قانىش نۇرتازينوۆ قاراعاندى وبلىسى ۇلىتاۋ اۋدانى قوسكول اۋىلىندا تۋىپ-وسكەن. اسكەردە وتان الدىنداعى بورىشىن وتەگەن سوڭ تۋعان اۋىلىنا ورالادى. 2012 جىلى ول قوسكول اۋىلىندا ۋچاسكەلىك ينسپەكتور بولىپ قىزمەت ەتتى. 2016 جىلدان بەرى «وحوتزووپروم» ينسپەكتورى بولىپ, ۆاحتالىق ادىسپەن جۇمىس ىستەگەن.
جۇبايى سايلاۋكۇل اۋىلدىق كىتاپحانادا جۇمىس ىستەيدى. مارقۇمنىڭ سوڭىندا 5 بالاسى قالدى, ۇلكەن قىزى - 20 جاستا, ال كەنجەسى - 3 جاستا. قوسكول اۋىلىندا قايتىس بولعان ينسپەكتوردىڭ اعاسى تۇرادى, بۇعان قوسا ونىڭ ءىنىسى جانە ەكى قارىنداسى بار. مارقۇمنىڭ قارت اناسى كەڭگىر اۋىلىندا تۇرادى.
«قوسكول اۋىلىنىڭ حالقى قانىش نۇرتازينوۆتىڭ قايتىس بولعانىن ەستىگەندە قاتتى قايعىردى. سەبەبى ونى ءبارى وتە جاقسى كورەتىن جانە قۇرمەتتەيتىن. ول مەيىرىمدى, جاۋاپتى ادام ەدى. كومەك سۇراپ كەلگەندەرگە ءاردايىم قول ۇشىن سوزۋعا دايىن بولاتىن», دەيدى قوسكول اۋىلىنىڭ اكىمى دوسەت ۋاتاەۆ.
اۋىل تۇرعىندارى مارقۇمنىڭ وتباسىنا جەرلەۋگە قاجەتتى كومەكتى كورسەتۋدە.
«ءبىزدىڭ اۋىل وتە كىشكەنتاي, بىراق سوعان قاراماستان اۋىلدىڭ ءاربىر تۇرعىنى ءوز ۇلەسىن قوسىپ, جەرلەۋدى ۇيىمداستىرۋعا كومەكتەسىپ جاتىر», دەدى اۋىلدىق وكرۋگ باسشىسى.
ازىرگە مارقۇمنىڭ دەنەسى تۋعان اۋىلىنا جەتكىزىلمەگەن. الدىن الا مالىمەت بويىنشا, ءمايىت 25 شىلدەدە اكەلىنەدى. ال 26 شىلدە, جۇما كۇنى جەزقازعان قالاسىندا مارقۇمنىڭ جانازاسىن شىعارۋ ءراسىمى وتەدى. قانىش نۇرتازينوۆتى تۋىستارى قوسكول اۋىلىندا جەرلەمەك.
ايتا كەتەيىك, وسىعان دەيىن حابارلاعانىمىزداي, 23 شىلدەدە شامامەن ساعات 11.00-دە «وحوتزووپروم «ءوب» رمقك ورتالىق وڭىرلىك فيليالىنىڭ ينسپەكتورلارى اقمولا وبلىسى جارقايىڭ اۋدانىندا كيىك اتقانداردى انىقتايدى. براكونەرلەر ىزىنە تۇسكەن ەكى ينسپەكتورعا قارسى وق اتادى, سالدارىنان 1976 جىلعى ينسپەكتور كوز جۇمدى, ال, ونىڭ 1975 جىلعى ارىپتەسى جارالانىپ, جارقايىڭ اۋداندىق اۋرۋحاناسىنا جاتقىزىلعان ەدى.
وسىعان وراي, ارنايى جەدەل-تەرگەۋ توبى قۇرىلىپ, كۇدىكتىلەردى ۇستاۋ بويىنشا كەشەندى شارالاردى قولعا الدى. ارتىنشا بۇل ءىستى ىشكى ىستەر ءمينيسترى مەن اقمولا وبلىستىق پد باسشىسى باقىلاۋىنا الدى.
سونىمەن قاتار, اتالعان وقيعاعا بايلانىستى قر قك 99-بابىنىڭ 1-بولىگى بويىنشا قىلمىستىق ءىس قوزعالدى. جەدەل ىزدەستىرۋ بارىسىندا كۇدىكتىلەر - ارقالىق قالاسىنىڭ 45 جاستاعى تۇرعىنى مەن ونىڭ 20 جاستاعى بالاسى ۇستالدى.
