وتكەن قىس ايلارىندا پاتەرلەرى مەن باسپانالارى «كوگىلدىر وتىنعا» قوسىلماعان وسىنداي ساناتتاعى وتباسىلارعا كومىر كىرگىزىپ بەردى. سونداي-اق وتكەن جىلى «شاڭىراق» قورى 210 وقۋشىعا مەكتەپكە قاجەتتى قۇرال-جابدىقتار الىپ بەرگەن ەدى. بۇگىندە «شاڭىراقتىقتار» وسى ءداستۇردى ودان ءارى جالعاستىرۋدى كوزدەپ, الداعى «مەكتەپكە جول» اكتسياسىنا ازىرلىكتەر جۇرگىزۋدە. قور نەگىزىنەن جاقسىلىق پەن قايىرىمدىلىق جاساۋعا بەيىم تۇراتىن, جۇرەگىنىڭ جىلۋى مول ازاماتتاردىڭ دەمەۋى مەن قولداۋىنا ارقا سۇيەيدى. ءوز كەزەگىندە ولاردىڭ «شاڭىراقتىڭ» عالامتورداعى جەكە سايتىنا ءوز ۇسىنىستارىن ءبىلدىرىپ, كومەك قولدارىن سوزۋى دا پاراساتتىلىق پەن قامقورلىقتىڭ كورىنىسىندەي اسەر قالدىرادى.
بيىلعى جاز كەزىندە قور جاناشىرلارى اقتوبە قالاسى ماڭايىندا ۇيىمداستىرىلعان ۇزدىك جازعى دەمالىس لاگەرلەرىنىڭ ءبىرى «شۇعىلادا» تىنىعۋى ءۇشىن كوپ بالالى جانە از قامتىلعان وتباسىلاردىڭ بالالارىنا تەگىن جولداما الىپ بەردى. مۇندا ولار ەكى توپقا ءبولىنىپ, 12 كۇن بويى جوعارى دەڭگەيدەگى ساۋىقتىرۋ شارالارىنا قاتىسپاق. ءار جەتكىنشەك تاۋلىگىنە 5 مەزگىل تەگىن, ءنارلى تاماقپەن قامتىلماق. وسى ارادا «شاڭىراق» قورى ءار بالاعا لاگەر قۇنى ءۇشىن 55 مىڭ تەڭگە تولەيتىنىن ايتا كەتكەن ءجون.
اتا-انالار «شاڭىراقتىڭ» ءوز بالالارىنا تيگىزگەن شاپاعاتى مەن كومەگىنە ءدان ريزا.
اقتوبە
