«جارىستىڭ ءبىرىنشى كۇنى Elite ساناتىنداعى سپورتشىلار «سۋپەر-سپرينت» قاشىقتىعىندا ترياتلوننان قازاقستان رەسپۋبليكاسى كۋبوگىنىڭ ءۇشىنشى كەزەڭى جەڭىمپازدارىن انىقتايدى. وسى قاشىقتىقتا U17, U19 جانە U23 ساناتىنداعى سپورتشىلار قازاقستان رەسپۋبليكاسى چەمپيوناتى اياسىندا سايىسادى. ال ەكىنشى سايىس كۇنى الاڭدا اۋەسقوي سپورتشىلار باق سىنايدى» دەپ حابارلايدى جارىستى ۇيىمداستىرۋشى باتىس قازاقستان وبلىستىق دەنە شىنىقتىرۋ جانە سپورت باسقارماسىنىڭ ءباسپاسوز قىزمەتى.
ترياتلوننان قازاقستان رەسپۋبليكاسى كۋبوگى مەن چەمپيوناتى – قازاقستاندىق ترياتلون فەدەراتسياسىنىڭ باستاماسىمەن وتكىزىلەتىن رەسپۋبليكالىق سايىستار. قىزىقتى دودا «سامۇرىق-قازىنا» ۇلتتىق ءال-اۋقات قورى» اق, قازاقستان رەسپۋبليكاسى مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ ىستەرى بويىنشا كوميتەتى, قازاقستان رەسپۋبليكاسى ۇلتتىق وليمپيادا كوميتەتى, باتىس قازاقستان وبلىسى اكىمدىگى, ورال قالاسى اكىمدىگى جانە BI Group كومپانياسىنىڭ قولداۋىمەن وتكىزىلمەك.
سايىس ماقساتى − قازاقستاندا ترياتلوندى دامىتۋ جانە سالاۋاتتى ءومىر سالتىن ناسيحاتتاۋ, قازاقستاندىق كاسىبي سپورتشىلاردىڭ, باپكەرلەر مەن تورەشىلەردىڭ بىلىكتىلىگىن ارتتىرۋ جانە ۇزدىك سپورتشىلاردى انىقتاۋ.
ورالداعى سايىس اياسىندا كاسىبي سپورتشىلار بىرنەشە قاشىقتىقتا سىنعا تۇسپەك:
1) Elite ساناتى (18-23 جاس ارالىعى) – ترياتلون, قاشىقتىق – «سۋپەر-سپرينت» (300 م ءجۇزۋ, 8 كم ۆەلوجارىس, 2 كم جۇگىرۋ).
2) U23 ساناتى (18-23 جاس ارالىعى) – ترياتلون, قاشىقتىق – «سۋپەر-سپرينت» (300 م ءجۇزۋ, 8 كم ۆەلوجارىس, 2 كم جۇگىرۋ).
3) U19 ساناتى (17-19 جاس ارالىعى) – ترياتلون, قاشىقتىق – «سۋپەر-سپرينت» (300 م ءجۇزۋ, 8 كم ۆەلوجارىس, 2 كم جۇگىرۋ).
4) U23 ساناتى (15-17 جاس ارالىعى) – ترياتلون, قاشىقتىق – «سپرينت» (750 م ءجۇزۋ, 20 كم ۆەلوجارىس, 5 كم جۇگىرۋ).
ورالدا وتەتىن ۇشسايىسقا قازاقستاننىڭ ءار ايماعىنان كەلگەن 100-گە جۋىق سپورتشى قاتىسادى دەپ كۇتىلۋدە.
بۇدان بۇرىن شاعان جانە جايىق وزەندەرىنىڭ قيىلىسقان جەرىندە ورنالاسقان ورال قالاسىندا ترياتلون سپورتىن دامىتۋعا مۇمكىندىك مول ەكەندىگى ايتىلعان ەدى.
باتىس قازاقستان
