ونىڭ ىشىندە 50 دەرەكتە, قۇرىقتالعان تۇلعالار ەسىرتكى ساۋداسىمەن اينالىسقانى ءمالىم بولدى. ءتارتىپ ساقشىلارى, اسىرەسە سينتەتيكالىق ەسىرتكى زاتتارىنىڭ تارالۋىنا توقتاۋ بولماي تۇرعانىن ايتادى. ماسەلەن, اعىمداعى جىلى زاڭسىز بيزنەستى كاسىپ ەتكەن قىلمىستىق توپتىڭ ءىسى ءاشكەرەلەندى. انىقتالعانداي, ۇستالعاندار ساۋدالاعان ءونىمنىڭ كىرىسىن Qiwi اميانعا اۋدارتىپ وتىرعان.
– ارنايى وپەراتسيا قازاقستان بويىنشا جۇرگىزىلدى. قىلمىسكەرلەردىڭ سىبايلاستارى شىمكەنت, الماتى جانە قاراعاندىدا قولعا ءتۇستى. شۇعىل وپەراتسيا بارىسىندا مىڭنان اسا پسيحوبەلسەندى زاتتار, سونداي-اق تاعى 200 گرامم مولشەرىندە قاۋىپتى ءدارى تاركىلەندى. بيىلعى جارتىجىلدىقتا استانادا ەسىرتكىنى ساقتاۋ مەن پايدالانۋعا قاتىستى 209 فاكتى انىقتالدى. دەمەك, بۇل كۇن سايىن ءبىر ادامنىڭ قىلمىستىق جاۋاپكەرشىلىككە تارتىلاتىنىن بىلدىرەدى. پسيحوبەلسەندى زاتتاردى پايدالانۋ بويىنشا 8 دەرەك تىركەلسە, ەسىرتكىنى ساقتاۋ مەن وتكىزۋگە بايلانىستى 136 ءىس اشكەرەلەندى, – دەيدى سەرگەي يليانىح.
سول سەكىلدى قۇقىق قورعاۋشىلار ينتەرنەت رەسۋرستارىن ۇدايى باقىلاۋدا ۇستاپ وتىرعاندارىن جەتكىزدى. ارنايى مونيتورينگتىڭ ناتيجەسىندە 2018 جىلدان باستاپ بۇگىنگە دەيىن ەسىرتكى زاتتارىن جارنامالاپ ءارى ونىڭ ساۋداسىن قىزدىرعان سايتتاردىڭ جۇمىسى توقتاتىلعان ەكەن.
– بىلتىر قىركۇيەك ايىنان باستاپ وسى ۋاقىتقا دەيىن 1200-دەن اسا ينتەرنەت سايتتىڭ ەسىرتكى بيزنەسىمەن اينالىسقانىن انىقتادىق. ءتيىستى مالىمەت اقپارات جانە قوعامدىق دامۋ مينيسترلىگىنە جولداندى. عالامتوردا سايت اشۋ اسا قيىنعا سوقپايدى. بۇعان قوسا وسىعان قاتىستى الاياقتىق ارەكەتتەردى دە جوققا شىعارمايمىز. قىلمىسكەر ەسىرتكىگە تاۋەلدى ازاماتتىڭ جاعدايىن پايدالانىپ, اقشانى ينتەرنەت-بانكينگكە اۋدارتقىزىپ, كليەنتتەرىن سان سوقتىرۋى دا مۇمكىن, – دەيدى قالالىق ءىىد ەسىرتكى بيزنەسىنە قارسى كۇرەس ءبولىمىنىڭ باسشىسى.
دەسە دە ساراپشىلار ەلدە قاۋىپتى زاتقا بايلانعانداردىڭ قاراسى بىرتىندەپ ازايعانىن العا تارتتى. ناركولوگ دارىگەر توقتار قويشىبەكوۆ, قازىر ەسىرتكىگە ءتاۋەلدى قازاقستاندىقتاردىڭ ۇزىن سانى 20 مىڭنىڭ, ال الكوگولدى ىشىمدىكتەن قۇتىلا الماي ءجۇرگەندەر 100 مىڭنىڭ اينالاسىندا ەكەنىن اتاپ ءوتتى.
