دەگەنمەن بيىلعى تامىزدىڭ العاشقى كۇنى ەلىمىزدىڭ مىڭداعان تۇرعىنى ءۇشىن ارايلاپ اتتى. سۇيىنشىلەگەن اتا-انالار, ءبىر كۇندە 53 785 تۇلەككە كەپىلدى تۇردە ستۋدەنت ستاتۋسىن بەرگەن وقۋ گرانتتارى!
ءبىلىم سالاسىنداعى مەملەكەتتىڭ جۇرگىزىپ وتىرعان ستراتەگيالىق ساياساتى ءوز جەمىسىن بەرگەنى بىردەن ءبىلىندى. ەندەشە ءسوزىمىزدى دايەكتەپ وتەلىك. الىس-جاقىننان, اعايىن-تۋىستان, الەۋمەتتىك جەلىلەردەن جەتىپ جاتقان قۋانىشتى حابارلاردان بىلگەنىمىز, جوعارى ءبىلىمدى بولۋدان ءۇمىتتى تالاي كوپ بالالى وتباسىلاردىڭ بالالارىنىڭ ءبىرى ءبىرىنشى رەت مەملەكەتتىك وقۋ گرانتىنا يە بولعان.
ءتىپتى كوڭىلدى تولقىتقان جاعداي, بۇيرەگى ىستەمەي, تەك اپپاراتتىڭ كومەگىمەن نۇر-سۇلتاندا بۇيرەك سالعىزۋعا دونور ىزدەپ جاتقان ناۋقاس جىگىتتىڭ ءدال وسىنداي سىناقتى كەزەڭدەردە بالاسىنىڭ مەملەكەتتىك وقۋ گرانتىنا يە بولعانىن ەستىپ, قۋانعاننان قوس بۇيرەگى قايتا ىستەپ كەتكەندەي دەنساۋلىعى ءتاۋىر بولعانىن ەستىپ, كوڭىلىمىز مارقايىپ ءجۇر. سول سياقتى اۋىلدا تۇراقتى جۇمىس كوزى جوق, تەك ەسىگىنىڭ الدىنداعى 5-6 مالعا عانا سۇيەنىپ وتىرعان قانشاما جاننىڭ بالاسى مەكتەپ ءبىتىرىپ, وسى قۋانىشتىڭ شەتىنە ىلىگىپ وتىرعانىن ايتۋدىڭ ءوزى ارتىق. قالاي دەسەك تە, مەملەكەتىمىز ۇلكەن قادامعا باردى, ۇلكەن ساۋاپتى ءىس اتقاردى دەپ بىلەيىك.
سونىمەن جىل بويى كۇندىز كۇلكى, تۇندە ۇيقى كورمەي دايىندالعان مىڭداعان تۇلەكتەر ارماندارىنىڭ جالىنا جابىستى. ەندى ءارى قاراي وسى مۇمكىندىكتەن ايىرىلماي, جەلىپ كەتۋ وزدەرىنىڭ قاجىر-تۇيسىكتەرىنە تاۋەلدى.
قىسقاسى, 2019 جىلى 143 089 وقۋشى مەكتەپ ءبىتىرىپ, 77 مىڭعا جۋىق بالا ۇبت تاپسىردى. بىلتىر ۇلتتىق بىرىڭعاي تەستىلەۋدەن 102 مىڭنان استام وقۋشى وتكەن بولاتىن. جوعارىدا ايتىپ وتىرعانىمىزداي, بيىل جوو-عا بولىنگەن مەملەكەتتىك گرانت سانى – 53 785, ياعني تۇلەكتەردىڭ 75 پايىزدان استامى جوعارى ءبىلىم الۋعا مۇمكىندىك الدى دەگەن ءسوز. مەملەكەتتىك گرانتتاردان بولەك, جاقسى ءبىلىم ناتيجەسىن كورسەتكەن تۇلەكتەرگە جوعارى وقۋ ورىندارى ءوز گرانتتارىن ۇسىنىپ وتىر. جاقسى وقيتىن بالاعا تالاسۋدا جەكەمەنشىك ءبىلىم وشاقتارى دا قالىسىپ جاتقان جوق. قىسقاسى, تۇلەكتەردىڭ تولىقتاي دەرلىك تەگىن وقۋ مۇمكىندىگى تۋعاندا ءبىلىم ساپاسى ناشارلاماي ما, وسىنشاما جوعارى جانە ارناۋلى ورتا ءبىلىمى بار ماماندارعا جۇمىس تابىلا ما؟ ءدال وسى كۇندەرى كورشى ەلدە ىسساپارمەن جۇرگەن ارىپتەستەرىمىز الەۋمەتتىك جەلىدە «وزبەكستان كوللەدجدەردىڭ ءبارىن اقىلى جۇيەگە كوشىردى, ءبىز تەگىن كاسىپتىك ءبىلىم الۋعا ادام تاپپاي وتىرمىز. كىمدىكى دۇرىس, كىمدىكى بۇرىس ەكەنىن ەندى ۋاقىت انىقتايتىن بولادى» دەگەن جازبالار قالدىردى.
جوعارى ءبىلىم تەگىن بولماسا شە؟..
«مەملەكەتتىك گرانت كوپ, ال ءبىلىم ساپاسى بار ما؟ ءبىلىم ارقاشان ليۋكس نارسە بولۋى كەرەك. سوندا ونىڭ قۇنى, قادىرى بولادى. ال گرانتقا ءتۇسۋ ءالى دە جاي الەۋمەتتىك ستاتۋس قانا. تەگىن ءبىلىمنىڭ تەرىس تۇستارى كوپ. ەڭ الدىمەن بالاعا جانە اتا-اناسىنا كۇيزەلىس. سوسىن ءوز تاڭداۋى ەمەس, قايسىسى قولجەتىمدى, سونى تاڭدايدى. ناتيجەسىندە ول بولىمدە بالا وقىعىسى كەلمەۋى مۇمكىن. ەگەر اقىلى ءبىلىم بولسا, بالا ىنتاسىمەن وقيدى, وقىتۋشىلاردىڭ ايلىعى دا جوعارى بولادى, ساپالى ماماندار شىعا باستايدى, ۋنيۆەرسيتەت سانى ازايىپ, تەك مىقتىلار قالادى.
جالپى قازىرگى ۋاقىتتا بالانى بۇرىنعىداي جوعارى وقۋ ورنىنا تۇسۋگە مىندەتتەمەي, ناقتى ءبىر ماماندىقتى يگەرۋگە باعىتتاۋ كەرەك. ديپلومدى, ساپاسىز مامانداردى كوبەيتكەنشە, قولىنان ءىس كەلەتىن جاستاردى كوبەيتكەن ءلازىم. سانانىڭ جاڭارۋى, رۋحاني جاڭعىرۋ دەگەندى وسىلاي تۇسىنەمىن», دەيدى بەلگىلى بلوگەر ارشات وراز.
بۇل ويدى تۇبەگەيلى جوققا شىعارا الماساق تا, مەملەكەتىمىزدىڭ الەۋمەتتىك ومىرىندە, مىڭداعان تۇلەكتەردىڭ تاعدىرىندا ورىن الىپ وتىرعان وڭدى وزگەرىستەردى باعالاعان ءجون.
ماسەلەن, ۇبت-نىڭ ءوزى دە مەكتەپ ءبىتىرۋشى ءۇشىن ۇلكەن كۇيزەلىس ەكەنىن ءبىلىپ بولدىق. مەكتەپتە جاقسى وقىپ كەلىپ, تۋرا بىتىرەتىن تۇستا تومەن بالل الىپ قالعان جاعدايلار, ياكي بولماسا گرانتقا 1-2 بالل عانا جەتپەي اقىلى ءبىلىم الىپ جۇرگەن جاستار قانشاما؟ ال مەديتسينالىق ۋنيۆەرسيتەتتەردە 8-9 جىل قاتارىنان اقىلى ءبىلىم الۋعا ءماجبۇر ستۋدەنتتەر بار.
ساناسى بار بالا اقىلى وقىدىم نەمەسە تەگىن ءبىلىم الىپ ءجۇرمىن دەمەيدى. ال تەگىن ءبىلىمنىڭ قادىرىنە جەتپەگەن ماماندى ۋاقىت ءوزى جاعاعا لاقتىرىپ تاستايدى.
