قولداعى دەرەكتەرگە سۇيەنسەك, پەتروپاۆل قالاسىندا 30 ءبىلىم وشاعى جاڭارتىلماق.
17 مەكتەپتىڭ تەرەزەلەرى اۋىستىرىلىپ, اۋماقتارى قورشالىپ, شاتىرلارى, سپورتزالدار, عيمارات قاسبەتتەرى ارلەنگەن. №7 مەكتەپتە 142 تەرەزەنىڭ 128-ءى, جەرتولەدەگى 4 قۇبىر اۋىستىرىلعان. بۇل ماقساتتا 62 ميلليون تەڭگە جۇمسالماق.
الايدا, جاڭا وقۋ جىلىنىڭ باستالۋىنا ساناۋلى كۇندەر قالعانىنا قاراماستان, جالپى جوندەۋ جۇمىستارىنىڭ ۇشتەن ءبىرى عانا ورىندالعان. وعان مەردىگەرلەردىڭ سالعىرتتىعى كەرى اسەر ەتىپ وتىرعانى بايقالادى. مىسالى, وبلىس ورتالىعىنداعى №10 مەكتەپ «ەڭبەك-وسكەمەن» قۇرىلىس كومپانياسىمەن 1 ماۋسىمدا كەلىسىمشارت جاساسقان. دەسە دە ءالى كۇنگە دەيىن تەندەر وتكىزىلمەگەن. شىعىستان ىرعالىپ-جىرعالىپ, ارتىنىپ-تارتىنىپ كەلگەنشە ۋاقىت زىمىراپ وتە شىققان. مەكتەپ ديرەكتورى تاتيانا انتسيبور جانىن شۇبەرەككە تۇيگەن كۇيى قانشا جازباشا سۇراۋ سالسا دا, ءالى كۇنگە دەيىن جاۋاپ جوق. 136 تەرەزەدەن 36-نىڭ عانا قويىلۋى ەسەكتىڭ ميمىرت ءجۇرىسىن ەلەستەتەدى. قالالىق كلاسسيكالىق گيمنازيانىڭ باسشىسى كۇلتاي مۇقانوۆا وسى كومپانيانىڭ ديرەكتورى اتىنا تالاپ-حات جازىپ, مايشاممەن ىزدەگەندەي كۇي كەشكەن. №8 مەكتەپتە 140 تەرەزە اۋىستىرۋدى كۇتىپ تۇر.
الدەقاشان اپاتتىق دەپ تانىلعان قوجابەرگەن جىراۋ اتىنداعى №6 مەكتەپتىڭ جاعدايى ءتىپتى دابىل قاعارلىق. ءبىلىم ءبولىمىنىڭ باسشىلىعى جاڭا عيماراتقا كوشەسىڭدەر دەگەن ۋادەلەرىنەن تايقىپ كەتىپ, ەكى وتتىڭ ورتاسىندا قالدىرعان. سولاقاي شەشىمنىڭ قابىلدانۋىنان-اق قازاق مەكتەپتەرىنە دەگەن كوزقاراستىڭ قانداي دارەجەدە ەكەنىن باعامداي بەرۋگە بولادى. 22 كابينەتتىڭ 7-ءۋى عانا دايىن. دالىزدەرگە كىرۋدىڭ ءوزى قورقىنىشتى. كۇردەلى جوندەۋگە بولىنگەن قاراجاتتىڭ جۇعىن بولاتىن ءتۇرى بايقالمايدى.
سولتۇستىك قازاقستان وبلىسى
