كەزدەسۋ بارىسىندا ەكى ەل اراسىنداعى ەكونوميكالىق, ساۋدا-ساتتىق ارىپتەستىكتىك بايلانىستى ارتتىرۋ جولدارى تالقىلاندى.
«سولتۇستىك قازاقستان – اگرارلى وبلىس. ەكسپورت كولەمى ۇلعايىپ كەلەدى. بيىل اۋىل شارۋاشىلىعىنا تارتىلعان سىرتقى ينۆەستيتسيا 54 پروتسەنتكە ءوستى. مايلى داقىلدار 1 ميلليون گەكتارعا جۋىق القاپقا ەگىلدى. رەسەيدىڭ التى ميلليوننان استام تۇرعىنى بار تۇمەن, قورعان جانە ومبى وبلىستارىمەن شەكارالاسامىز. ەۋروپادان قيىر شىعىسقا, ونىڭ ىشىندە قىتاي باعىتىنداعى جۇك اعىنىنىڭ 70 پروتسەنتتەيى پەتروپاۆل ارقىلى تاسىمالدانادى. اۋعانستان – وبلىس تاۋارلارى ەكسپورتتالاتىن ەلدەردىڭ ءبىرى. سوندىقتان بىزدە بۇل ەلدىڭ نارىعىنا قىزىعۋشىلىق بار», دەدى قۇمار ىرگەباي ۇلى.
فارحات مۋحامماد بۇل كەزدەسۋدىڭ اۋعانستان ءۇشىن دە ماڭىزدى ەكەنىن جەتكىزدى. ونىڭ ايتۋىنشا, قازاقستان اۋعانستانعا ارقاشان گۋمانيتارلىق كومەك كورسەتىپ, ءبىلىم بەرۋ, كاسىپكەرلىك, ساۋدا سالالارىندا قولداۋ ءبىلدىرىپ تۇرادى. وبلىستان بيداي ساتىپ الىپ, جەمىس, كوكونىس ەكسپورتتاۋعا دايىنبىز. سونداي-اق سىزدەردىڭ قولداۋلارىڭىز ارقىلى ونىمدەرىمىزدى رەسەيدىڭ سىزدەرمەن كورشىلەس ءۇش وبلىسىنا دا جەتكىزسەك دەيمىز. الداعى ۋاقىتتا الماتىدا ەكى مەملەكەتتىڭ تاۋار وندىرۋشىلەرى قاتىساتىن القالى جيىن وتەدى. بۇل شارادا ەكى ەل اراسىنداعى ىنتىماقتاستىق تۋرالى مەموراندۋمعا قول قويۋدى جوسپارلاپ وتىرمىز, دەدى ەلشى.
جيىندا اۋعانستاننىڭ الەۋمەتتىك-ەكونوميكالىق دامۋ كورسەتكىشتەرى, ينۆەستيتسيا سالۋعا بولاتىن سالالارى تۋرالى سلايد كورسەتىلدى. ەلىمىز اۋعانستانمەن ساۋدا-ساتتىق بويىنشا ء تورتىنشى ورىندا تۇر. بىلتىر ەكى ەل اراسىنداعى ءوزارا ساۋدا 520,6 ميلليون دوللاردى قۇراعان. اۋعانستان نارىعىندا بيداي, زىعىر جانە جاسىمىق جوعارى سۇرانىسقا يە. بۇل ەل جىلىنا 1,6 ميلليون توننا استىق تۇتىنادى.
بيىل ءوڭىر بويىنشا اۋعانستانعا 13 ميلليون دوللاردىڭ ونىمدەرى ساتىلعان.
«تيميريازەۆ ۇن ۇگۋ كومبيناتى» جشس-ءنىڭ باس ديرەكتورى يسا اللاحياروۆ دەلەگاتسيا مۇشەلەرىنىڭ نازارىن دايىن ونىمدەردى ساتىپ الۋعا اۋداردى.
