«ديپلوممەن اۋىلعا» جوباسىنىڭ نەگىزگى ماقساتى — اۋىلدىق ەلدى مەكەندەرگە جۇمىس ىستەۋگە جانە تۇرۋعا كەلگەن دەنساۋلىق ساقتاۋ, ءبىلىم بەرۋ, الەۋمەتتىك قامسىزداندىرۋ, مادەنيەت, سپورت جانە اگروونەركاسىپتىك كەشەن سالاسىنداعى ديپلومى بار مامانداردى ىنتالاندىرۋ.
جوبا اياسىندا 100 اەك نەمەسە 252 500 تەڭگە مولشەرىندە كوتەرمە جاردەماقى تولەۋ تۇرىندەگى الەۋمەتتىك قولداۋ شارالارى قاراستىرىلعان. الەۋمەتتىك قولداۋ شارالارىنىڭ قاتارىندا تۇرعىن ءۇي الۋعا 1500 اەك نەمەسە 3 787 500 تەڭگەدەن اسپايتىن مولشەردە بيۋدجەتتىك نەسيە قاراستىرىلعان.
«ديپلوممەن اۋىلعا» جوباسىن جۇزەگە اسىرۋ كەزەڭىندە 60 مىڭنان استام مامانعا 7,4 ملرد تەڭگە كولەمىندە كوتەرمە جاردەماقى بەرىلدى, ال 27,5 مىڭنان استام مامانعا تۇرعىن ءۇي ساتىپ الۋعا 70,6 ملرد تەڭگە بيۋدجەتتىك نەسيە بەرىلدى.
«جىلدان جىلعا نەسيە الۋشىلار سانى ارتىپ كەلەدى. 15 جىل ىشىندە جىلدىق 0,01% پايىزدىق مولشەرلەمەمەن ارتىق تولەم 6 مىڭ تەڭگەگە جۋىق قۇرايدى», — دەدى ە. الپىسوۆ.
2019 جىلى 1,3 ملرد تەڭگەگە 7 176 مامان كوتەرمە جاردەماقى الادى. 2019 جىلعى 1 شىلدەدەگى جاعداي بويىنشا 5172 مامانعا 911,4 ملن تەڭگە سوماسىندا كوتەرمە جاردەماقى تولەندى. 2019 جىلى 3 908 مامانعا 14,8 ملرد تەڭگە كولەمىندە تۇرعىن ءۇي الۋعا نەسيە بەرىلەدى. 2019 جىلعى 1 شىلدەدەگى جاعداي بويىنشا 9,1 ملرد تەڭگەگە 2 527 مامان تۇرعىن ءۇي الۋعا نەسيە الدى.
سالالار تۇرعىسىنان العاندا, كەلگەن مامانداردىڭ جالپى سانىنان 42 745 ادام (71,2%) ءبىلىم بەرۋ سالاسىندا, 12 705 (21,2%) دەنساۋلىق ساقتاۋ سالاسىندا, 1 604 (2,7%) - مادەنيەت, 863 (1, 4%) سپورت, الەۋمەتتىك قامسىزداندىرۋ سالاسىندا - 483 (0,8%) جانە اگروونەركاسىپتىك كەشەندە - 1665 (2,8%) ادام جۇمىس ىستەيدى.
ە. الپىسوۆ «ديپلوممەن اۋىلعا» جوباسىن ىسكە اسىرۋدىڭ تيىمدىلىگىن ارتتىرۋ ماقساتىندا سوڭعى 10 جىل ىشىندە زاڭنامالىق جانە نورماتيۆتىك اكتىلەرگە بەلگىلى ءبىر وزگەرىستەر ەنگىزىلگەنىن اتاپ ءوتتى. سونىمەن, 2011 جىلى تۇرعىن ءۇي ساتىپ الۋعا بيۋدجەتتىك نەسيە مولشەرى 630 اەك-تەن 1500 اەك-كە دەيىن ۇلعايتىلدى. 2012 جىلدان باستاپ الەۋمەتتىك قولداۋ شارالارى ۆەتەريناريا ماماندارىنا, ال 2014 جىلدان باستاپ اگروونەركاسىپتىك كەشەن ماماندارىنا ۇسىنىلادى.
ە. الپىسوۆتىڭ ايتۋىنشا, بۇگىندە اۋىلدىق جەرلەردە جۇمىس ىستەۋگە جانە تۇرۋعا كەلگەن مامانداردى ىنتالاندىرۋ جانە ۇستاپ قالۋ بويىنشا جوبانىڭ نەگىزگى ماقساتى تولىقتاي ورىندالىپ جاتىر.
«الايدا, جوبا اياسىندا مامانداردى قولداۋ شارالارىن كەڭەيتۋ تۋرالى ۇسىنىستار كەلىپ تۇسۋدە. جوبانى جەتىلدىرۋ جۇمىستارى جالعاسادى», — دەپ سەندىردى ۆيتسە-مينيستر.
ءوز كەزەگىندە, «اۋىل شارۋاشىلىعىن قارجىلاي قولداۋ قورى» اق باسقارۋشى ديرەكتورى دۋمان وسپانوۆ اۋىل شارۋاشىلىعىن قارجىلاي قولداۋ قورى 2010 جىلدان باستاپ اتالعان جوبانىڭ باستى وپەراتورى ەكەنىن ايتتى.
2010 جىلدان باستاپ قور اۋىلدا 28 753 ماماندى باسپانامەن قامتاماسىز ەتۋ ماقساتىندا 75 ملرد تگ بەردى. بۇگىنگە دەيىن بۇل ماماندار باسپانامەن قامتاماسىز ەتىلگەن.
د. وسپانوۆتىڭ ايتۋىنشا, بۇل نەسيەنى بەرۋ تۋرالى تۇپكىلىكتى شەشىمدى جەرگىلىكتى اتقارۋشى ورگان قابىلدايدى. اتاپ ايتقاندا, اكىمدىكتەر ماماننىڭ تالاپتارعا سايكەستىگىن قاراستىرادى جانە ولاردان قاجەتتى قۇجاتتاردى قابىلدايدى, كەيىن ولاردى اۋىل شارۋاشىلىعىن قارجىلاي قولداۋ قورىنا تاپسىرادى. قوردىڭ نەگىزگى قىزمەتى — نەسيەنىڭ ۋاقىتىلى وتەلۋىن باقىلاۋ جانە مونيتورينگ جاساۋ.
