«TorusMaps.kz» كومپانياسىنىڭ تەحنيكالىق ديرەكتورى داۋرەن عابدۋللاەۆتىڭ ايتۋىنشا, بۇل وسىنداي الەۋمەتتىك فورماتتا جۇزەگە اسىرىلعان ەلىمىزدەگى تۇڭعىش جوبا ەكەن. ازىرگە وسىنداي ەكى كارتا ازىرلەنگەن. ونىڭ ەكىنشىسى كوپشىلىك جينالاتىن حالىققا قىزمەت كورسەتۋ ورتالىعىندا نەمەسە سيتي-سەنتەر ويىن-ساۋىق ساۋدا كەشەنىندە قويىلۋى مۇمكىن.
«TorusMaps.kz» كومپانياسىنىڭ ينتەراكتيۆتى 3D-كارتاسى – باتىس قازاقستان وبلىسى كارتاسىنداعى تاريحي ورىندار مەن تۋريستىك نىساندار تۋرالى تولىققاندى اقپارات – تاريحي مالىمەتتەر, سۋرەتتەر, بەينەباياندار بەرىپ, ۆيرتۋالدى تۋرلار كورسەتەتىن امبەباپ سەنسورلىق تەرمينال. جوبا اۆتورلارى كارتا باعدارلاماسى سامسۋنگ كومپانياسى قۇراستىرعان كۇلتەلى تەحنولوگيا بويىنشا جاسالعانىن ايتادى. 3D-كارتانى پايدالانۋشى بۇل جەردەن اۋديو, بەينە, گرافيكالىق, مۋلتيمەديالىق جانە ۆيرتۋالدى اقپارات الا الادى.
كارتا-تەرمينالدىڭ قۇنى 1 ميلليون 800 مىڭ تەڭگە ەكەن. ۇيىمداستىرۋشىلار كارتا باعدارلاماسى ۇنەمى تولىقتىرىلىپ وتىرىلاتىنىن ايتادى. كارتا تۇرعىندار مەن قالا قوناقتارىنا اق جايىق ءوڭىرىنىڭ تۋريستىك الەۋەتىن تانىستىرىپ, كيەلى جەرلەردى ناسيحاتتايدى. ءوز كەزەگىندە بۇل ولكەتانۋ سالاسىن دامىتىپ, جاسوسپىرىمدەردىڭ بويىندا پاتريوتتىق سەزىمدى دە كۇشەيتەدى.
– 2018 جىلى ءوڭىردىڭ كيەلى جەرلەرى بويىنشا تۋريستىك باعىت جاساقتالدى. وعان وبلىس اۋماعىنداعى 7 نىسان ەنگىزىلدى. باتىس قازاقستان وبلىسىندا قازىردىڭ وزىندە جالپىۇلتتىق جانە وڭىرلىك دەڭگەيدەگى 100-گە جۋىق كيەلى نىسان انىقتالعان. سوندىقتان ءبىز كارتامىزدى ودان ءارى تولىقتىرا بەرەمىز, - دەيدى باتىس قازاقستان وبلىستىق كاسىپكەرلىك جانە يندۋستريالدى-يننوۆاتسيالىق دامىتۋ باسقارماسىنىڭ باس مامانى اسەل اجمۇحانبەتوۆا.
مالىمەتتەرگە قاراعاندا, كۇنى بۇگىن تۋريستەردىڭ وڭىرگە كەلۋى 18 پايىزعا ارتقان. سوندىقتان تۋريستەردى قازاق, ورىس جانە اعىلشىن تىلدەرىندە ناقتى اقپاراتپەن قامتاماسىز ەتۋ ماقساتىندا اتالمىش ەلەكتروندى پانەلدىڭ ماڭىزى زور. 3D-كارتادا وبلىستىڭ كيەلى جەرلەرى مەن تۋريستەرگە قاجەتتى اقپارات, ماسەلەن, مەيرامحانالار مەن قوناقۇيلەر تۋرالى مالىمەت تولىق قامتىلعان.
باتىس قازاقستان
