاۋاپ بەردىك. پارتيا اكتيۆىمەن, ءماسليحات دەپۋتاتتارىمەن, ەڭبەك ۇجىمدارىمەن جانە تۇرعىندارمەن كەزدەسۋ بارىسىندا كوتەرىلگەن ماسەلەلەر از ەمەس. اتاپ ايتقاندا, ادامنىڭ دەنساۋلىعىنا زيان كەلتىرەتىن ءوندىرىس ورىندارىندا قىزمەت ىستەيتىندەردى الەۋمەتتىك قورعاۋ, قولجەتىمدى تۇرعىن ءۇيدى اۋىلداردا دا سالۋ, جاس ماماندارعا ءۇي بەرۋدىڭ زاڭنامالىق تەتىگىن قاراستىرۋ, جاسوسپىرىمدەر ۇيلەرىنىڭ تۇلەكتەرىن تۇرعىن ۇيمەن قامتاماسىز ەتۋ, جوعارى سىنىپ وقۋشىلارىنا بولاشاق ماماندىق تاڭداۋىندا كاسىبي باعىت-باعدار بەرۋ ماسەلەلەرى قوزعالدى. ءوڭىردىڭ پروبلەمالارىن شەشۋ بويىنشا ۇسىنىستار العا تارتىلدى.
بىزدەر جاڭادان سالىنعان ءبىرقاتار مەكتەپتەردى ارالاپ كورىپ, كوڭىلىمىز ءوستى. ولار جاڭا ۇلگىدەگى تەحنولوگيامەن قامتاماسىز ەتىلگەن. ينتەراكتيۆتى تاقتالارى بار, لينگوفوندى كابينەتتەرى جۇمىس ىستەپ تۇر. كومپيۋتەرلەرى ينتەرنەت جەلىسىنە قوسىلعان. اۋىلداعى مەكتەپتەردىڭ دە وسىنداي دەڭگەيگە كوتەرىلگەنى قۋانتتى. «جول كارتاسى» باعدارلاماسى شەڭبەرىندە وڭىرلەردىڭ ينفراقۇرىلىمىن دامىتۋ باعىتىندا كوپتەگەن جۇمىستار جاسالعاندىعى كورىنىپ تۇر. پرەزيدەنتتىڭ الەۋمەتتىك سالانى العا باستىرۋ بويىنشا بەرگەن تاپسىرمالارى جۇزەگە اسقانىنا كۋا بولدىق. اسىرەسە, «100 مەكتەپ, 100 اۋرۋحانا» باعدارلاماسى اياسىندا اۋىلدىق ەلدى مەكەندەردە جاڭادان بوي كوتەرگەن نىساندار حالىق يگىلىگىنە اينالعان. سونىمەن قاتار, «اق بۇلاق» اۋىز سۋ باعدارلاماسى بويىنشا كوپتەگەن اۋىلدارعا تازا اۋىز سۋ جەتكىزىلگەن. مىسالى, جۋالى اۋدانىنداعى 150 توسەكتىك اۋرۋحانادا بولدىق. بۇل ەمدەۋ ورنى تۇگەلدەي جاڭا زامانعى مەديتسينالىق قۇرال-جابدىقتارمەن قامتاماسىز ەتىلگەن. جاڭا تەحنولوگيانى مەڭگەرگەن ماماندارى دا بار, كەيبىر كۇردەلى اپپاراتتار بويىنشا ءوز قىزمەتكەرلەرىن قوسىمشا بىلىكتىلىگىن ارتتىرۋعا جىبەرىپ العان. اۋرۋحانادا تەلەكوپىر ارقىلى وزگە وڭىردەگى دارىگەرلەردەن كەڭەستەر الۋ مۇمكىندىگى جاسالعان.
تۇرار رىسقۇلوۆ اۋدانىندا بولعانىمىزدا, جەرگىلىكتى ءبىر كاسىپكەردىڭ ازاماتتىق ىسىنە كۋا بولدىق. ول ءوز قارجىسىنا مەكتەپ جانىنان 80 وقۋشىعا ارنالعان ينتەرنات ءۇيىن سالىپ بەرىپتى. شىنىمەن دە, اۋىلدىڭ ەڭسەسى كوتەرىلىپ قالعان. ءوزىم بۇرىن دا جامبىل وبلىسىندا بولىپ ءجۇرمىن. بۇگىنگى تاڭدا ءوڭىردىڭ جاڭاشا تۇلەگەنىن بايقادىق. جاڭادان سالىنعان مەكتەپتەر مەن اۋرۋحانالار, اۆتوكولىك جولدارى اۋىلعا ەرەكشە ءتۇر بەرىپ, كورىكتەندىرە تۇسكەن. حالىق نارىقتىق ەكونوميكانىڭ زاڭدىلىقتارىنا دا ابدەن بەيىمدەلىپ الىپتى. اۋىلدىق جەرلەردە شاعىن كاسىپكەرلىك تە جان-جاقتى دامۋ جولىنا تۇسە باستاعان. ءار ازامات ءوز جاعدايىن جاقسارتۋ ارقىلى ەلدىڭ العا باسۋىنا ۇلەس قوسىپ جاتىر. ەڭ باستىسى, تۇرعىنداردىڭ بولاشاققا دەگەن سەنىمدەرى زور.
كەزدەسۋلەردە ۇسىنىستار دا ايتىلدى. ماسەلەن, پرەزيدەنتتىڭ جولداۋى تۋرالى تەك ۇلكەن جيىنداردا عانا ەمەس, شاعىن باسقوسۋلاردا دا ءار ادام ءوز كوكەيىندەگى ويىن ءبىلدىرىپ, ەلدىڭ دامۋىنا ۇلەس قوسۋدىڭ جولدارىن ايتىپ وتىرسا, سونىڭ ءوزى قوعامدىق ورتادا ورتاق ماقساتتىڭ قالىپتاسۋىنا ىقپال ەتەتىنى ءسوزسىز. اتا-انالار مەن مۇعالىمدەر بالا تاربيەسىن دە ەلباسى جولداۋىنداعى نەگىزگى باعىتتارمەن ۇشتاستىرا بىلسە, ول دا جاستاردىڭ بولاشاققا دەگەن كوزقاراسىن نىعايتۋعا وڭ اسەر ەتەدى. بۇگىن قانداي دەڭگەيدەمىز, ال 2030 جىلى, ودان كەيىن 2050 جىلى قانداي دەڭگەيگە جەتەتىنىمىز جانە سول كەزدە ەل ەكونوميكاسىنىڭ دامۋى, وركەنيەت جولىنداعى تابىسىمىز, مەملەكەتتىك ءتىلدىڭ قولدانىلۋى قانداي دەڭگەيدە بولاتىنى – ءبارى دە جاڭا ستراتەگيالىق جولداۋدا كورىنىس تاپقان. الدىمىزدا ايقىن ماقسات تۇر. سوعان جەتۋ جولىندا ەسەلى ەڭبەك ەتۋ – بارشامىزدىڭ وتان الدىنداعى ازاماتتىق بورىشىمىز.
ۇلاسبەك سادىبەكوۆ,
پارلامەنت ءماجىلىسىنىڭ دەپۋتاتى, «نۇر وتان» حدپ فراكتسياسىنىڭ مۇشەسى.
