توعىز جاسىندا جاسالعان وپەراتسيادان سوڭ قوس جانارىنان ايىرىلعان سايدا سول ساتتەن باستاپ مۋزىكانى جانىنا سەرىك ەتتى. سودان بەرى ەش قيىندىققا قاراماستان تالاي شىڭداردى باعىندىرىپ, 13 جاسىندا تۋعان قالاسىندا ەڭ العاشقى جەكە كونتسەرتىن بەردى. ول ەشقاشان «مۋزىكانت بولامىن» دەگەن ارمانىنان اينىعان جوق. مەكتەپتى ۇزدىك ءبىتىرىپ, «بولاشاق» باعدارلاماسىمەن شەتەلدە وقىدى. ساۋساعىنان ساز تامعان شەبەر پيانيست سايدا قالىقوۆا قازىرگى ۋاقىتتا نۇر-سۇلتان قالاسىنىڭ مەملەكەتتىك فيلارمونياسىندا قىزمەت ەتەدى. «مەنىڭ بىلىمگە دەگەن قۇشتارلىعىم ماعان بارلىق كەزدەسكەن قيىندىقتاردى جەڭىپ شىعۋعا كومەكتەسەدى», دەپ باستاعان اڭگىمەسىندە ول ەلىمىزدە اۋديو كىتاپتاردىڭ از ەكەنىن دە تىلگە تيەك ەتتى.
الايدا شەتەلدە وقىعاندا مۇنداي قيىندىقتار بولماعانىن ايتادى. «يتالياعا وقۋعا كەلگەندە, رەكتور مەنى تەوريالىق ساباقتارعا قالاي دايىندالادى ەكەن دەپ ويلاعان ەكەن. سونى بىردەن ويلاستىرىپ, ۋنيۆەرسيتەت ديداكتيكاسى دەگەن بولىممەن اقىلداسىپ, ەڭ قاجەتتى دەپ ساناعان اۋديو كىتاپتاردى دايىنداپ شىقتى. ولار مەنىڭ مۇمكىندىگى شەكتەۋلى ەكەنىمدى بىلدىرمەي, بارلىق اۋديو كىتاپتاردى ماعان بەردى. سونداعى مەنىڭ قۋانىشىمدى سوزبەن ايتىپ جەتكىزۋ مۇمكىن ەمەس. باسقالارى 10-15 مينۋت تاپسىرسا, مەن 35 مينۋت بويى ەمتيحان تاپسىردىم. ولار مەنىڭ يتاليان ءتىلىن وتە جاقسى مەڭگەرگەنىمە تاڭدانىسپەن قارادى, ءتىپتى مەنىڭ باسقا ۇلت وكىلى ەكەنىمە سەنبەدى», دەدى ول كوكىرەگىن قۋانىش كەرنەپ. ول سوڭعى ەمتيحاندا جەكە جانە وركەستردىڭ سۇيەمەلدەۋىمەن ەكى باعدارلاما ورىندادى. ءسويتىپ مۋزىكا اكادەميگى دارەجەسىن يەلەندى.
سونداي-اق ول تەك ورىنداۋشى عانا ەمەس, 20-دان استام تۋىندىنىڭ اۆتورى. يتاليا, رۋمىنيا, رەسەي مەملەكەتتەرىندە ونەر كورسەتكەن سايدا بيىل ءوزىنىڭ مۋزىكا الەمىندەگى 20 جىلدىق مەرەيتويىن نۇر-سۇلتان قالاسىندا اتاپ ءوتتى. سونىمەن قاتار ونىڭ كەشى الماتىدا سونداي-اق, تۇركيادا ءوتتى.
«بۇگىندە كەي جاستار كوپ نارسەگە شاعىمدانىپ جاتادى. الايدا ول استە دۇرىس ەمەس. ويتكەنى ءبىلىم, عىلىم ۇيرەنۋ ەشبىر اقىنى تالاپ ەتپەيدى. تەك كەرەگى – ىنتا مەن ىقىلاس, ۇمتىلىس پەن ىزدەنۋ» دەگەن سايدا اعىلشىن تىلىمەن بىرگە, يتاليان ءتىلىن دە جەتىك مەڭگەرگەن. ءتىپتى مەكتەپتە يتاليان تىلىنەن ءدارىس تە بەرگەن. «بىردە وكسفوردتان كەلگەن وقىتۋشى استانامىزدا بولعان 2 كۇننىڭ ىشىندە جاستارمەن تەك اۋدارماشى ارقىلى ءسويلەسكەنىن ايتتى. الايدا مەنىمەن اعىلشىنشا سويلەسكەندە, ول كوپ نارسەنى تەرەڭنەن قوزعاپ, پىكىر الماستىرا العانىنا قۋاندى. راسىمەن, اۋدارماشى ارقىلى سويلەسۋ مەن سول ءتىلدىڭ وزىندە وي الماسۋ ءتىپتى ەكى بولەك نارسە دەسەك تە بولادى. «ءبىر ءتىل بىلسەڭ – ءبىر ادامسىڭ, ەكى ءتىل بىلسەڭ - ەكى ادامسىڭ». كوپ ءتىلدى مەڭگەرگەننىڭ ءبىلىمى مەن دۇنيەتانىمى دا كەڭەيە تۇسەتىنى راس» دەپ, وي بولىسكەن ول جاستاردى ءتىل ۇيرەنۋگە شاقىردى.
سايدا اڭگىمەسىن تاعى ءبىر قىزىقتى جايتپەن ءارى قاراي جالعاپ, يتاليان تىلىنەن اۋدارماشى بولىپ ءجۇرگەنىندە داۋن اۋرۋىنا بايلانىستى كونفەرەنتسيا وتكەنىنە توقتالدى. «سوندا شەتەلدەن كەلگەن ساراپشىلار بالانىڭ قولىنا ش ۇلىق كيگىزىپ, قالام ۇستاتۋ كەرەگىن ايتتى. ال بىزدەگى ءبىر مۇعالىم قولعاپ كيگىزۋگە دە بولادى عوي دەدى. مەن ساراپشىلارعا وسىنى ايتقانىمدا, ولار ش ۇلىق كيگىزۋدىڭ قانشالىقتى پايدالى ەكەنىن جىلىكتەپ ءتۇسىندىرىپ بەردى. ەگەر مەن دە وسىنى قۇپتاپ, نازار اۋدارماعانىمدا, وقيعا باسقاشا ءوربىر ەدى. ياعني, بۇل جەردەن ءتىلدى ءبىلۋ مەن ءتۇسىنۋدىڭ تاعى ءبىر ارتىقشىلىعىن كورۋگە بولادى», دەيدى سايدا.
سايدانىڭ ارمانى كوپ. ءتىپتى كەيبىرىنە ءسىزدىڭ قيالىڭىز دا جەتپەيدى. «مەنىڭ ءبىر ارمانىم – شەتەلدەردە شىعارماشىلىق كەشىمدى وتكىزىپ, قازاقستاننىڭ اتىن اسقاقتاتا ءتۇسۋ», دەدى ول. وسى ساتتە سايدانىڭ اناسى دا اڭگىمەمىزگە ارالاستى. «سايدا العا قويعان ماقساتتاردىڭ قيىندىعىن ويلامايدى, ءتىپتى ەلەمەيدى دە, تەك ونى ورىنداۋ جولىندا تالماي ەڭبەكتەنەدى», دەيدى اناسى. ءبىز دە ونىڭ اسەم كومپوزيتسيالارى الەمنىڭ تالاي ۇزدىكتەرى باعىندىرعان لوندوننىڭ, فرانتسيانىڭ ۇلكەن زالدارىندا شىرقالاتىنىنا شىن جۇرەكتەن تىلەكتەستىگىمىزدى بىلدىردىك.
