قازاقستان • 17 شىلدە، 2019

تيىمدىلىكتى ارتتىراتىن قۇجات

قازاقستان حالقى اسسامبلەياسىنىڭ عىلىمي-ساراپشىلىق كەڭەسى مەن مادەنيەت جانە سپورت مينيسترلىگى «قولجازبالار جانە سيرەك كىتاپتار ۇلتتىق ورتالىعى» رمم اراسىندا ىنتىماقتاستىق تۋرالى مەموراندۋمعا قول قويىلدى.

جولدىباي بازار

شاراعا قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى جانسەيىت تۇيمەباەۆ، مادەنيەت جانە سپورت ۆيتسە-ءمينيسترى ەرلان قوجاعاپانوۆ، قحا عىلىمي-ساراپشىلىق كەڭەسى مۇشەلەرى، قوعام قايراتكەرلەرى، عالىمدار، ەتنومادەني بىرلەستىكتەر مەن جاستار ۇيىمدارىنىڭ وكىلدەرى قاتىستى.

«بۇگىن ءبىز قازاقستان حالقى اسسامبلەياسىنىڭ عىلىمي-ساراپشىلىق كەڭەسى مەن قازاقستان رەسپۋبليكاسى مادەنيەت جانە سپورت مينيسترلىگىنىڭ «قولجازبالار جانە سيرەك كەزدەسەتىن كىتاپتار ۇلتتىق ورتالىعى» اراسىنداعى ىنتىماقتاستىق تۋرالى مەموراندۋمعا قول قويىلۋىنا ارنالعان ماڭىزدى ءىس-شارانىڭ كۋاسى بولىپ وتىرمىز. بۇل تاريحي ءسات قوعامدىق كەلىسىم مەن جالپىۇلتتىق حالىق بىرلىگىن نىعايتۋداعى قازاقستاننىڭ عىلىمي-ساراپتاما قاۋىمداستىعىنىڭ جۇمىستارىنا جاڭا بەلەستەر مەن پەرسپەكتيۆالار اشاتىندىعى ءسوزسىز»، دەدى جانسەيىت تۇيمەباەۆ.

ىنتىماقتاستىق تۋرالى بۇل قۇجات ارقىلى قازاقستان حالقى اسسامبلەياسى عىلىمي-ساراپشىلىق كەڭەسىنىڭ ءتورايىمى ايگۇل سادۋاقاسوۆا مەن مادەنيەت جانە سپورت مينيسترلىگىنىڭ «قولجازبالار جانە سيرەك كىتاپتار ۇلتتىق ورتالىعى» رمم ديرەكتورى جاندوس بولدىقوۆ جوعارى ءبىلىم، عىلىم مەن مادەنيەت اياسىنداعى تىكەلەي جانە ءوزارا ءتيىمدى ىنتىماقتاستىقتى ورناتۋ، ۇلتتىڭ مادەني جانە جازبا مۇراسىن ساقتاۋ سالاسىندا كەلىسىمگە كەلدى.

مۇنداعى ماقسات – ەكى جاقتىڭ مۇمكىندىكتەرى مەن عىلىمي-زەرتتەۋ قىزمەتتەرىن ءتيىمدى پايدالانۋ، مادەني مۇرانى ساقتاۋ، ەلدىڭ تاريحىنا، مادەنيەتىنە جانە تۇرمىس جاعدايىنا قاتىستى قولجازبالار مەن سيرەك كىتاپتاردىڭ قۇندىلىعىن انىقتاۋ، اۋدارۋ، زەرتتەۋ جانە عىلىمي اينالىمعا ەنگىزۋ، كىتاپ جادىگەرلەرىن قالىپقا كەلتىرۋ، ولاردى كاتالوگتاندىرۋ، تسيفرلى جۇيەگە كوشىرۋ، قولجازبالاردىڭ تسيفرلى كوشىرمەلەرىنەن ميكروفيلمدەر جاساپ، ساقتاۋ سالالارىندا عىلىمي تاجىريبە الماسۋ. سونىمەن قاتار كاتالوگتاندىرۋ، قولجازبا باسپالارى، ليتوگرافيا، بەتتىك باسپا، تسيفرلى كوشىرمەلەر مەن قولجازبالاردى قولدانۋ جانە قايتا قالپىنا كەلتىرۋ جۇمىستارىنا قاتىسۋ ماقساتىندا ماماندارمەن الماسۋ دا كوزدەلەدى. وسىعان سايكەس، كەلىسىمشارت اياسىندا ۇزاق جانە قىسقا مەرزىمدى تاعىلىمدامادان، وقۋ-وندىرىستىك جانە عىلىمي تاجىريبەدەن ءوتۋ جانە زەرتتەۋشىلەرمەن كاسىبي (وندىرىستىك، زەرتتەۋ) تاجىريبەلەر الماسۋ كوزدەلگەن. سونداي-اق ءوزارا ورتاق مۇددەنى كوزدەيتىن جانە تاريحي قۇندى بولىپ تابىلاتىن جازبا ەسكەرتكىشتەرىن ساقتاۋ جانە پايدالانۋ سالاسىندا جوعارى بىلىكتى عىلىمي كادرلار مەن مامانداردى دايارلاۋعا قول جەتكىزىلمەك.

عىلىمي ەڭبەكتەردى دايىنداۋدا جانە ولاردى باسىپ شىعارۋدا عىلىمي كەڭەس بەرۋ جانە قوس جەتەكشىلىك ەتۋ ءۇشىن، سونىڭ ىشىندە، عىلىمي كونسۋلتانتتاردى تارتۋ ارقىلى عىلىمي-پراكتيكالىق زەرتتەۋلەر جۇرگىزۋ جوسپارلانىپ وتىر. تاراپتار بىرىككەن كونفەرەنتسيالار، سەمينارلار، سيمپوزيۋمدار، دوڭگەلەك ۇستەلدەر ۇيىمداستىرىپ، باسقا دا ۇقساس عىلىمي شارالار جانە دوستاستىق ەلدەردىڭ تاريحىن زەرتتەۋ اۋماعىنداعى وزگە دە باستامالاردى جۇرگىزەدى. سونداي-اق عىلىمي ەڭبەكتەردى جاريالاۋ، ءبىلىم بەرۋ باعدارلامالارىنىڭ شەڭبەرىندە گرانتتار الۋعا ورتاق مالىمدەمەلەر دايىنداۋ، حالىقارالىق كورمەلەر مەن جارمەڭكەلەر ۇيىمداستىرۋ، بىرلەسىپ عىلىم، مادەنيەت، ت.ب. سالالارى بويىنشا كىتاپ شىعارۋعا اتسالىسۋ، كىتاپ ساقتاۋ جانە تسيفرلى كوشىرمەسىن جاساۋ، قالپىنا كەلتىرۋ سالاسى بويىنشا تاجىريبە الماسۋ ماسەلەلەرى دە قامتىلادى.