قوعامدىق قابىلداۋدا ىشكى ىستەر ءمينيسترى ەرلان تۇرعىمباەۆ ازاماتتاردى جەكە-جەكە قابىلداپ, بارىنە تۇششىمدى جاۋاپ قايتاردى. سونداي-اق باسقا وڭىرلەردەن ونلاين رەجىمدە بايلانىسقا شىققانداردىڭ ايتقانىنا قۇلاق ءتۇردى.
ءىس-شارا بارىسىندا مينيستر زورلىق جاساعانداردى جازالاۋعا قاتىستى پىكىر ءبىلدىردى.
– ادام زورلاۋ قىلمىسىنىڭ جازاسى زاڭنامالىق جاعىنان جان-جاقتى بەكىتىلگەن. ارنايى باپتىڭ ءبىرىنشى, ەكىنشى, ءۇشىنشى بولىمدەرى بار. توپتىق زورلاۋ جەكە قاراستىرىلعان. بارلىعىندا جازا – قاتاڭ. ءبىر باپتا جەڭىل, بىرىندە قاتاڭ دەپ ايتۋ ەكىتالاي. ءار جاعدايعا جەكە-جەكە قاراۋ كەرەك. ادام زورلاۋ – اۋىر قىلمىس. مۇندا ازامات رەتىندە دە, ايەل رەتىندە دە زابىرلەنۋشىنىڭ جەكە ەركىندىگىنە قول سۇعىلىپ, ار-نامىسى تاپتالادى. سوندىقتان اۋىر قىلمىستىڭ جازاسى دا اۋىر بولۋى كەرەك, – دەدى ەرلان تۇرعىمباەۆ.
مينيستر باق وكىلدەرىنە قىلمىستىق-پروتسەستىك كودەكسكە وزگەرتۋلەر مەن تولىقتىرۋلار ەنگىزىلۋى مۇمكىن ەكەنىن ايتتى. قازىر باس پروكۋراتۋرا ىشكى ىستەر مينيسترلىگىمەن بىرىگىپ, وسى ماسەلەنى قاراستىرىپ جاتىر ەكەن. ونىڭ ىشىندە تۇزەتۋ مەكەمەلەرىنە قاتىستى وزگەرىستەر بار. قولدانىستاعى قىلمىستىق-اتقارۋ كودەكسىنە 60-تان اسا وزگەرىس ەنگىزۋ ۇسىنىلىپتى. ەندى باس پروكۋراتۋراعا جولدانعان ۇسىنىستار پارلامەنتتە تالقىلانباق.
سونىمەن قاتار ەرلان تۇرعىمباەۆ گاز باللونى جارىلۋى سالدارىنان اتا-اناسىنان ايىرىلعان ەكىباستۇز تۇرعىنىنىڭ ارىزىنان كەيىن پاۆلوداردىڭ پوليتسيا قىزمەتكەرلەرىن قاتتى سىناپ, ماسەلەنى قايتا قاراۋدى تاپسىردى. جالپى بۇل وبلىستا تۇرعىنداردىڭ ءجيى شاعىمداناتىنىن ايتقان مينيستر ساقشىلاردى جازالايتىنىن, ءتىپتى جۇمىستان دا شىعاراتىنىن جەتكىزدى.
