باتىس قازاقستان وبلىستىق پوليتسيا دەپارتامەنتى جاز كەزىندە جاسوسپىرىمدەرگە قاتىستى ءتۇرلى قۇقىق بۇزۋشىلىقتىڭ الدىن الۋ ماقساتىندا «كانيكۋل» اتتى جەدەل الدىن الۋ شاراسىن ۇيىمداستىردى. بۇل رەتتە, اسىرەسە پوليتسيانىڭ ارنايى ەسەبىندە تۇرعان, شىرقى ءجيى بۇزىلاتىن شاڭىراقتار ەرەكشە باقىلاۋدا بولدى.
پوليتسيا قىزمەتكەرلەرى پروكۋراتۋرا, ءبىلىم مەكەمەلەرى, Nur Otan پارتياسىنىڭ وبلىستىق فيليالى جانە جاستار ۇيىمدارىنىڭ قاتىسۋىمەن ءبىر اپتا بويى رەيدتىك شارالار ۇيىمداستىرىپ, 246 اكىمشىلىك قۇقىق بۇزۋشىلىقتى انىقتاعان.
– رەيد كەزىندە ەڭ ءجيى كەزدەسكەن قۇقىق بۇزۋشىلىق – كامەلەتكە تولماعان بالالاردىڭ ساعات 23.00 مەن 6.00 ارالىعىندا اتا-اناسىنىڭ قاداعالاۋىنسىز ۇيىنەن تىسقارى ءجۇرۋى بولدى. وسىنداي 228 وقيعا تىركەۋگە الىندى. سونداي-اق 9 اتا-اناسى نەمەسە زاڭدى وكىلى ءوزىنىڭ بالا تاربيەسىنە قاتىستى مىندەتىن ورىنداماعانى ءۇشىن جاۋاپقا تارتىلسا, 21 جاسقا تولماعان جاندارعا الكوگولدىك ىشىمدىك ساتقان 4 وقيعا انىقتالدى, – دەيدى بقو پوليتسيا دەپارتامەنتى ءباسپاسوز قىزمەتىنىڭ مامانى ءاليا ناۋرىزعاليەۆا.
پروفيلاكتيكالىق شارالار كەزىندە كامەلەتكە تولماعان 250 بالا پوليتسيا بولىمشەسىنە اكەلىنگەن. ونىڭ ىشىندە قىلمىستىق جاۋاپكەرشىلىك تۋرالى 2 حاتتاما تولتىرىلسا, 237 مارتە اكىمشىلىك قۇقىق بۇزۋشىلىق تىركەلگەن. 11 بالانىڭ قاڭعىباستىعى انىقتالسا, 2 بالا كامەلەتكە تولماعاندارعا ارنالعان بەيىمدەۋ ورتالىعىنا جىبەرىلگەن. 13 وتباسى ارنايى تىركەۋگە قويىلعان.
«كامەلەتكە تولماعان بالالاردى قاداعالاۋسىز قالدىرۋدىڭ سوڭى كەيدە ورنى تولماس وكىنىشكە ۇرىندىرىپ جاتادى. سوندىقتان مۇقيات بولىڭىزدار» دەپ ەسكەرتەدى پوليتسيا قىزمەتكەرلەرى. وسى جاز مەزگىلىندە عانا باتىس قازاقستان وبلىسىندا 7 بالا سۋعا كەتىپ, كوز جۇمدى.
باتىس قازاقستان وبلىسى
