ساياسات • 15 شىلدە، 2019

پارلامەنت ءماجىلىسىنىڭ دەپۋتاتتارى سولتۇستىك قازاقستان تۇرعىندارىن قابىلدادى

145 رەتكورسەتىلدى

وڭىرگە جۇمىس ساپارمەن جۇرگەن پارلامەنت ءماجىلىسىنىڭ دەپۋتاتتارى قوعامدىق قابىلداۋ ۇيىمداستىردى.

ولاردىڭ قابىلداۋىنا كەلگەن ادامدار وزدەرىن تولعاندىرعان ماسەلەلەر بويىنشا پىكىرلەستى. سولاردىڭ ءبىرى جىبەك سەيىتوۆا مەكتەپ جاسىنداعى نەمەرەلەرىنىڭ جاعدايىن ايتا كەلىپتى.  كۇيەۋ بالاسى وسىدان  بەس جىل بۇرىن قايتىس بولىپ،  ۇلكەنى  5 جاستا، كىشىسى 7 ايىندا قالىپتى. قىزىنىڭ الاتىن جالاقىسى ماردىمسىز. ونىڭ ۇستىنە مەدكوللەدجدە اقىلى تۇردە وقيدى. قولعا تيەتىن جاردەماقى 42 مىڭ تەڭگە عانا. «ەكى بىردەي مەكتەپ جاسىنداعى بالانى وقۋ قۇرالدارىمەن، كيىممەن قامتۋ وڭاي ەمەس»، دەدى مۇڭىن شاققان اجەي.

حالىق قالاۋلىلارى  «نۇر وتان» پارتياسى وتكىزەتىن «مەكتەپكە جول» اكتسياسى، باسقا دا شارالار ارقىلى كومەكتەسەتىندەرىن جەتكىزدى. «مەكتەپكە بارار سومكەسىن، قالامىن، داپتەرىن الىپ بەرەمىز. مەكتەپكە بارعاننان كەيىن ءبىلىم وشاعى تاراپىنان دا كومەك بولادى. ءوتىنىش جازىپ، قۇجاتتاردى كورسەتكەننەن كەيىن نەمەرەلەرىڭىز ارنايى تىزىمگە ەنگىزىلەدى»، دەدى  زاۋرەش امانجولوۆا.

جامبىل اۋدانىنان ات ءىزىن سالعان الەكساندر فرولوۆ ۇلى وتان سوعىسىنا قاتىسۋشىلارعا ارناپ ەسكەرتكىش تۇرعىزۋدى جوسپارلاعانىمەن، ءتىزىمدى اۋداندىق ۆوەنكومات بەكىتپەي قويىپتى.

كارىباي مۇسىرمان قۇپتارلىق باستاماعا قولداۋ كورسەتىلەتىنىن قاداپ ايتتى. ماسەلەنىڭ ءمان-جايى تولىق باياندالعان حات تۇسسە، قالعان ءىستى  دەپۋتاتتار وزدەرى تىندىراتىن بولدى. تەك ءتىزىمنىڭ انىق تا ناقتى بولۋى ءوتىنىش يەسىنە ەسكەرتىلدى.

قوعامدىق قابىلداۋعا كەلگەندەردىڭ ءبىرى  قالادا جاتاقحانا جەتىسپەيتىنىن العا تارتا كەلىپ، باسپاناسىنداعى  بوس بولمەلەردى ستۋدەنتتەرگە  جالعا بەرۋدىڭ قانشالىقتى زاڭدى ەكەنىن سۇرادى.

«ارتىق اۋماققا  ادامداردى تۇرعىزۋ ءۇشىن الدىمەن قۇجاتتاردى راسىمدەپ، زاڭداستىرىپ الۋ قاجەت. بۇل–ەۋروپا ەلدەرى مەن امەريكادا كەڭىنەن تارالعان تاجىريبە»، دەدى ماجىلىسمەندەر.

سولتۇستىك قازاقستان وبلىسى

سوڭعى جاڭالىقتار

ۇقساس جاڭالىقتار