كوميسسيانىڭ قۇرامىنا مەملەكەتتىك ورگانداردىڭ, ۇلتتىق كاسىپكەرلەر پالاتاسىنىڭ, جوعارى وقۋ ورىندارى قاۋىمداستىعىنىڭ, رەكتورلار كەڭەسىنىڭ, Jas Otan جاستار قاناتىنىڭ ستۋدەنتتەر اليانسى مەن ۇكىمەتتىك ەمەس ۇيىمداردىڭ, «ADAL BILIM» جوبالىق كەڭسەسىنىڭ جانە بۇقارالىق اقپارات قۇرالدارىنىڭ وكىلدەرى, اتالعان مينيسترلىكتىڭ قىزمەتكەرلەرى ەنگەن. كوميسسيا وتىرىسىندا ەلىمىزدەگى جوعارى وقۋ ورىندارىنا قابىلداۋ بويىنشا ۇلكەن دايىندىق جۇمىسىنىڭ قورىتىندىسى شىعارىلماق.
بيىل ءبىلىم بەرۋ گرانتتارى ءبىلىم بەرۋ باعدارلامالارى توپتارى بويىنشا تاعايىندالادى. گرانت يەگەرى جوو-عا قابىلداۋ كەزىندە ودان ءارى قاراي وقۋ ءۇشىن ناقتى ءبىلىم بەرۋ باعدارلاماسىن تاڭدايدى.
ەسكە سالساق, 2019-2020 وقۋ جىلىنا 53 785 گرانت ءبولىندى. ۆەدومستۆونىڭ مالىمەتىنشە, مەملەكەتتىك تاپسىرىس كولەمىنىڭ 47%-دان استامى ينجەنەرلىك, وڭدەۋ جانە قۇرىلىس, IT-تەحنولوگيالار سالاسىنا, 8276 گرانت پەداگوگيكالىق عىلىمدارعا, 4088 گرانت جاراتىلىستانۋ عىلىمدارى, ماتەماتيكا جانە ستاتيستيكا, 2200 گرانت قىزمەت كورسەتۋ, 1615 گرانت ونەر جانە گۋمانيتارلىق عىلىمدارعا, 2435 گرانت اۋىلشارۋاشىلىق عىلىمدار جانە ۆەتەريناريا, 2183 گرانت الەۋمەتتىك عىلىمدار, بيزنەس جانە ەكونوميكا سالالارىنا بەرىلگەن.
ال كوللەدج بىتىرۋشىلەر 3040 گرانتقا تالاسپاق. ولار قىسقارتىلعان فورمادا ءوز ماماندىقتارى بويىنشا جوعارى ءبىلىم الادى. بيىلعى ەرەكشەلىك بويىنشا كوللەدج تۇلەكتەرى بۇرىنعىداي 4 پاننەن كەشەندى تەستىلەۋ ەمەس, 2 بەيىندى پاننەن عانا سىناق تاپسىردى. جەكەلەگەن كاتەگوريالار ءۇشىن كۆوتالار قاراستىرىلعان (جەتىم بالالار, مۇگەدەكتەر, اۋىل جاستارى, قازاق دياسپوراسى جانە ت.ب.).
تاعى ءبىر اتاپ وتەرلىك جايت, «ماڭگىلىك ەل جاستارى – يندۋسترياعا!» جوباسى اياسىندا اۋىل جاستارى ءۇشىن 5109 گرانت ءبولىندى.
ءبىلىم بەرۋ گرانتتارىن تاعايىنداۋ كونكۋرسىنا 64 452 ادام قاتىسىپ جاتىر, ولاردىڭ 52 337-ءسى قازاق ءتىلى بولىمىنە, 11 757-ءسى ورىس بولىمىنە, 87-ءسى اعىلشىن ءتىلى بولىمىنە ءتۇسۋدى قالايدى.
كونكۋرسقا قاتىسۋشىلار ىشىندە 5 824 «التىن بەلگى» يەگەرى, جالپى ءبىلىم بەرۋ پاندەرىنەن حالىقارالىق جانە رەسپۋبليكالىق وليمپيادالاردىڭ 224 جەڭىمپازى, جالپى ءبىلىم بەرۋ پاندەرىنەن حالىقارالىق جانە رەسپۋبليكالىق عىلىمي جارىستاردىڭ 128 جەڭىمپازى, رەسپۋبليكالىق جانە حالىقارالىق سپورتتىق سايىستاردىڭ 336 جۇلدەگەرى بار. ولار تەك ۇبت بالدارى تەڭ بولعان جاعدايدا عانا ارتىقشىلىققا يە بولادى.
كوميسسيا جۇمىسىنىڭ قورىتىندىسى بويىنشا ءبىلىم بەرۋ گرانتتارىن تاعايىنداۋ ناتيجەلەرى جىلداعىداي «Egemen Qazaqstan», «كازاحستانسكايا پراۆدا» گازەتتەرىنە جاريالانادى.
ايتا كەتەيىك, كوپ بالالى وتباسىلاردان شىققان تالاپكەرلەر مەن اتاۋلى الەۋمەتتىك كومەك الۋشىلار ءۇشىن قوسىمشا 5 مىڭ گرانت نەگىزگى كونكۋرستان كەيىن بەرىلمەك. ال جەرگىلىكتى اتقارۋشى ورگانداردىڭ گرانتىنا وتىنىشتەردى قابىلداۋ 5-10 تامىز ارالىعىندا وتەدى. ءبىلىم گرانتتارىن تاعايىنداۋ 25 تامىزعا دەيىن جۇرگىزىلەدى.
