رۋحانيات • 15 شىلدە، 2019

حات قورجىن (15.07.2019)

4707 رەتكورسەتىلدى

...ۇلگى ەتەدى

 ؛كىتاپحانا جاڭا جۇيەگە كوشتى

قازىرگى تاڭدا توقتالاتىن ماڭىزدى ماسەلەلەردىڭ ءبىرى – كىتاپحانا بازاسىندا «ەلەكتروندىق كىتاپحانا» قۇرۋ. ەلەكتروندىق كىتاپحانا – وقىرماندارعا قىزمەت كورسەتۋ بارىسىندا جان-جاقتى مۇمكىندىكتەر جيىنتىعىن قولدانۋ اياسىن كەڭەيتەدى. وقىرماندارعا كىتاپحانا قىزمەتىن كورسەتۋدىڭ ءداستۇرلى تۇرىنە قاراعاندا ەلەكتروندىق جۇيەگە نەگىزدەلگەن قىزمەت تۇرلەرىنە دەگەن قاجەتتىلىك ارتىپ وتىر. وسى قاجەتتىلىكتى ەسكەرە وتىرىپ، س.بايىشەۆ اتىنداعى وبلىستىق امبەباپ عىلىمي كىتاپحانا تولىقتاي «Web – رابيس» اقپاراتتىق جۇيەسىنە كوشتى. وسىعان وراي «Web – رابيس باعدارلاماسى: كىتاپحانالىق اۆتوماتتاندىرىلعان قىزمەت كورسەتۋ» اتتى سەمينار-ترەنينگ وتتى. شارانىڭ نەگىزگى ماقساتى – وبلىستىق، اۋداندىق جانە قالالىق كىتاپحانا قىزمەتكەرلەرىنە ادىستەمەلىك كومەك كورسەتۋ جانە وقىتۋ. سونداي-اق زامان تالابىنا ساي اۆتوماتتاندىرىلعان كىتاپحانا جۇيەسىنە ءتۇسىندىرۋ جۇمىستارىن جۇرگىزۋ جانە كىتاپحاناشى مەن وقىرمان اراسىنداعى ساۋاتتى بايلانىس ورناتۋ.

كىتاپحانا ءىسىن اۆتوماتتاندىرۋ، قاعاز تۇرىندەگى ءداستۇرلى اقپا­راتتىق قورلاردى ەلەكتروندى تۇرگە كوشىرۋ، ەلەكتروندى كاتالوگتار، بيبليوگرافيالىق دەرەك قورلار جاساقتاۋ، ينتەرنەت جەلىسىنىڭ كومەگىمەن اقپارات الماسۋ كىتاپحانالاردىڭ باستى مىندەتى. قوعامنىڭ ينتەللەكتۋالدى باسەكەگە قابىلەتتىلىگىن جەتىلدىرۋ مەن ەلىمىزدىڭ مادەني جانە اقپاراتتىق تۇتاستىعىن قامتاماسىز ەتۋدە كىتاپحانا رولىن نىعايتۋ، ءبىلىم دەڭگەيى، الەۋمەتتىك جاعدايى، تۇرعىلىقتى جەرىنە قاراماستان ءقازاقستاننىڭ اربىر ازاماتىنا الەمدىك اقپاراتتىق رەسۋرستار، دەموكراتيالىق مۇمكىندىكتەرىنە قامتاماسىز ەتۋ ماڭىزدى.

 ؛

ايبانۋ جۇماباەۆا،

 ؛س.بايىشەۆ اتىنداعى اقتوبە وبلىستىق امبەباپ

عىلىمي كىتاپحاناسىنىڭ قىزمەتكەرى

 ؛

...ۋاج ايتادى

باقۋاتتى تىرلىگىن باعالاسا...

ۇلى وتان سوعىسىمەن تۇسپا-تۇس كەلگەن بىزدىڭ بالالىق شاعىمىز قيىن كەزەڭدە ءوتتى. وتتى جىلداردىڭ جاڭعىرىعى ءالى كۇنگە دەيىن جادىمنان وشكەن ەمەس. جەتىمدىكتىڭ، جوقشىلىقتىڭ ءدامىن تاتىپ وستىك. اكەم ءابىلعازى 1942 جىلى لەنينگراد مايدانىندا قازا تا­ۋىپ، انام 25 جاسىندا جەسىر قالدى. اكەم قازا بولعاندا مەن نەبارى ءۇش جاستا ەكەنمىن. انام اجار وتتى جىلداردىڭ قاسىرەتىن تارتسا دا، ءبىزدى قاناتتىعا قاقتىرماي، تۇمسىقتىعا شوقىتتىرماي ءوسىردى. سول اياۋلى انامنىڭ اق ءسۇتىن اقتاي الدىم با دەپ كەيدە ىشتەي ويلانامىن.

سونداي قىسىلتاياڭ ۋاقىتتا مەنىڭ بىلىمىمدى جالعاستىرۋىما مۇمكىندىگىم بولماعانى راس. الايدا، بويىمدا وقۋعا دەگەن ەرەكشە قۇشتارلىق بولدى. سول داعدى بۇگىنگى كۇنگە دەيىن ساقتالىپ قالدى.

زەينەتكە شىققان سوڭ دا ەلمەن بىرگە بولىپ، قوعامدىق جۇمىستاردان شەت قالمادىم. جاستارعا ءجون سىلتەپ، ونەگە ايتۋ اعا بۋىننىڭ اسىل پارىزى ەمەس پە؟ اۋداندىق ارداگەرلەر ۇيىمىنىڭ ءتوراعاسى رەتىندە ماعان تاعى ءبىر جاۋاپتى مىندەت جۇكتەلدى. ومىردە كورگەنى كوپ، كوكەيگە تۇيگەنى مول ادامدار وسكەلەڭ ۇرپاقتى تاربيەلەۋگە ۇلەس قوسسا، نەسى ايىپ؟ ءقازىر مەن اۋداندا مەدياتور بولىپ جۇمىس ىستەيمىن. 300-دەن استام ءىستى قاراۋعا اتسالىستىم. سونىڭ تەڭ جارتىسى – ۇرلىققا قاتىستى. دەنى جاستاردىڭ قاتىسۋىمەن ورىن العان. وزەكتى ورتەيتىن وكىنىش تە وسى. نەگە بەيبىت، مولشىلىق زاماننىڭ جاستارى مۇندايعا جول بەرەدى؟ كەرىسىنشە، ءقازىر جاستار باقىتتى ءبولۋعا تيىس. وتكەن ءومىر مەن بۇگىنگى تىرلىكتى مۇلدە سالىستىرۋعا كەلمەيدى. ەڭبەك ەتۋگە قۇلشىنىسى زور ادامعا جاقسى مۇمكىندىكتەر جاسالىپ وتىر عوي. سوندىقتان وسكەلەڭ ۇرپاق باقۋاتتى تىرلىكتىڭ ءقادىرىن ءبىلىپ، ءار ءساتتى باعالاسا ەكەن دەيمىن.

 ؛

امانگەلدى ءابىلعازين،

 ؛ەڭبەك ارداگەرى

 ؛

سولتۇستىك قازاقستان وبلىسى

 ؛

...كەڭەس بەرەدى

تالپىنساڭ تالاي بەلەستى باعىندىراسىڭ

ارقاسى جاۋىر بولعان، ءوز شابان، ابدەن ارىقتاعان ات قۇدىققا ءتۇسىپ كەتىپتى. يەسى كەلىپ، ونى تارتىپ شىعارۋدىڭ اۋرەسىنىڭ تىم كوپ ەكەنىن ويلاپ، الگى اتتى سول قۇدىقتىڭ تۇبىنە تاستاپ كەتە بارىپتى. ال جولدان ارلى-بەرلى وتكەن ادامدار قۇدىققا قوقىس توگەدى ەكەن. جىلقى قاتتى ىزالانىپ، ءوزىنىڭ باقىتسىزدىعىنا نالىپتى. قىرسىق شالعاندا قايداعى ءبىر قۇدىققا ءتۇسىپ كەتىپ، ونىمەن قويماي يەسى دە ونى تاستاپ كەتتى. ەندى ولەيىن دەپ جاتسا دا تىنىشتىق جوق، ءار ءساعات، ار مينۋت سايىن ادامدار كەلىپ قوقىس توگىپ جاتىر...

بىر كۇنى ونىڭ ويىندا توسىننان وزگەرىس بولىپ، ول ءوزىنىڭ باسىنا تۇسكەن قيىنشىلىقتى وزگەرتۋ بەكىمىنە كەلىپتى. ءسويتىپ ول ار كۇنى ۇستىنەن توگىلگەن قوقىستارعا كومىلىپ قالماي، قايتا قوقىستاردى اياعىمەن تاپتاپ، استىنا جيا بەرىپتى. اقىرىندا الگى قوقىستار ونىڭ باسپالداعىنا اينالىپ، ول امان-ەسەن جەر بەتىنە شىعىپتى.

دۇنيەدە ءمىنسىز نارسە جوق. ءومىر ساعان تەك «قوقىس» سىيلاسا دا، سەن ول «قوقىستاردى» اياعىڭمەن تاپتاپ، ءومىردىڭ بيىك بەلەستەرىنە جەتۋگە تالپىنىس جاسا.

 ؛

كامشات البان

 ؛

...ريزاشىلىعىن بىلدىرەدى

مادەنيەت ءۇيى – اۋىل ماقتانىشى

اتىراۋدا وسىدان ءبىراز بۇرىن ايتۋلى مەرەكە كۇنىن تويلاۋ جاڭاتالاپ اۋىلىنداعى 200 ورىندىق مادەنيەت ءۇيىن پايدالانۋعا بەرۋدەن باستالعان بولاتىن. ەل كوپتەن كۇتكەن نىسان الەۋمەتتىك-ينفراقۇرىلىمدىق جوبالاردى جۇزەگە اسىرۋ اياسىندا سالىنعان ەدى.

جاڭا عيماراتتا اكىمشىلىك-تەحنيكالىق ورىندار، ۇلكەن اۋديتوريا، كورەرمەن زالى، گريم بولمەسى، ارتىستەر بولمەسى، كىتاپحانا، ەكىنشى قاباتتا كەڭسەلەر مەن كوركەمدىك جانە ۇيىرمەلەرگە ارنالعان شەبەرحانالار ورنالاسقان.

«تۇرعىندار بۇل كۇندى كوپتەن كۇتتى جانە بارشامىزدىڭ قۋانىشىمىزعا وراي بۇل كۇن تۋدى. 200 ورىندىق جاڭا مادەنيەت ءۇيى ەلباسىنىڭ «رۋحاني جاڭعىرۋ» ماقالاسى اياسىندا سالىندى. وسى ورايدا وبلىستاعى ءبىرقاتار الەۋمەتتىك جوبالارعا قولداۋ كورسەتىپ جۇرگەن، نىسان قۇرىلىسىن سالۋعا دەمەۋشىلىك كورسەتكەن «NCOC» كومپانيا­سىنا العىسىمىزدى بىلدىرەمىز. الداعى ۋاقىتتا دا سەرىكتەستىگىمىز جالعاسادى دەپ سەنەمىز»، دەيدى وسىعان ارنايى كەلگەن وبلىس اكىمدىگىنىڭ وكىلى.

 ؛

اباي ابىلايۇلى

 ؛

اتىراۋ وبلىسى

باننەر
سوڭعى جاڭالىقتار

سەكتوردى ساقاداي ساي قىلدى

ايماقتار • بۇگىن، 11:31

سانى مەن ساپاسى ساي

ايماقتار • بۇگىن، 09:33

اجەنىڭ ارقاسى

قوعام • بۇگىن، 08:39

ۇلاعاتتى ءومىر يەسى

ايماقتار • بۇگىن، 08:37

بىرىنشى راۋندتا-اق سۇلاتىپ سالدى

كاسىپقوي بوكس • بۇگىن، 08:36

ساڭلاقتار اتوي سالادى

قازاقستان • بۇگىن، 08:33

ادىلىم-اي، ادەكەم-اۋ!..

رۋحانيات • بۇگىن، 08:12

ادىلدىكتىڭ ءادىلى ەدى...

رۋحانيات • بۇگىن، 08:10

سوڭىندا جاقسى ءىزى سايراپ جاتىر

رۋحانيات • بۇگىن، 08:08

باقۇل بول، باۋىرىم!

رۋحانيات • بۇگىن، 08:07

سۇيەگى اسىل ادام ەدى

رۋحانيات • بۇگىن، 08:05

ۇقساس جاڭالىقتار