پويما اۋىلىندا ورنالاسقان «تەرەكتى ماي كومبيناتى» جشس ماي وڭدەۋ زاۋىتىن ارالاپ كورگەن دەپۋتاتتار جەرگىلىكتى كاسىپورىنداردىڭ تىنىس-تىرشىلىگىمەن تانىسىپ, مامانداردىڭ وي-پىكىرىنە قۇلاق ءتۇردى.
ماي وڭدەۋ زاۋىتىنىڭ ديرەكتورى اقىلبەك سارمالاەۆتىڭ ايتۋىنشا, كومبينات وتكەن جىلى 235,4 توننا ماي مەن 422,15 توننا كۇنجارا وندىرگەن. مايدىڭ 50 تونناسى وزبەكستانعا ەكسپورتتالعان ەكەن.
- زاۋىتتا مايمەن قاتار ۇن دا وندىرەمىز. ءبىزدىڭ تابيعي ونىمدەرىمىز رەسەي فەدەراتسياسىندا سۇرانىسقا يە. 6 جىل بويى ۇن مەن كۇنباعىس مايىن رەسەيدىڭ سامارا, ورىنبور, ساراتوۆ قالالارىنا, وزبەكستان مەن تاجىكستان ەلدەرىنە ەكسپورتتادىق. تەك شەتەلگە تاۋار شىعارعاندا قۇجات تولتىرۋ ماسەلەسى قينايدى. ءار ۆاگونعا ءار ءتۇرلى قۇجات كەرەك. وسىنداي قاعازباستىلىقتان ايىرىلساق, كاسىپكەرلىكتىڭ دامۋىنا ۇلكەن قولداۋ بولار ەدى, - دەدى اقىلبەك ابزال ۇلى.
بۇدان كەيىن دەپۋتاتتار اقسۋات اۋىلىنا كىرە بەرىس جولدى كۇردەلى جوندەپ جاتقان «توبي» جشس-نىڭ جۇمىسىمەن تانىستى. مەردىگەر فيرما بۇل سالادا جيىرما جىلعا تاياۋ ەڭبەك ەتەدى, جشس ديرەكتورىنىڭ ورىنباسارى اسىلانبەك راحمەتوۆتىڭ ايتۋىنشا جۇمىسقا ەش كەدەرگى جوق. «جوباداعى 2443 مەتر جولدى ۋاقىتىندا جوندەپ, دەر كەزىندە تاپسىرامىز» دەيدى ا.راحمەتوۆ.
- تەرەكتى اۋدانى بويىنشا جولدىڭ 5%-ى عانا جاقسى, 47%-ى – قاناعاتتانارلىق دەڭگەيدە. ال 48%-ى وتە ناشار دەپ باعالانادى, - دەيدى اۋدان اكىمى ءادىل جولامانوۆ ءوڭىردىڭ باستى ماسەلەلەرىنىڭ بىرىنەن دەپۋتاتتاردى حاباردار ەتىپ.
پارلامەنت دەپۋتاتتارى وسى ساپارىندا 1984 جىلى سالىنىپ, سودان بەرى جوندەۋ كورمەگەن مەكتەپتىڭ جاعدايىمەن تانىستى. اۋدان ورتالىعىنداعى جاڭادان سالىنعان 36 پاتەرلىك تۇرعىن ءۇي, «اق جەلكەن» بالاباقشاسى مەن بىلتىر جوندەۋدەن وتكەن اۋداندىق اۋرۋحانانى ارالادى. تۇرعىندارمەن كەزدەسىپ, ولاردىڭ كەيبىر سۇراقتارىنا جاۋاپ بەردى.
سۋرەتتى تۇسىرگەن يسلامگۇل شالاباەۆا
باتىس قازاقستان
