تۇرمە باسشىلىعى قىزمەتتەرىنەن تۇگەل كەتتى
جاسىرىن تۇسىرىلگەن بەينە كادرلاردا كولونيا قىزمەتكەرلەرى مەكەمەنىڭ سپورتزالىندا جازاسىن وتەۋشىلەردىڭ ءبىرىنىڭ قولىن قايىرىپ جاتقانى, ال كەلەسى بولمەسىندە قىزمەتتىك فورما كيگەن ءۇش قىزمەتكەر جابىلىپ ءبىر ادامنىڭ قولىن ارتىنا قايىرا بايلاپ, سپورت قۇرىلعىسىنىڭ جوعارى جاعىنا اسىپ قويعانى انىق كورىنىپ تۇر. YouTube جەلىسىنە سالىنعان بۇل ۆيدەونىڭ تۇسىندىرمەسىندە جازاسىن وتەۋشىلەردىڭ ءبىرى مەكەمە اكىمشىلىگىنىڭ زاڭسىز ءىس-ارەكەتتەرى بويىنشا پروكۋرورعا شاعىمدانعاننان كەيىن كولونيا باسشىلىعى ارىزدانۋشىنى وسىنداي جولمەن جازالاعان كەزى دەپ كورسەتىلگەن.
ءدال وسى بەينە كادرلار قوعامنىڭ ەداۋىر نارازىلىعىن تۋعىزىپ, ىشكى ىستەر مينيسترلىگى تاراپىنان قىزمەتتىك تەكسەرىستەردىڭ باستالۋىنا تۇرتكى بولىپ ەدى.
مەكەمەدە تەكسەرۋ جۇرگىزۋ ءۇشىن شۇعىل تۇردە الماتى وبلىستىق پوليتسيا دەپارتامەنتى وزىندىك قاۋىپسىزدىك باسقارماسىنىڭ جەدەل تەرگەۋ توبى اتتاندىرىلدى.
تەكسەرۋ توبى جۇمىسىنىڭ العاشقى ناتيجەلەرى بويىنشا جۋرناليستەرگە ارناپ بريفينگ وتكىزگەن ىشكى ىستەر مينيسترلىگىنىڭ رەسمي وكىلى ءنۇردىلدا وراز بۇل ماتەريالداردىڭ بارلىعى ءجىتى زەرتتەلىپ, ونىڭ ەكەۋىندە راسىمەن دە سوتتالۋشىلارعا مەكەمە قىزمەتكەرلەرىنىڭ تاراپىنان قانداي دا ءبىر كۇش قولدانىلعانى انىقتالىپ, جيناقتالعان ماتەريال وبلىستىق پروكۋراتۋراعا جولدانعانىن مالىمدەدى. رەسمي وكىل ىشكى ىستەر ءمينيسترىنىڭ تاپسىرماسى بويىنشا وسى ماسەلەنى ەگجەي-تەگجەيلى تەكسەرۋ ءۇشىن جەدەل تۇردە قىلمىستىق-اتقارۋ جۇيەسىندە ارنايى كوميسسيا قۇرىلعانىن دا حابارلادى.
– قىلمىستىق-اتقارۋ جۇيەسى كوميتەتىنەن الماتى وبلىسىنا وكىلدەر جىبەرىلدى. 29 شىلدەدە تارتىپتىك كوميسسيانىڭ ناتيجەسى بويىنشا, 14 قىزمەتكەر ءتۇرلى جاۋاپكەرشىلىككە تارتىلدى. ونىڭ ىشىندە جەتەۋى قىزمەتىنەن بوساتىلدى. لا-155/8 مەكەمەسى باسشىنىڭ ەكى ورىنباسارى جۇمىستان قۋىلدى, سونداي-اق مەكەمە باسشىسى ورنىنان بوسادى, – دەدى ن.وراز.
ال سەيسەنبى كۇنى ۇكىمەت وتىرىسىنان كەيىن جۋرناليستەر الدىنا شىققان ىشكى ىستەر ءمينيسترى ەرلان تۇرعىمباەۆ لا 155/8 تۇزەتۋ مەكەمەسىندەگى ازاپتاۋلاردى «ماسقارا جاعداي» دەپ باعالايتىنىن ايتتى.
– ازىرگە مەكەمە ىشىندە تۇسىرىلگەن 40 بەينەجازبا مەن اۋديوفايل تەكسەرىلدى. ونىڭ ەكەۋىندە سوتتالۋشىلارعا قاتىستى قيناۋ فاكتىسى بايقالادى. قالعاندارىندا تۇرمە قىزمەتكەرلەرى ءوز قىزمەتىن اسىرا پايدالانعان جانە كولونيا اكىمشىلىگىنىڭ تۇتقىنداردى ۇستاۋ رەجىمىن بۇزعان, – دەدى ە. تۇرعىمباەۆ.
نەگىزى تەرگەۋدىڭ الدىن الا قورىتىندىلارى بويىنشا اتالعان كولونيانىڭ بەس قىزمەتكەرى ۇستالعان. وقيعا بويىنشا قوزعالعان ەكى قىلمىستىق ءىستىڭ ءبىرىن – وزىندىك قاۋىپسىزدىك دەپارتامەنتى, ەكىنشىسىن – ارنايى پروكۋرورلار قوزعاعان. قىلمىستىق ءىس نەعۇرلىم وبەكتيۆتى جۇرگىزىلۋى ءۇشىن الماتى وبلىسىنىڭ پروكۋراتۋراسىنا تاپسىرىلعان.
ءمينيستردىڭ ايتۋىنشا, ۇستالعان بەس قىزمەتكەردىڭ ءبىرى – كولونيا باستىعىنىڭ ورىنباسارى.
21 قىزمەتكەر سوتتالعان
ە.تۇرعىمباەۆتىڭ ايتۋىنا قاراعاندا, جاقىندا عانا پەنيتەنتسيارلىق جۇيەمەن تىكەلەي اينالىساتىن حالىقارالىق ساراپشىلاردىڭ, ۇكىمەتتىك ەمەس ۇيىمداردىڭ قاتىسۋىمەن جۇيە جۇمىسىن جاقسارتۋ ءۇشىن فورۋم وتكىزىلگەن. مينيستر وسى ورايدا مۇنداي وقيعالاردىڭ الدىن الۋ شارالارى ۇزدىكسىز جۇرگىزىلەتىنىن دە ايتتى.
– وزگە مەكەمەلەردە زارەچنىيداعى وقيعا قايتالانباۋى ءۇشىن ۇلتتىق پرەۆەنتيۆتى مەحانيزم ۇيىمىمەن جانە ازاماتتىق قوعاممەن بىرلەسىپ, ازاپتاۋ فاكتىسى بولعان مەكەمەلەرگە تەكسەرۋ جۇرگىزەمىز, – دەدى ىشكى ىستەر ءمينيسترى.
جالپى, بۇل جاعداي بويىنشا الماتى وبلىستىق قىلمىستىق اتقارۋ جۇيەسى دەپارتامەنتىنىڭ باسشىلىعى دا جازاسىز قالعان جوق. ماسەلەن, ارنايى تەرگەۋ توبى زەردەلەگەن بەينە روليكتەردىڭ ۇزىن-ىرعاسى قىرىقتان اسىپ جىعىلادى. سوندا جابىق مەكەمەدە اتالعان روليكتەر قالاي تۇسىرىلگەن؟
قاجك توراعاسىنىڭ ءبىرىنشى ورىنباسارى تەڭىزجان جانىبەكوۆ ءوز سۇحباتىندا بيىلدىڭ وزىندە قاجك جۇيەسىندە 21 ادامنىڭ ءارتۇرلى قىلمىستىق جاۋاپكەرشىلىككە تارتىلعانىن مالىمدەدى. ولاردىڭ بارلىعىنىڭ قىلمىستارى تايعا تاڭبا باسقانداي ايقىن فاكتىلەر ارقىلى دالەلىن تاپقان.
جالپى, «حالىقارالىق تۇرمە رەفورماسى» ۇيىمىنىڭ ورتالىق ازياداعى وكىلدىگىنىڭ ديرەكتورى ازامات ءشامبيلوۆتىڭ دەرەكتەرىنە قاراعاندا, رەسمي ستاتيستيكا بويىنشا 2016-2018 جىلدار ارالىعىندا ۇستالعاندارعا قاتىگەزدىك تانىتىپ, قورلىق كورسەتكەندەرى ءۇشىن قۇقىق قورعاۋ ورگاندارىنىڭ 53 قىزمەتكەرى سوتتالعان بولسا, ولاردىڭ 13-ءى – قىلمىستىق اتقارۋ جۇيەسىنىڭ وكىلدەرى.
نەگىزىنەن, ەلىمىزدىڭ قىلمىستىق اتقارۋ جۇيەسى سوڭعى ونجىلدىقتا ىشكى ىستەر مينيسترلىگىنەن ادىلەت مينيسترلىگىنىڭ قۇزىرىنا بەرىلىپ, كەيىن پوليتسەيلەرگە قايتارىلۋى دا بۇل جۇيەنىڭ ونسىز دا سولقىلداق تۇستارىن قاقىراتىپ جىبەرگەندەي اسەر قالدىرادى. ماسەلەن, سوناۋ ءبىر جىلدارى بالقاش قالاسى مەن ماڭعىستاۋ وبلىسىنىڭ اۋماعىنداعى مەكەمەلەردەن جازاسىن وتەۋشىلەردىڭ توپتاسىپ قاشۋى بۇل سالانىڭ كەيبىر كەمشىلىكتەرىن اشىپ بەردى.
ال جازاسىن وتەۋشىلەردىڭ قۇقىقتارى «حالىقارالىق تۇرمە رەفورماسى» ۇيىمى ءتارىزدى كوپتەگەن حالىقارالىق ۇيىمداردىڭ ءجىتى باقىلاۋىندا بولاتىنى قىلمىستىق اتقارۋ جۇيەسىنىڭ جەكە قۇرامىنا جەتە تۇسىندىرىلمەسە كەرەك. ويتكەنى تۇرمەدەن تارايتىن ءاربىر داۋدىڭ, شۋلى وقيعانىڭ سوڭى ەلىمىزدىڭ حالىقارالىق بەدەلىنە تەرىس اسەرىن تيگىزەرىن الدىمەن وفيتسەرلەر ءبىلۋى ءتيىس ەدى.
سەرىك ابدىبەك,
«Egemen Qazaqstan»
