ايماق باسشىسى قۇمار اقساقالوۆ التى شاعىناۋدان قۇرىلىسى مەن اباتتاندىرۋ ماسەلەسىن جەتە ەسكەرۋ, شاحار اۋماعىن بەي-بەرەكەتسىز كەڭەيتە بەرگەننەن گورى جيناقى قىلۋ قاجەتتىگىن اتاپ كورسەتتى.
سوڭعى جىلدارى وبلىس ورتالىعىندا قۇرىلىس جۇمىستارى قارقىندى جۇرگىزىلىپ كەلەدى. العاشقى جارتىجىلدىققا بەكىتىلگەن مىندەت اسىرا ورىندالدى. بۇل رەتتە باس جوسپار جان-جاقتى ويلاستىرىلىپ, زامان تالابىنا جاۋاپ بەرۋى كەرەك ەكەندىگىنە الماتىدا ورنالاسقان «گرادكومپلەكس» سەرىكتەستىگىنىڭ ديرەكتورى نۇربەك اۋجانوۆ تا توقتالدى.
«تەرىسكەي تورىندەگى قالانىڭ الەۋەتى زور. ينفراقۇرىلىمىن تىڭعىلىقتى زەرتتەدىك. بوس ورىندار شاحاردىڭ سىرتىندا عانا ەمەس, ىشىندە دە از ەمەس. بەيبەرەكەت, پايداسىز تۇرعان اۋماقتاردى ءتيىمدى پايدالانا بىلگەن ءجون. مەنىڭ ويىمشا, نىساندار ءبىر-بىرىنە جاقىن ورنالاسۋى قاجەت. 600-دەن استام جەر ءۇي ءسۇرىلىپتى. بيىل بۇل باعىتتا اۋقىمدى شارۋالار اتقارىلماق ەكەن. ەكىنشىدەن, يندۋستريالدىق ايماقتى قايتا قۇرۋ كەرەكتىگىن ايتقىم كەلەدى. ياعني, بوس تۇرعان كاسىپورىنداردىڭ عيماراتتارىن سپورت زال, ويىن-ساۋىق ورتالىقتارىنا اينالدىرۋعا بولادى. سوندا تۇرعىنداردىڭ سۇرانىسى قامتاماسىز ەتىلەدى», دەدى ول.
پەتروپاۆل ء دال ەسىل جاعاسىندا ورنىققانىمەن, بىردە-ءبىر كاسىپكەر پارككە ۇلاساتىن جاعالاۋدى قولعا الماپتى. قۇمار ىرگەباي ۇلىنىڭ ايتۋىنشا, قالانىڭ اۋماعىن ۇلعايتۋ قوماقتى قارجىنى, زور شىعىندى قاجەت ەتەدى. سوندىقتان جەر ۇيلەردى ءسۇرىپ, بوساعان جەرلەردى پايدالانۋ الدەقايدا ءتيىمدى.
«ساۋلەتتىك ءستيلدى ۇستانىڭىزدار. نىسانداردى كەشەن رەتىندە تۇرعىزۋ قاجەت. بولەك-بولەك سالىپ, ءارتۇرلى بولعانى شاحار شىرايىن اشپايدى. ءبىرىنشى كەزەكتە تۇستەرى مەن ديزايندارىنا ءمان بەرىڭىزدەر. بارلىعى ۇندەستىكتە بولسىن. ايتا كەتكەن ءجون, كوممەرتسيالىق ماقساتتا عيمارات, باسپانا سالامىن دەگەن ينۆەستورلاردى قولداۋعا دايىنبىز», دەگەن اكىم بەرەكە ىقشاماۋدانىندا كوپقاباتتى باسپانالار تۇرعىزىلعانىمەن, ءالى دە ازدىق ەتەتىنىن اتاپ كورسەتتى. قازىر مۇندا 100 پاتەرلىك 6 كوپقاباتتى تۇرعىن ءۇيدىڭ جوبالىق-سمەتالىق قۇجاتتاماسى دايىندالىپ, 600 ورىندى مەكتەپ سالىنۋدا.
40 گەكتار اۋماققا سوزىلاتىن كوپاي زاماناۋي شاعىن اۋدانىنىڭ جوباسى جينالعانداردىڭ نازارىنا ۇسىنىلدى. وعان بىرقاتار تۇزەتۋلەر ەنگىزىلدى. شىعىس ىقشاماۋدانىندا كوپبەيىندى اۋرۋحانا تۇرعىزىلادى. وسى ماڭايدا مەديتسينا قىزمەتكەرلەرىنە ارناپ كوپقاباتتى باسپانا بوي كوتەرەدى.
سولتۇستىك قازاقستان وبلىسى
