وڭىردە العاش رەت قولعا الىنىپ وتىرعان تىڭ جوبا ەندى 5 اي بويى حالىققا قىزمەت كورسەتەتىن بولادى. باسقارما باسشىسى قارلىعاش ارالبەكوۆانىڭ ايتۋىنشا, اتالعان ەكسكۋرسيالىق اۆتوبۋستار ەڭ اۋەلى وبلىستاعى مەكتەپ وقۋشىلارىن, كوللەدج جانە جوعارى وقۋ ورىندارى ستۋدەنتتەرىن تەگىن تاسيدى. سونىمەن قاتار, ەكسكۋرسيالىق اۆتوبۋستارمەن كوپبالالى وتباسىنان شىققان بالالار مەن تۇرمىس جاعدايى تومەن وتباسىلاردان شىققان وقۋشىلار دا قامتىلادى.
ءتۇرلى ساناتتاعى تۇرعىندارعا تەگىن قىزمەت كورسەتەتىن ەكسكۋرسيالىق اۆتوبۋستار تاراز قالاسىندا نەگىزگى باعىتتار بويىنشا جۇرەدى. ال, ءار اپتانىڭ دەمالىس كۇندەرى وڭىردەگى تاريحي-مادەني ەسكەرتكىشتەرگە ەكى باعىت بويىنشا ساياحاتتار ۇيىمداستىرىلادى. تۇرعىندار ءبىرىنشى باعىت بويىنشا «كونە تاراز» كەشەنىنە, قاراحان, ايشا ءبيبى, بابادجا حاتۋن, داۋىتبەك كەسەنەلەرىنە, قالي ءجۇنىس مەشىتىنە, «تورتكۇل» كەرۋەن سارايىنا, «قازاق حاندىعىنا 550 جىل» مونۋمەنتىنە, اقىرتاس كەشەنىنە بارسا, ەكىنشى باعىت بويىنشا «كونە تاراز» مۋزەيىنە, ورتاعاسىرلىق قالي ءجۇنىس مونشاسىنا, قاراحان, داۋىتبەك, تەكتۇرماس كەسەنەلەرىنە, تورتكۇل جانە اقىرتاس كەشەندەرىنە ساياحات جاسايتىن بولادى.
جامبىل وبلىسى
