قازىلار القاسىن باستاپ كەلگەن «ديماش-الي» پروديۋسەرلىك ورتالىعىنىڭ جەتەكشىسى قانات ايتباەۆ ايماق باسشىسىنا شەتەلدىك قوناقتاردى تانىستىرىپ, فەستيۆالدىڭ جوعارى دەڭگەيدە ۇيىمداستىرىلۋىنا زور قولداۋ كورسەتكەنى ءۇشىن العىسىن ءبىلدىردى.
بيىلعى بايقاۋدا قازىلار القاسى قۇرامىنىڭ گەوگرافياسى كەڭەيگەن. اتاپ وتسەك, تبيليسيدەن كەلگەن گرۋزيننىڭ تانىمال جاس ءانشىسى Tsnobiladze Nini, رەسەي فەدەراتسياسىنىڭ ەڭبەك سىڭىرگەن ءارتىسى, كومپوزيتورى جانە ءانشىسى ەزەروۆ ۆلاديمير ەدۋاردوۆيچ, ح-فاكتور (ۋكراينا) جوباسىنىڭ جەڭىمپازى, ەۋروۆيدەنيە بايقاۋىنىڭ ۇلتتىق ىرىكتەۋ ءفيناليسى, بىرەگەي داۋىس يەسى ايدا نيكولايچۋك, قازاقستان رەسپۋبليكاسىنىڭ ەڭبەك سىڭىرگەن ءانشىسى, كومپوزيتور, مادەنيەت قىزمەتكەرى جولداسوۆ ۇلىقپان, ا.جۇبانوۆ اتىنلاعى مۋزىكالىق كوللەدجدىڭ وقىتۋشىسى, تانىمال كومپوزيتور, ءانشى ءايتىموۆ مارات ولجاباي ۇلى, BATYSSOUND PRODUCTION ستۋدياسىنىڭ ديرەكتورى جانە ءان ارلەۋشىسى, ديماشتىڭ كوپتەگەن انىنە ساۋندترەك جازعان بەكچۋرين ەرلان كەزدەسۋ بارىسىندا وبلىس اكىمىنە جىلى قابىلداعانى ءۇشىن العىستارىن ءبىلدىردى.
- بۇگىنگى تاڭدا «Baqytty bala» فەستيۆال-بايقاۋى وبلىس كولەمىندە عانا ەمەس, حالىقارالىق دارەجەگە كوتەرىلگەن ىزگى شاراعا اينالدى. ەلىمىزدە ونەرلى جاندار وتە كوپ. ءوزىنىڭ زور تالانتىمەن, ەرەكشە داۋسىمەن الەمدى مويىنداتقان جەرلەسىمىز ديماش قۇدايبەرگەندى وزدەرىڭىز دە جاقسى بىلەسىزدەر. وبلىسىمىزدا جاقسى داستۇرگە اينالعان بايقاۋعا اتسالىسىپ, بۇلدىرشىندەردىڭ ونەرىن باعالاپ جاتقاندارىڭىز ءۇشىن اقتوبەلىكتەردىڭ اتىنان شىن جۇرەكتەن العىس بىلدىرەمىن. الداعى ۋاقىتتا دا وسى بايقاۋدىڭ اياسىن كەڭەيتىپ, ناعىز تالانتتاردى الەمگە تانىتاتىن بولامىز», - دەدى وبلىس باسشىسى قوناقتارعا ءوز العىسىن ءبىلدىرىپ.
كەزدەسۋ سوڭىندا ايماق باسشىسى شەتەلدىك قوناقتارعا 150 جىلدىق مەرەيتويعا ارنالعان كادەسىيلار تابىستاپ, قازىلار القاسىمەن ەستەلىك سۋرەتكە ءتۇستى.
