كورمەدە كورەرمەن نازارىنا سوۆەت وداعى زامانىنداعى بۇيىمدار ۇسىنىلعان. كەڭەستىك دۇكەن سورەسى تۇرىندەگى ەكسپوزيتسيادا سول زامانداعى تۇرمىستىق بۇيىمدار: راديولا, ماگنيتوفون, شاڭسورعىش, تىگىن ماشيناسى; مەكتەپ وقۋشىلارىنا ارنالعان وقۋلىقتار, ويىنشىقتار قويىلعان. پيونەرلىك كەرنەي مەن بارابان, قىزىل گالستۋك پەن وقۋشىلار كيىمى دە سول زاماندى كورگەن جاننىڭ كوزىنە وتتاي باسىلارى انىق. كەزىندە ءبىراز جەرگە ايگىلى بولعان ورال ەت-كونسەرۆى كومبيناتىنىڭ قالبىرداعى ونىمدەرى دە ەكىنىڭ ءبىرى قول جەتكىزە المايتىن قات دۇنيە بولاتىن.
بالالىق شاعى ورال قالاسىندا وتكەن ەلەنا كازانوگينا بۇگىندە رەسەيدىڭ تولياتتي قالاسىندا تۇرادى ەكەن. تۋعان جەرىنە تابانى تيمەگەنىنە 35 جىل بولىپتى. جاستىق شاعىن, سوۆەتتىك ورال قالاسىن ساعىنىپ كەلگەن مەيمان مۋزەيدەگى كەيبىر جادىگەردى كورگەندە كوزىنە جاس كەلگەنىن دە بايقاماي قالعان.
- بۇل كورمەنى ۇيىمداستىرۋداعى ماقساتىمىز – جاس بۋىندى تاريحپەن تانىستىرۋ, باردى باعالاۋعا ۇيرەتۋ. بۇگىنگى ەكسپوزيتسيادا 265 جادىگەر قويىلدى, مۇنىڭ ءبارىن مۋزەيگە ورال قالاسىنىڭ تۇرعىندارى ءار كەزدەرى تاپسىرعان بولاتىن, - دەيدى مۋزەي قىزمەتكەرى تالشىن اناتاەۆا.
راسىندا دا بۇل كورمە كەلۋشىلەردىڭ كەيبىرىنە ساعىنىشتى جاستىق شاعىن ەسكە سالسا, كوپ ادامعا كەڭەستىك تۇرمىستىڭ قارابايىر, سۇرەڭسىز كورىنىسىن كورسەتىپ تۇر.
باتىس قازاقستان
