الەۋمەتتىك جانە ينفراقۇرىلىمدىق جوبالار شەڭبەرىندە جۇزەگە اسىرىلعان سپورت كەشەنى 4 گەكتارعا جۋىق الاڭدا ورنالاسقان. بۇل زاماناۋي ەكى قاباتتى عيمارات سپورت شارالارىن ۇيىمداستىرۋعا, اۋىل تۇرعىندارىنىڭ دەنەشىنىقتىرۋ جانە ساۋىقتىرۋ جاتتىعۋلارىمەن اينالىسۋىنا, سونىمەن قاتار اۋقىمدى سپورت جانە مادەني-كوپشىلىك ءىس-شارالار وتكىزۋگە ارنالعان. جاڭا كەشەندە شاعىن فۋتبول, باسكەتبول جانە ۆولەيبول جارىستارىن ۇيىمداستىرۋعا ارنالعان الاڭدار بار.
جاڭا سپورت كەشەنى 160 ورىنعا ارنالعان. سونىمەن بىرگە مۇندا ترەناجەر زالى, كيىم اۋىستىراتىن بولمەلەر, دۋش بولمەلەرى, ۇستەل ويىندارىنا ارنالعان بولمەلەر جانە باسقا دا سپورت تۇرلەرىمەن اينالىسۋعا ارنالعان بولمەلەر ورنالاسقان. سونداي-اق دەنەشىنىقتىرۋعا, توپتىق, ۇستەل جانە باسقا دا كوپتەگەن ويىندارعا قاجەت قۇرال-جابدىقتار بار. «جاقسىلىق قىلساڭ ءبۇتىن قىل» دەگەندەي, «NCOC» كومپانياسى عيماراتتى جيھاز جيىنتىعىمەن جانە نەگىزگى قۇرالدارمەن جابدىقتاپ بەردى.
– مۇنايلى اۋدانىندا بۇگىن ايرىقشا كۇن. ويتكەنى اۋداندا العاش رەت وسىنداي ءزاۋلىم كەشەن اشىلۋدا. الداعى ۋاقىتتا وسى سپورت الاڭىندا جاتتىققان جاسوسپىرىمدەر اراسىنان بولاشاق چەمپيوندار شىعاتىنىنا سەنىمدىمىن. ءبىز دارىندى بالالاردىڭ كاسىبي سپورتپەن اينالىسىپ, ويداعىداي دايىندىقتاردان ءوتۋى ءۇشىن قولدان كەلگەننىڭ ءبارىن جاسايمىز. جەڭىس جولىنداعى جالىندى جىگەرلەرىڭىزگە جارقىن جەتىستىك تىلەي وتىرىپ, بارلىق جارىستار مەن سايىستاردا ابىروي بيىگىنەن كورىنىڭىزدەر, – دەدى ايماق باسشىسى س.ترۇموۆ كەشەننىڭ اشىلۋ سالتاناتىندا.
جالپى قۇنى 466,187 ملن تەڭگەنى قۇرايتىن سپورت كەشەننىڭ قۇرىلىس جۇمىستارى 2018 جىلدىڭ مامىر ايىندا باستالعان ەدى. بۇل – بۇگىنگە دەيىن ماڭعىستاۋ جانە اتىراۋ وبلىستارىندا 200-دەن استام ينفراقۇرىلىمدىق جانە الەۋمەتتىك ءمانى بار نىساندار تۇرعىزعان «NCOC» كومپانياسىنىڭ بالالار مەن ءجاسوسپىرىمدەردىڭ بۇقارالىق سپورتىن قولداۋعا, اۋىل تۇرعىندارى اراسىندا سالاماتتى ءومىر سالتىن ناسيحاتتاۋعا جانە دەنەشىنىقتىرۋدى دامىتۋعا باعىتتالعان الەۋمەتتىك جوبالاردى ىسكە اسىرۋداعى تاعى ءبىر قوماقتى ۇلەسى.
– ەشبىر ىنتالاندىرۋسىز جانە ءتيىستى ماتەريالدىق بازانى نىعايتپاي, سپورتتى دامىتۋ جانە جوعارى ناتيجەلەرگە قول جەتكىزۋ مۇمكىن ەمەس. بۇل ماقساتتا ءوندىرىس ورىندارىنىڭ الەۋمەتتىك تۇرعىدان جاۋاپكەرشىلىگى دە ماڭىزدى ءرول اتقارادى. بەسشوقى اۋىلىندا تۇرعىزىلعان جاڭا سپورت كەشەنى وسىنداي جۇمىستىڭ ايقىن ءبىر ۇلگىسى بولماق. بۇگىننەن باستاپ ءوڭىر تۇرعىندارىنىڭ جايلى جەردە سپورتپەن اينالىسۋىنا ءمۇمكىندىك تۋعانىنا وتە قۋانىشتىمىن. بۇل كەشەننىڭ جەرگىلىكتى سپورتشىلارعا ءوز شەبەرلىگىن جەتىلدىرۋگە سەپتىگىن تيگىزەتىنىنە جانە وسىنداعى جاستاردىڭ ۇلكەن جەڭىستەر مەن ماراپاتتارعا يە بولاتىندىعىنا سەنىمدىمىن, – دەدى جاڭا سپورت كەشەنىن اشۋ ءراسىمى كەزىندە باسقارۋشى ديرەكتورىنىڭ ورىنباسارى ە.ماراباەۆ.
دەمەك, «ءزاۋلىم سارايدا سپورتپەن شۇعىلدانسام عوي!» دەگەن بەسشوقىلىق جاستاردىڭ ارمانى جاقىنداي ءتۇستى دەۋگە بولادى.
ماڭعىستاۋ وبلىسى
