ۇشاق تولى جولاۋشى
مامىردىڭ 1-ءى كۇنى اشىلعان قازاقستاندىق لوۋكوستەر FlyArystan سودان كەيىنگى 2 ايدا 729 رەيس جاساپ, 127 000 جولاۋشى تاسىمالداعان ەكەن. كومپانيانىڭ مالىمەتىنشە, لوۋكوستەردىڭ قىزمەتىنە سۇرانىس جوعارى. قازىرگە دەيىن 220 مىڭ بيلەت ساتىلعان, رەيستەردىڭ 94 پايىزىندا ۇشاق تولى بولعان.
كومپانيا مامىر-ماۋسىم ايلارىنداعى قىزمەتى تۋرالى ەسەپ بەرگەندە لوۋكوستەر قىزمەتىن پايدالانۋشىلاردىڭ ۇشتەن ءبىرى الماتى مەن نۇر-سۇلتان اراسىندا قاتىناعان جولاۋشىلار ەكەنىن ايتتى. الماتىدان قاراعاندى, تاراز جانە ورال قالاسىنا ەكى ايدا 60 000 ادام قاتىناسا, ءۇشىنشى مەگاپوليس شىمكەنت پەن پاۆلوداردىڭ ورتاسىندا 10 000 ادام ۇشىپتى. جالپى, FlyArystan كومپانياسى اشىلعالى بەرى اۋە تاسىمالى ارقىلى قاتىناعان جولاۋشىلار سانى مامىر ايىندا 7 پايىزعا ۇلعايسا, ماۋسىمدا كورسەتكىش 31 پايىزعا كوبەيىپتى.
اۋە تاسىمالى بيلەتىنىڭ تىم قىمباتتىعىنا قاتىستى پىكىرلەردىڭ ايتىلىپ جۇرگەنىنە تالاي جىلدىڭ ءجۇزى بولعان-دى. سول سىني پىكىرلەر اقىرى بيىلعى كوكتەمدە وسىنداي ارزان اۋە تاسىمالى كومپانياسىنىڭ اشىلۋىنا تۇرتكى بولعان. دەگەنمەن, كومپانيا اشىلماي جاتىپ جولاۋشىلاردىڭ لوۋكوستەر قىزمەتى مەن قۇنىن سىناۋى كوبەيدى. قازاقستانداعى العاشقى لوۋكوستەر دەپ تانىستىراتىن FlyArystan-نىڭ بيلەت قۇنى Scat پەن Bek Air, Qazaq Air سەكىلدى قۇجات بويىنشا لوۋكوستەر ەمەس, بىراق ءىس جۇزىندە لوۋكوستەر اۋە كومپانيالارىنىڭ بيلەتىنەن قىمبات بولىپ شىعىپ جاتىر. ماسەلەن, الماتىدان نۇر-سۇلتانعا ءبىر اپتا بۇرىن ءبىر بيلەت FlyArystan-دا: 5 كيلوعا دەيىنگى قول جۇگىمەن – 23 999 تەڭگە; 10 كيلوعا دەيىنگى قول جۇگىمەن – 26 249 تەڭگە; 5 كيلوعا دەيىنگى قول جۇگىمەن جانە 20 كيلوعا دەيىنگى جۇكپەن – 27 599 تەڭگە; 10 كيلوعا دەيىنگى قول جۇگىمەن جانە 20 كيلوعا دەيىنگى جۇكپەن – 31 249 تەڭگە.
لوۋكوستردى قىمباتتاتىپ تۇرعانى دا بۇل كومپانيانىڭ Air Astana جانىنان قۇرىلعانى بولۋى ابدەن مۇمكىن. ەكىنشى جاعىنان بۇل لوۋكوستەر تىكەلەي مەملەكەتتىڭ تاپسىرىسىمەن, ياعني نۇرسۇلتان نازارباەۆتىڭ ۇسىنىسىمەن قۇرىلعانى ەسىمىزدە. مەملەكەتتىڭ ناشار مەنەدجەر ەكەنىن وسىدان جاعدايدان كەزەكتى رەت كورىپ وتىرمىز.
ايماقتارعا ۇشۋ ارزانعا تۇسەدى
دەگەنمەن, الماتىدان باسقا قالالارعا رەيستەردىڭ بيلەتتەرى Scat, Qazaq Air نەمەسە Bek Air بيلەتتەرىنەن ارزانىراق. الماتى-نۇر سۇلتان باعىتىندا جولاۋشىلار اعىنى كوپ بولعاندىقتان, لوۋكوستەر سۇرانىسقا وراي باعانى ادەيى قىمباتتاتىپ قويعانعا ۇقسايدى. وعان دالەل جوعارىدا اتالعانداي, كومپانيا ۇشاقتارى تاسىمالداعان بارلىق جولاۋشىلارىنىڭ ۇشتەن ءبىرى وسى ەكى مەگاپوليس اراسىندا قاتىناعانى. ال الماتى-شىمكەنت باعىتىندا ءبىر اپتادان كەيىنگى بيلەتتەردى FlyArystan - 11 999 تەڭگەگە, Qazaq Air - 16 431 تەڭگەگە, Scat - 22 391 تەڭگەگە ساتادى. الماتى-ورال باعىتىنداعى ۇشۋدان ءبىر اي بۇرىنعى بيلەتتەر FlyArystan-دا - 26 999 تەڭگە, Scat-تا - 40 841 تەڭگە, Bek Air-دا - 35 547 تەڭگە.
FlyArystan ماركەتينگ ءبولىمىنىڭ باسشىسى جانار جايلاۋوۆانىڭ ايتۋىنشا, قازىرگە دەيىن ساتىلعان بيلەتتەردىڭ جارتىسىنان كوبى 10 مىڭ تەڭگەدەن ارزان بيلەتتەر ەكەن. سونىڭ ىشىندە تارازعا ۇشقانداردىڭ 90 پايىزى, شىمكەنتكە ۇشقانداردىڭ 60 پايىزى, قاراعاندى مەن نۇر-سۇلتانعا ۇشقانداردىڭ تيىسىنشە 55 جانە 40 پايىزى جۇكسىز ورىن ساتىپ العان جولاۋشىلار. جالپى, باعا بويىنشا وتاندىق لوۋكوستەردىڭ الماتى مەن نۇر-سۇلتان اراسىنداعى بيلەتتەرىنىڭ باسقا اۋە تاسىمالداۋشىلارىنىكىنەن قىمبات, ال الماتىدان وزگە وڭىرلەرگە ارزان ەكەنى بايقالادى.
قارعايىن دەسەم جالعىزىم...
حالىق لوۋكوستەردەن اناۋ ايتقانداي ەرەكشە كومفورت كۇتپەگەنىمەن, كەيبىر بازالىق جاعدايلاردىڭ ساقتالماۋى تۋرالى دا پىكىرلەردىڭ بار ەكەنى جاسىرىن ەمەس. ماسەلەن, سىرقاتتانىپ قالعان جاعدايدا بيلەتتى قايتا وتكىزۋ ءۇشىن قوسىمشا اقشا تولەگەنىمەن, كومپانيا جەمە-جەمگە كەلگەندە بيلەتتى قايتارماي, ورنىنا ۆاۋچەر ۇسىنعان. ۆاۋچەر ارقىلى جولاۋشى كەيىن كومپانيانىڭ باسقا قىزمەتىن پايدالانا الادى ەكەن. بۇل تۋرالى جولاۋشىلاردىڭ ءبىرى انونيم تۇردە كومپانيانىڭ رەسمي سايتىنا شاعىم تۇسىرگەن. الايدا كومپانيا ماسەلەنى جاۋاپسىز قالدىرىپتى.
تاعى ءبىر جولاۋشى 12 مىڭ تەڭگەلىك بيلەتتى اۋىستىرۋ كەزىندە 10 مىڭ تەڭگە ايىپپۇل تولەگەنىن ايتادى. جالپى, جولاۋشىلاردىڭ كوپشىلىگى سۇرانىس كوپ كەزىندە كومپانيانىڭ بيلەتتى ادەيى قىمباتتاتىپ جىبەرەتىنىن ايتادى. ال 10 مىڭ تەڭگەگە دەيىنگى دەگەن باعىتتاعى بيلەتتەر بازالىق باعا بولىپ, ورىن تاپشىلىعى بولعاندا قۇنى دا كوتەرىلىپ وتىراتىن كورىنەدى.
قالاي دەگەندە دە, حالىق اراسىندا لوۋكوستەرگە سۇرانىس جوعارى, ۇشاق اۋە ارقىلى قاتىنايتىنداردىڭ قاتارى كوبەيىپ كەلەدى. بىراق بۇل كومپانيا قىزمەتىنىڭ ارزاندىعىنا بايلانىستى دەگەن ءسوز ەمەس. بۇل, بىرىنشىدەن, حالىقتىڭ اۋە جولىمەن قاتىناۋ جيىلىگىنىڭ وسۋىنە بايلانىستى. ەكىنشىدەن, تەمىرجولمەن قاتىناۋ دا قىمباتتاپا بارا جاتقانىنا دا بايلانىستى بولۋى مۇمكىن.
ساراپشىلار 2020 جىلعا دەيىن قازاقستاندا اۋە تاسىمالىنا حالىقتىڭ سۇرانىسى ايتارلىقتاي جوعارى قارقىنمەن وسەتىنىن ايتادى. وسى ورايدا, FlyArystan بيىل جىل سوڭىنا دەيىن جولاۋشىلار اعىنىن 700 مىڭعا جەتكىزەمىز دەپ جوسپارلاپ وتىر. ول ءۇشىن كومپانيا تاعى ەكى Airbus A320-200 ۇشاعىن ساتىپ الىپ, ۇشاتىن باعىتتار سانىن 12-گە جەتكىزبەك. سونىمەن قاتار, الداعى ۋاقىتتا كومپانيا گرۋزيا, وزبەكستان مەن ۋكراينا نارىعىن دا كوزدەپ وتىرعان كورىنەدى. بالكىم, كومپانيانىڭ قىزمەت ساپاسى مەن باعا ساياساتىن تاعى ءبىر سارالاعانى دا دۇرىس شىعار.
باۋىرجان مۇقان,
«Egemen Qazaqstan»
