وتكەن جيىرما جىلدا sozdik.kz جوباسى كەڭ اۋديتورياعا يە بولىپ, وتانداستارىمىزدىڭ ءجيى پايدالاناتىن سوزدىگىنە اينالىپ ۇلگەردى. قازىرگى تاڭدا سايت كۇنىنە 50000 ادام قولداناتىن ەلىمىزدەگى جالعىز ساپالى ەلەكتروندى سوزدىك بولىپ وتىر. سايتتى ءجيى قولدانۋشىلاردىڭ ءبىر تاراپى ەرەسەك جاستاعى ادامدار بولسا, اسىرەسە كەڭسە قىزمەتكەرلەرى, مەملەكەتتىك قىزمەتتەگىلەر, ەندى ءبىر جاعى وقۋشىلار مەن ستۋدەنتتەر, ءتىل ۇيرەتۋ كۋرستارىنا قاتىسۋشىلار ەكەن. سوزدىكتى پايدالانۋشىلار سانى جىل سايىن 20 پايىزعا ءوسىپ وتىر. ايتا كەتەرلىگى, بۇل كورسەتكىش قاندايدا ءبىر جارنامالىق ينۆەستيتسياسىز جۇزەگە اسقان. سايتتىڭ SEO-وپتيميزاتسيالىق كونتەنتى جاڭارىپ, جاقسارىپ وتىرعاندىقتان بولار, سوزدىك عالامتور جەلىسىندەگى ەڭ وڭتايلى اۋدارما قۇرالدارىنىڭ بىرىنە اينالدى. سوزدىك قورجىنىندا بۇگىندە 370 مىڭ ءسوز بەن ءسوز تىركەسى بار. مۇنداي اۋقىمدى جوبانىڭ ىلگەرىلەۋىنە اۆتوردان بولەك قازاق ءتىلىنىڭ ەتيمولوگياسىن جاقسى بىلەتىن ءانونيمدى ماماندار جۇمىس ىستەيدى. بۇدان بولەك سايت جارنامامەن دە اينالىسىپ, ودان تۇسەتىن اي سايىنعى ورتاشا كىرىس 2000-4000 دوللاردى قۇرايدى.
ەۆگەني تەك سايتتى قۇرۋمەن عانا شەكتەلگەن جوق, ول كومانداسىنداعى مۇددەلەستەرىمەن بىرگە iOS جانە Android-قا ارنالعان ءموبيلدى قوسىمشالار ويلاپ تاپتى, سونداي-اق مەسسەندجەردەن شىقپاي-اق ءسوزدى اۋدارۋعا مۇمكىندىك بەرەتىن Telegram-بوت قۇردى. ەۆگەني ميلليونداعان قازاقستاندىق قولداناتىن سوزدىكتىڭ قورىن كۇندەلىكتى تولىقتىرىپ وتىرادى, سول ارقىلى مەملەكەتتىك ءتىلدىڭ مارتەبەسىنىڭ اسقاقتاۋىنا ۇلكەن ۇلەس قوسۋدا.
جوبا اۆتورىنىڭ پىكىرىنشە, ونلاين-سوزدىك عالامتور نارىعىنداعى مارتەبەسىن قازاق ءتىلى Google Translate ءتىلى بولعان كۇننىڭ وزىندە جوعالتپايدى. ء«بىز قازاقستاندىق عالامتور نارىعىندا قازاق ءتىلىنىڭ اۋدارما جۇمىسىمەن ءونىمدى ەڭبەك ەتۋدەمىز. سوزدىكتىڭ ءبىر ارتىقشىلىعى, كىرگەن ادامدا قاي ءسوز قاشان, قانداي كونتەكستە قولدانىلاتىنىن بىلۋگە تاڭداۋ بار ءارى سالىستىرا الادى. سوزدىكتىڭ جاڭا نۇسقاسىن دايىنداپ ەنگىزدىك. وندا سايتتى قولدانۋشى جەكە پىكىرىن قالدىرىپ, ءتىپتى سوزدىك مازمۇنىنا جاڭا ءسوز قوسا الادى. الداعى ۋاقىتتا كاسىبي ورتا قۇرۋدى جوسپارلاپ وتىرمىز. جانە قازاقشا سوزدەردىڭ ايتىلۋى مەن قازاقشادان اعىلشىنشاعا, اعىلشىننان قازاقشاعا اۋدارما باعىتىن ەنگىزسەم دەگەن وي بار», – دەدى ەۆگەني.
جەرلەستەرىنىڭ ساۋاتىن ارتتىرۋعا جوسپارلى تۇردە كىرىسۋ ءۇشىن تۋعان جەرگە دەگەن ىستىق ىقىلاس, وتان الدىنداعى بورىشتى سەزىنۋ ازدىق ەتسە كەرەك. مەملەكەتتىك ءتىلدى جاڭعىرتۋ, تسيفرلاندىرۋ جانە العا جىلجىتۋعا بار ەرىك-جىگەرىن سالۋ پاتريوتيزمنەن بولەك ءبىلىم مەن بىلىكتى قاجەت ەتەدى. بۇل سوزىمىزگە قىزمەت بابىمەن ەمەس, ءوز ەركىمەن ءھام ءوز قارجىسىنا قازاق ءتىلىنىڭ ەلەكتروندى سوزدىگىن جاساپ, اياقتان تۇرعىزعان, 2018 جىلعى «100 جاڭا ەسىم» جوباسىنىڭ جەڭىمپازى ەۆگەني چۋريكوۆتىڭ ەلەۋلى ەڭبەگى كۋا. ونىڭ قازاق ءتىلىن ۇيرەنۋشىلەرگە قولايلى باعدارلاما جاساۋى, ەڭ الدىمەن, مەملەكەتتىك تىلگە قۇرمەت ءھام ۇلتقا كورسەتكەن قۇرمەت.
