ەجەلگى ەللادا ەلىنىڭ 1975 جىلعى كونستيتۋتسياسىنا سايكەس زاڭ شىعارۋشى بيلىكتى ءبىر پالاتالى پارلامەنت جۇزەگە اسىرادى. 1952 جىلدان بەرى گرەك پارلامەنتى 300 دەپۋتاتتان جاساقتالىپ كەلەدى. پارلامەنت سايلاۋى ءتورت جىلدا ءبىر مارتە وتەدى. الايدا, 2004 جىلدان بەرى گرەكيادا بىردە-ءبىر ۇكىمەت كونستيتۋتسيامەن بەكىتىلگەن مەرزىمدە سوڭىنا دەيىن جۇمىس ىستەمەدى. قازىرگى ۇكىمەت بيىل قازان ايىنا دەيىن وتىرۋى كەرەك ەدى, بىراق وعان جەتكىزبەي تاعى دا كەزەكتەن تىس پارلامەنت سايلاۋى ءوتتى. نەلىكتەن مۇنداي شەشىم قابىلداندى؟ وسىعان از-كەم توقتالىپ وتەيىك.
گرەكيانىڭ پرەمەر-مينيسترى الەكسيس تسيپراس پرەزيدەنت پروكوپيس پاۆلوپۋلوستان مەرزىمىنەن بۇرىن پارلامەنت سايلاۋىن وتكىزۋ تۋرالى سۇراعاندى ءجون دەپ سانادى. ونىڭ مۇنداي شەشىمگە كەلۋىنە 26 مامىردا وتكەن ەۋروپارلامەنت سايلاۋىندا ءوزىنىڭ پارتياسى «سيريزا» سولشىل راديكالدار كواليتسياسىنىڭ جەڭىلىسى ىقپال ەتتى. پارتيا 24% داۋىسپەن ەكىنشى ورىنعا ءتۇسىپ قالدى, ال ودان جوعارى بولعان «جاڭا دەموكراتيا» پارتياسىنىڭ ەنشىسىندە – 33% داۋىس. وسىدان كەيىن ۇكىمەت باسشىسى جەڭىلىسىن مويىنداپ, «ەندى تەك ەكى جول قالدى: كرەديتورلارمەن جاسالعان مەموراندۋمداردان باس تارتۋ نەمەسە كەيىن شەگىنىپ, اسكەتيزم, داعدارىس جانە وليگارحتارعا ورالۋ» دەگەن مالىمدەمە جاسادى. ال بۇعان جاۋاپ رەتىندە ەل پرەزيدەنتى پارلامەنتتى تاراتىپ, وسى جىلدىڭ 7 شىلدەسىندە مەرزىمىنەن بۇرىن سايلاۋ وتكىزۋدى بەلگىلەدى.
گرەكيانىڭ باستى پروبلەماسى – قۇبىلمالى ەكونوميكاسى. ەلدى ون جىل بۇرىن داعدارىس جايلاپ, جاستار اراسىنداعى جۇمىسسىزدىق 40%-عا جەتتى, بانكتەر ىدىراپ, سالىنعان ينۆەستيتسيالار ءوزىن ءوزى اقتامادى. جارتى ميلليون گرەك كريزيستىڭ كەسىرىنەن ءوز ەلىن تاستاپ كەتۋگە ءماجبۇر بولدى. بۇل جاعدايدى رەتتەۋ تۋرالى باستامالار ءار كەزەڭدەگى سايلاۋعا ءوز ىقپالىن تيگىزىپ كەلەدى. 2015 جىلى ۇكىمەت «سيريزا» وكىلدەرىنەن جاساقتالعاندا, بۇل قۇرام ءبىراز ۋاقىت ۇستەمدىك قۇرادى دەپ بولجانعان ەدى. ويتكەنى وسى پارتياعا حالىقتىڭ باسىم بولىگى تىعىرىقتان الىپ شىعادى دەپ سەنىم ارتتى. بىراق سول سەنىمگە سەلكەۋ تۇسكەنىن ەۋروپارلامەنت سايلاۋى كورسەتىپ بەردى. سودان الەكسيس تسيپراس بيلىك پەن حالىق اراسىنداعى بايلانىستى قايتا بەكىتۋدى دۇرىس كورىپ, ۋاقىت ۇتتىرماي سايلاۋعا كىرىسىپ كەتتى. پرەمەر-مينيستر ءوزىنىڭ ۇكىمەتى گرەكيانى ەكونوميكالىق قۇلدىراۋدان الىپ شىقتى, ەڭبەكاقى مەن زەينەتاقى ءوستى, از قامتىلعانعاندار جاردەماقى الىپ, ءبىرقاتار سالىق تومەندەتىلدى دەپ سانايدى. سوندىقتان ۇكىمەتتىڭ باعدارلاماسىن سايلاۋالدى ۋادە رەتىندە قولدانعان الەكسيس تسيپراس جەڭىسكە دەگەن ءۇمىتىن جوعالتپاعان ەدى...
سونىمەن كەزەكتەن تىس پارلامەنت سايلاۋى دا ارتتا قالىپ, بيلىك باسىنا باسقا پارتيا كەلدى. باسقا دەگەنى – «جاڭا دەموكراتيا» پارتياسى. كيرياكوس ميتسوتاكيس باستاعان وڭشىل تسەنتريستىك پارتيا 39,78% داۋىس جيناپ, پارلامەنتتەگى 300 ورىننىڭ 158-ءىن يەلەندى. سايلاۋ كودەكسىنە سايكەس ەڭ كوپ داۋىس جيناعان پارتيا قوسىمشا مانداتتار ەنشىلەۋگە قۇقىلى. ال ەكىنشى ورىنعا تۇسكەن الەكسيس تسيپراس جەتەكشىلىك ەتەتىن سولشىل راديكالدار كواليتسياسى 31,56% داۋىسپەن پارلامەنتتەن 86 ورىن الدى. سونداي-اق 3% داۋىستان جوعارى العان تاعى ءتورت پارتيا پارلامەنتكە ىلىگىپ, 9-دان 22 ورىنعا دەيىن يەلەنە الادى. ءسويتىپ 2019 جىلعى پارلامەنت سايلاۋىندا 8% باسىمدىقپەن بيلىك باسىنا كەلگەن «جاڭا دەموكراتيا» پارتياسىنىڭ كوشباسشىسى كيرياكوس ميتسوتاكيس گرەكيانىڭ جاڭا پرەمەر-ءمينيسترى رەتىندە انت قابىلدادى. سالتاناتتى ءراسىم افيناداعى پرەزيدەنت سارايىندا پروكوپيس پاۆلوپۋلوستىڭ قاتىسۋىمەن ءوتتى.
وتكەن اپتانىڭ باسىندا گرەكيا ۇكىمەتىنىڭ جاڭا قۇرامى اتالىپ, وعان 51 ادام, 17 مينيسترلىك كىردى. كابينەتتىڭ 21 مۇشەسى باسقارۋشى پارتياعا كىرمەيدى جانە پارلامەنت ءمۇشەلەرى ەمەس. تاعايىندالعان مينيسترلەر 9 شىلدە كۇنى گرەك حالقىنىڭ مۇددەسىنە قىزمەت ەتۋگە انت بەردى.
گرەكيادا 2008 جىلدان بەرگى داعدارىستىڭ سالقىنى ءالى بايقالادى. جاڭا ۇكىمەت باسشىسى كيرياكوس ميتسوتاكيس رەفورما جاساپ, سالىقتاردى تومەندەتۋگە, ينۆەستيتسيا تارتۋعا, ەكونوميكانى كۇشەيتۋگە ۋادە بەردى. ەلدەگى بۇقارالىق اقپارات قۇرالدارى تاراتقان حابارلار بويىنشا حالىقتىڭ دەنى كيرياكوس ميتسوتاكيستىڭ وڭ وزگەرىستەر جاسايتىنىنا سەنىم ارتادى. جاڭا پرەمەر-مينيستر ەلدەگى ساياسي اۋلەتتەردىڭ بىرىنەن شىققان. ول – بۇرىنعى ۇكىمەت باسشىسى (1990-1993 جج.) كونستانتينوس ميتسوتاكيستىڭ ۇلى.
دەپۋتاتتاردىڭ انت قابىلداۋىنان كەيىن جاڭا قۇرامدى پارلامەنتتىڭ العاشقى وتىرىسى 17 شىلدەدە وتەدى.
