كۇندەلىكتى ومىردە كوشەدەگى بۇزاقىلاردى قۇرىقتاپ, ۇرىنى اۋىزدىقتاپ, توبەلەسكەندى تەزگە سالىپ, جوعالعاندى ىزدەپ, ءزابىر كورگەندى جاقتاپ, ادامداردى قىزىل جالىن ءورت اراسىنان الىپ شىعىپ, نەبىر قاندىقول قىلمىسكەرلەرمەن بەتپە-بەت كەلىپ, سان-ساپات قاۋىپتى ىستەردىڭ اراسىندا جۇرگەن ولاردىڭ ءاربىر ساعاتى قاتەرگە تولى.
قىزمەت بابىندا قىلمىسكەرلەردى ۇستاۋ نەمەسە قيىن جاعدايعا تاپ بولعان تۇرعىنداردى قۇتقارۋ كەزىندە قازا بولعان پوليتسەيلەردىڭ اجالىن جوعارىدا ايتىلعانداي «قىزمەت بابىندا» دەگەن تىركەستىڭ اياسىنا سىيعىزىپ, قينالا وتىرىپ ءوزىنىڭ مىندەتتى جۇمىسىن اتقارۋ كەزىندە قازا تاپتى دەپ جۇبانۋعا تۋرا كەلەدى.
ال پوليتسيا بىرەۋ ءۇشىن ءومىرىن قيۋعا مىندەتتى مە؟..
وتكەن جىلى تەڭىزدىڭ اساۋ تولقىندارى اقكوبىك بولىپ جاعاعا ۇرىپ, الىپ قازان بۇرق-سارق قايناعانداي بولعان كۇنى جاعالاۋعا جەتە الماي سۋعا ءبىر باتىپ-ءبىر شىعىپ جۇرگەن ايەل جانۇشىرا كومەك سۇراي ايقايلادى. دەمالۋشىلار كومەك بەرگىسى كەلگەنمەن, الىپ تولقىنداردىڭ ءوز ومىرلەرىنە قاۋىپ ءتوندىرەتىنىن سەزىپ, ىركىلىپ قالدى. وسى ساتتە كوپتىڭ نازارى پوليتسەي فورماسىنداعى ەكى-ءۇش جىگىتكە اۋدى. بۇل – ولار ءۇشىن سىن ساعات ەدى. شەشىنىپ جاعاعا بارعانىمەن, ولار دا تاۋەكەل ەتە المادى. جاندارمەن بەلبەۋلەرىن جالعاپ, ايەلگە لاقتىرۋدىڭ قامىنا كىرىستى. بۇدان دا ەشتەڭە شىقپادى, ويتكەنى ايەل تولقىنمەن جاقىنداي تۇسە الىستاپ, قاقپاقىل كۇيگە ءتۇستى. ال جاعالاۋداعى وشارىلعان حالىق تەك پوليتسەيلەرگە ءۇمىت ەتىپ, اجال اۋزىنداعى ايەلدى قۇتقارۋ سولاردىڭ ءمىندەتى دەپ قازديا سىرەسىپ تۇر. «كومەكتەسپەدىڭدەر! قورقاقتار! نەگە سۋعا سەكىرمەيسىڭدەر!» دەپ كىنالاي داۋىستاپ جاتقاندار دا جوق ەمەس. پوليتسەي دە ادام, ول – قوعامدىق ءتارتىپتى قامتاماسىز ەتۋشى, بىراق سۇڭگۋىر ەمەس. ونىڭ دا ءومىرى قىمبات, ءتىرى قالمايتىنىن ءبىلىپ تۇرىپ جانكەشتىلىكپەن اجال اۋزىنا ءوزىن لاقتىرۋعا وزگەلەر سىندى ولاردىڭ دا تاۋەكەل ەتە المايتىنىن تۇسىنۋگە بولادى. مۇمكىن, سۋدا جۇزە المايتىن شىعار... ءتىپتى سۋ تۇبىنە ءسۇڭگۋگە ماماندانعان, ارنايى قۇرىلعىلارمەن جابدىقتالعان سۇڭگۋىرلەردىڭ ءوزى رۇقسات ەتىلمەيتىن ساتتەردە تولقىن قۇشاعىنا ەنىپ كەتۋدىڭ قاۋىپتى ەكەنىن ايتىپ, داۋىل ءىشىن تارتقان ءساتتى كۇتەدى. «قىرىق جىل قىرعىن بولسا دا اجالدى ولەدى» دەگەندەي, جانۇشىرعان ايەلدى تاۋ-تاۋ تولقىندار اقىرى جاعالاۋعا الىپ كەلدى, وسى ءساتتى اڭدىپ تۇرعان پوليتسەيلەر بەلبەۋلەرىن لاقتىرىپ, ءبىرىمەن ءبىرى تىركەسە امالداپ, قولىنان سۇيرەپ الىپ شىقتى. بىراق ولارعا قاتىستى بىردە-ءبىر جاقسى ءسوز ايتىلعان جوق – وڭكەي بوقتاۋ مەن داتتاۋ...
بيىل اتىراۋ قالاسىندا كوپىردەن سەكىرگەن بويجەتكەندى قۇتقارامىن دەپ, بار قىزىعى الدىنداعى ورىمدەي سەرجانتتىڭ وپات بولعانى بار. وتباسىنىڭ جالعىز اسىراۋشىسى, ەكى ايدان سوڭ وتباسىن قۇرىپ, تۋىستارىن قۋانتامىن دەپ جۇرگەن سوقتالداي جىگىت ويلاماعان جەردەن كوز جۇمدى. وكىنىشتى-اق.
ەلىمىزدە ءسۋيتسيدتىڭ الدىن العان پوليتسەيلەرگە قاتىستى مىسالدار جەتكىلىكتى. الدىن العان جاقسى, ال ءوز ومىرىنە قاۋىپ ءتوندىرىپ كوزسىز ارەكەتتەرگە بارۋ – پوليتسەي ءۇشىن مىندەت ەمەس جانە سول ءۇشىن ولاردى كىنالاۋدىڭ قاجەتى جوق.
ماڭعىستاۋ وبلىسى
