كەشە وسكەمەندەگى «ۆوستوك» ستاديونىندا وتكەن مەتاللۋرگتەر كۇنىنە ارنالعان مەرەكەلىك شارا بارىسىندا «ىزگى جۇرەك» سىيلىعىنىڭ قورىتىندىسى شىعارىلدى. بۇل جولعى سىيلىق (500 مىڭ تەڭگەنىڭ سەرتيفيكاتى مەن ەستەلىك ستاتۋەتكا) ريددەرلىك 8 سىنىپ وقۋشىسى ۆياچەسلاۆ, وسكەمەندىك پوليتسيا اسقار قۇلجىنوۆ پەن وبلىس ورتالىعىنىڭ تاعى ءبىر تۇرعىنى مەرۋەرت تەمىرباەۆاعا تاپسىرىلدى. ۆياچەسلاۆ بيىلعى قىستا جالعىز ءوزى ءورت سوندىرۋشىلەر كەلگەنشە ءۇيىن ءورت شالعان كورشىلەرىن سىرتقا شىعارۋعا كومەكتەسكەن بولاتىن. «بالام ۇيگە تەلەديدار مەن جيھازدار العىسى كەلەدى. قالعان اقشاعا جاڭا وقۋ جىلىنا ءوزى مەن ىنىسىنە قاجەتتى زاتتاردى الامىن دەپ وتىر» دەيدى اناسى يرينا گولوۆا.
ال وسكەمەندىك ينسپەكتور اسقار قۇلجىنوۆ 5 مامىردا كرىلوۆ كوشەسى ماڭىنداعى ءۇلبى وزەنى ۇستىندەگى كوپىردەن سەكىرگەن ايەلدىڭ سوڭىنان ءوزى دە سۋعا قارعىپ, ونى جاعاعا الىپ شىعىپ, جانىن امان الىپ قالعان ەدى. مەرۋەرت تەمىرباەۆا ناۋرىز ايىنىڭ باسىندا كورشى ءۇي ءتىلسىز جاۋ قاماعىندا قالعاندا اۋەلى 5 جاستاعى بالانى, ارتىنان 30 جاستاعى ايەلدى سىرتقا الىپ شىققان ەدى. «وسى سىيلىقتى تاعايىنداعان «قازتسينك» كومپانياسىنا العىسىمىز شەكسىز. بۇل قاراجاتتى ءۇش جىلدان بەرى قۇرىلىسى اياقتالماي جاتقان ۇيىمە جۇمساماق نيەتتەمىن» دەيدى ول.
سونىمەن قاتار «قازتسينك» جشس-ءىنىڭ ارنايى ماراپاتى سۋعا باتىپ بارا جاتقان 4 جاستاعى بۇلدىرشىنگە كومەكتەسكەن سەمەيلىك 8 سىنىپ وقۋشىسى ۆيكتور نوۆوسەلوۆكە تاپسىرىلدى. «بۇل ازاماتتار كەزدەيسوق جاعدايدا, ويلاماعان جەردەن ادامدارعا قول ۇشىن سوزعان بۇگىنگى كۇننىڭ باتىرلارى. اسىرەسە ءوز باسىن قاتەرگە تىككەن بالالاردىڭ قايسار ارەكەتى ءبىزدى تاڭعالدىردى. «قازتسينك» «ىزگى جۇرەك» سىيلىعىن بىلتىر العاش رەت تاعايىنداعان بولاتىن. وسى باعىتتاعى جۇمىستارىمىزدى الداعى ۋاقىتتا دا جالعاستىرامىز» دەيدى «قازتسينك» جشس اكىمشىلىك ماسەلەلەر جونىندەگى اتقارۋشى ديرەكتورى اندرەي لازارەۆ.
وسكەمەن
