سوڭعى ءبىر جىل ىشىندە اق جايىق وڭىرىندە «SENIM» دەنساۋلىق ساقتاۋ جۇيەسى قىزمەتكەرلەرىنىڭ سالالىق كاسىپتىك وداعى جانە «ىنتىماق» ورتا جانە كىشى بيزنەس جۇمىسكەرلەرىنىڭ كاسىپوداعى قۇرىلدى. مۇنان وزگە جاڭادان قۇرىلعان 59 باستاۋىش كاسىپوداقتار ەسەبىنەن كاسىپوداق مۇشەلەرىنىڭ سانى 10755-كە ارتقان.
- كاسىپوداقتار ورتالىعى قازاقستان رەسپۋبليكاسى «كاسىپتىك وداقتار تۋرالى» زاڭىمەن بىرگە باسقا دا نورماتيۆتىك-قۇقىقتىق زاڭداردى باسشىلىققا الا وتىرىپ, ءوز جۇمىسىن وبلىسىمىزدا قىزمەت اتقارىپ وتىرعان سالالىق, جەرگىلىكتى جانە باستاۋىش كاسىپوداق ۇيىمدارىمەن بىرلەسە جۇرگىزىپ كەلەدى, دەيدى «بقو كاسىپوداقتار ورتالىعى» اۋماقتىق كاسىپوداقتار بىرلەستىگىنىڭ توراعاسى امانگەلدى تاسپيحوۆ.
بۇل سالادا بيىلعى ۇلكەن وقيعانىڭ ءبىرى – «قاراشىعاناق پەتروليۋم وپەرەيتينگ ب.ۆ.» كومپانياسى قىزمەتكەرلەرىنىڭ جەرگىلىكتى كاسىپوداق ۇيىمى» قوعامدىق بىرلەستىگى بيىل جىل باسىنان 2019-2021 جىلدارعا ارنالعان ۇجىمدىق شارتىن قولدانىسقا ەنگىزدى. ۇجىمدىق شارتتا وسى كەزگە دەيىن قولدانىستا بولعان الەۋمەتتىك پاكەتتى جەتىلدىرىپ, قىزمەتكەرلەردىڭ ءال-اۋقاتى دەڭگەيىن ودان ءارى جاقسارتۋ باعىتىندا قابىلدانعان. «ۇجىمدىق شارت بويىنشا ءار جىل سايىن 1 قاڭتاردان بارلىق جۇمىسشىلاردىڭ جالاقىسىن رەسمي قۇنسىزدانۋ دەڭگەيىنەن تومەن ەمەس دەڭگەيدە يندەكستەۋدى جۇرگىزۋ شارتى الداعى مەرزىمگە دە ساقتالدى. قوسىمشا جالپى يندەكستەۋدەن بولەك بارلىق جۇمىسشىلاردىڭ جالاقىسىن 2019 جىلى – 2,0%, 2020 جىلى - 1,0%, 2021 جىلى 0,5% ۇلعايتۋ, جۇمىسقا قابىلداۋ كەزىندەگى جالاقى دەڭگەيىن 170 000 تەڭگەدەن تومەن ەمەس دەڭگەيدە بەلگىلەۋ شارالارى دا وسى ۇجىمدىق شارتتىڭ ەڭبەك ادامىنىڭ جاعدايىن جاقسارتۋدا جىلدار بويىنا جاسالىپ وتىرعان وڭ ۇردىستەردىڭ جالعاسى دەۋگە بولادى», دەيدى امانگەلدى تاسپيحوۆ.
«بقو كاسىپوداقتار ورتالىعى» اۋماقتىق كاسىپوداقتار بىرلەستىگىنىڭ توراعاسىنىڭ ايتۋىنشا, كاسىپوداقتار ۇجىمداعى ەڭبەك داۋلارىنىڭ الدىن الۋ ماقساتىندا بيىلعى 15 ناۋرىز كۇنى كاسىپوداقتار ورتالىعى مەن ورال قالاسىنىڭ №2 سوتى اراسىندا ەڭبەك داۋلارى مەن جاريا-قۇقىقتىق قاتىناستاردان تۋىنداعان داۋلاردىڭ الدىن-الۋ ماقساتىندا ءوزارا ىنتىماقتاستىق مەموراندۋمىنا قول قويعان. مەموراندۋمعا سايكەس №2 سوتىنىڭ سۋديالارى مەن كاسىپوداق وكىلدەرى بۇگىندە وبلىستىڭ كاسىپورىن ۇيىمدارىندا تۇسىندىرمە جۇمىسىن جۇرگىزۋدە.
- جالاقى ماسەلەسى – بۇگىنگى كۇنگى ەڭ وزەكتى تاقىرىپ. كاسىپوداقتار بۇل ماسەلەنى ەرەكشە نازاردا ۇستايدى. وبلىستاعى ءىرى ءوندىرىس ۇيىمدارىنىڭ ءبىرى «باتىس سۋ ارناسى» جشس كاسىپوداقتىڭ باستاماسىمەن ءار جىل سايىن 1 قاڭتاردان بارلىق جۇمىسشىلاردىڭ جالاقىسىن رەسمي قۇنسىزدانۋ دەڭگەيىنەن تومەن ەمەس دەڭگەيدە يندەكستەۋدى جۇرگىزىپ وتىر, «باتقازتەك» اق كاسىپوداقتىڭ باستاماسىمەن مامىر ايىنان باستاپ جۇمىسشىلاردىڭ جالاقىسىن رەسمي قۇنسىزدانۋ دەڭگەيىنەن 4% عا يندەكستەۋدى جۇرگىزىپ, ماۋسىم ايىنان جۇمىسشىلاردىڭ جالاقىسىن 10% ۇلعايتتى. «قاراشىعاناق پەتروليۋم وپەرەيتينگ ب.ۆ.» كومپانياسى قىزمەتكەرلەرىنىڭ جەرگىلىكتى كاسىپوداق ۇيىمى» قب ءوز تاراپىنان جۇمىس بەرۋشىگە جۇمىسشىلاردىڭ جالاقىسىن كوتەرۋ ماسەلەسى جونىندە رەسمي حات جولدادى. مەملەكەتتىك بانك مەكەمەلەرى جانە قوعامدىق قىزمەت كورسەتۋ قىزمەتكەرلەرى سالاسىندا دا ماۋسىم ايىنان مەملەكەتتىك قىزمەتكەرلەردىڭ جالاقىسى ساناتىنا قاراي 15% جانە 30% ارتتى, دەدى امانگەلدى تاسپيحوۆ بقو وڭىرلىك كوممۋنيكاتسيالار قىزمەتىنىڭ اقپارات الاڭىندا وتكەن ءباسپاسوز ءماسليحاتىندا.
«SENIM» دەنساۋلىق ساقتاۋ جۇيەسى جۇمىسكەرلەرىنىڭ سالالىق كاسىپتىك وداعى» رەسپۋبليكالىق قوعامدىق بىرلەستىگى بقو فيليالىنىڭ توراعاسى ماحامبەت قۇسايىنوۆتىڭ ايتۋىنشا, بۇگىندە قۇرامىندا 10 140 مۇشەسى بار ورتالىق اتقارعان وڭ جۇمىس جەتەرلىك. كاسىپوداق مۇشەلەرىنە ەلىمىزدەگى مانكەنت, اقجايىق, كوكتەم, مەركە, شورتاندى, سارىاعاش شيپاجايلارىنا جولداما بەرىلەدى. كاسىپوداق جارعىسىنا سايكەس, باستاپقى ۇيىم جينالعان مۇشەلىك جارنانىڭ 65% مولشەرىن وزدەرى پايدالانادى. «SENIM» كاسىپوداق قۇرامىنداعى مەديتسينالىق كوللەدج ستۋدەنتتەرىنە اي سايىنعى اتاۋلى اقى تولەنىپ كەلەدى. كاسىپوداقتىڭ 581 ستۋدەنت مۇشەسى جارنا تولەۋدەن بوساتىلعان. تۋبەركۋلەزبەن اۋىرعان جانە امبۋلاتوريالىق ەمدەلۋدە جۇرگەن مەديتسينالىق جوو مەن كوللەدج ستۋدەنتتەرىنە الەۋمەتتىك قولداۋ كورسەتۋ قاراستىرىلعان. سونداي-اق وبلىستا ءتورت جاس مامان 500 مىڭ تەڭگە كولەمىندە كوتەرمەاقى تۇرىندە ماتەريالدىق كومەك السا, ەكى جاس مامانعا تۇرعىن ءۇي قۇنىنىڭ 20%-ى مولشەرىندە ماتەريالدىق كومەك بەرىلگەن.
باتىس قازاقستان
