ۇكىمەت باسشىسىنىڭ ايتۋىنشا, ءوسىمنىڭ قوزعاۋشى كۇشتەرى نەگىزىنەن ونەركاسىپ, قۇرىلىس, كولىك, ساۋدا جانە اۋىل شارۋاشىلىعى سالالارى.
«وڭدەۋشى ونەركاسىپتەگى 3,4% دەڭگەيىندەگى ءوسىم نەگىزىنەن ماشينا جاساۋ, مۇناي وڭدەۋ, ءتۇستى مەتاللۋرگيا, فارماتسەۆتيكا جانە تاعى دا باسقا سالالاردىڭ ەسەبىنەن قامتاماسىز ەتىلدى», دەدى ۇكىمەت باسشىسى.
اسقار ءماميننىڭ ايتۋىنشا, تاۋ-كەن ونەركاسىبى 2,1% ءوستى, الايدا كومىر ءوندىرۋ, سىرتقى سۇرانىستىڭ ازايۋىنا بايلانىستى 5,1% تومەندەدى. مۇناي ءوندىرۋ, قاشاعان جوباسىنداعى جوندەۋ جۇمىستارىمەن بايلانىستى – 2% ازايدى. جالپى, جىل باسىنان بەرى 14 وڭىردە ونەركاسىپتىڭ ءوسۋى قامتاماسىز ەتىلگەن.
سونىمەن قاتار ۇكىمەت باسشىسى ەگىزگى كاپيتالعا ينۆەستيتسيالار 11,7% ۇلعايدى, ونىڭ ىشىندە جەكە ينۆەستيتسيالار – 13% وسكەنىن ايتتى.
«بۇل كورسەتكىشتەر قىزىلوردا, قاراعاندى جانە شىعىس قازاقستان وبلىستارىندا جوعارى. ال شىمكەنت, نۇر-سۇلتان قالالارىندا جانە ماڭعىستاۋ وبلىسىندا بۇل كورسەتكىشتەر تومەندەپ وتىر. قۇرىلىس قارقىنى قىزىلوردا, قاراعاندى جانە اتىراۋ وبلىستارىندا جوعارى. بىراق, 4 وڭىردە ءوسىم قامتاماسىز ەتىلمەگەن. بۇل - شىمكەنت, نۇر-سۇلتان قالالارى, ماڭعىستاۋ جانە سولتۇستىك قازاقستان وبلىستارى. سىرتقى ساۋدا اينالىمى 5 ايدىڭ ىشىندە 3,3 % ارتىپ, 37,2 ملرد. دوللارعا دەيىن ءوستى. مەملەكەتتىك بيۋدجەت كىرىسى وسى جىلدىڭ 6 ايىندا 4 ترلن. 379 ملرد. تەڭگەگە اتقارىلدى, بۇل جوسپاردان 148 ملرد. تەڭگەگە ارتىق. بۇل وتكەن جىلدىڭ وسىنداي كەزەڭىمەن سالىستىرعاندا 730 ملرد.تەڭگەگە نەمەسە 20 % ارتىپ وتىر. مەملەكەتتىك بيۋدجەت شىعىستارى وسى جىلعى 1 شىلدەگە دەيىن 6 ترلن. 342 ملرد.تەڭگە نەمەسە جوسپاردىڭ 99,6% قۇرادى. ينفلياتسيا دەڭگەيى جىل باسىنان بەرى 2,6%, ال جىلدىق ماندە – 5,4 % قۇرادى» دەدى ا.مامين.
سونداي-اق ول ەلدەگى ەڭبەك نارىعى تۇراقتى ەكەنىن ايتتى. «بيىلعى جىلدىڭ ءبىرىنشى جارتى جىلدا جۇمىسسىزدىق دەڭگەيى 4,8 % قۇرادى. 186 مىڭ جاڭا جۇمىس ورنى قۇرىلدى, ونىڭ 126 مىڭى – تۇراقتى» دەدى ول.
