جول قاۋىپسىزدىگىن قامتاماسىز ەتۋ ماسەلەسى تاقىرىبىندا وتكەن ءباسپاسوز جيىنىنا ءىىم اكىمشىلىك پوليتسيا كوميتەتى توراعاسىنىڭ ورىنباسارى الىبەك كەڭىسباەۆ پەن ءىىم پوليتسيا اعا ينسپەكتورى اقتوتى بورانوۆا قاتىستى.
الدىمەن الىبەك كەڭىسباەۆ ءسوز الىپ, 2019 جىلدىڭ التى ايىندا 7 093 جول-كولىك وقيعالارى تىركەلىپ, 850 ادام قازا تاپقانىن, 9 425 ادام جاراقاتتانعانىن ايتتى. بۇل كورسەتكىش وتكەن جىلدىڭ سايكەس كەزەڭىمەن سالىستىرعاندا 5%-عا ارتقان. ىشكى ىستەر مينيسترلىگى جول ۇستىندەگى وقىس جاعدايلاردىڭ الدىن الۋ ماقساتىندا جۇيەلى تۇردە ءىس-شارالار كەشەنىن جۇزەگە اسىرىپ جاتىر ەكەن. ەڭ باستىسى, جولداردا باقىلاۋ كۇشەيتىلگەن. جىل باسىنان بەرى پوليتسيا قىزمەتكەرلەرى جول ەرەجەسىنىڭ بۇزىلۋىنا قاتىستى 2,8 ملن فاكتىنى تىركەپ, ونىڭ ىشىندە 103,5 مىڭ جاياۋ ادام اكىمشىلىك جاۋاپقا تارتىلعان. سوت 17,6 مىڭ ادامدى جۇرگىزۋشى قۇقىنان ايىرىپ, 1 742 ادامدى اكىمشىلىك قاماۋعا الۋ تۋرالى شەشىم شىعارعان.
«3 شىلدە كۇنى وتكىزىلگەن ءدوڭگەلەك ۇستەلدە اۆتوكولىكتەردى ۋاقىتشا تىركەۋ ماسەلەسى قاراستىرىلدى. شەتەلدەن كەلگەن اۆتوكولىكتەردى ۋاقىتشا تىركەۋ ونلاين تۇردە 24 ساعاتتا تەگىن جۇرگىزىلەدى. وسى ماسەلەلەر وڭ شەشىمىن تاپسا, بۇل باعىتتاعى جۇمىستاردى ودان ءارى جالعاستىرامىز. قازىرگى تاڭدا رەسپۋبليكا كولەمىندە ەشقانداي مەملەكەتتىك ورگاندا شەتەلدىك اۆتوكولىكتەردى ايدايتىن جۇرگىزۋشىلەر جونىندە تولىق مالىمەتتەر مەن ناقتى دەرەكتەر جوق. سوندىقتان ۋاقىتشا تىركەۋ تەك جولداعى قاۋىپسىزدىكتى ەمەس, جالپى پوليتسيا قىزمەتكەرلەرىنىڭ قوعامدىق قاۋىپسىزدىكتى قامتاماسىز ەتۋگە باعىتتالعان جۇمىستاردى اتقارۋعا سەپتىگىن تيگىزەدى دەپ سەنەمىز», دەدى اقتوتى بورانوۆا.
سونىمەن قاتار جول قاۋىپسىزدىگىن كۇشەيتۋدىڭ ءبىر امالى رەتىندە تاسجولداردا, رەسپۋبليكالىق ماڭىزى بار جولداردا ورتاشا جىلدامدىقتى ەسەپتەۋ تۋرالى ۇسىنىس قاراستىرىلىپ جاتىر. ءىىم وكىلدەرى بۇل باستامانىڭ قالاي ىسكە اسىرىلاتىنىن دا ءتۇسىندىردى. ماسەلەن, ورتاشا جىلدامدىقتى بەلگىلەۋ ءۇشىن اۆتوكولىك ا نۇكتەسىنەن شىققان كەزدە ونىڭ مەملەكەتتىك ءنومىرى, ۋاقىتى تىركەلەدى. ودان سوڭ ب نۇكتەسىنە دەيىنگى جول ۇزاقتىعى ونىڭ ۋاقىتىنا بولىنەدى. ەگەر اۆتوكولىك بەلگىلەنگەن جىلدامدىقتى اسىراتىن بولسا نەمەسە شامالانعان ۋاقىتتان ەرتە كەلەتىن بولسا, جۇيە اۆتوماتتى تۇردە ونىڭ جىلدامدىقتى اسىرىپ باسقارعانىن انىقتاپ بەرەدى. بۇل ۇسىنىس ماقۇلداناتىن بولسا, 592-باپتىڭ بولىكتەرىنە ءوزگەرىستەر ەنگىزىلىپ, ورتاشا جىلدامدىقتى اسىرعاندار اكىمشىلىك جاۋاپكەرشىلىكككە تارتىلادى.
