«ورتالىق» وڭىرلىك قولباسشىلىعىنىڭ تاربيە جانە الەۋمەتتىك-قۇقىقتىق جۇمىستار (تجاقج) باسقارماسىنىڭ جوسپارىنا جانە «رۋحاني جاڭعىرۋ» باعدارلاماسى نەگىزىندە مەملەكەتتىك ءتىلدىڭ قولدانىلۋ اياسىن كەڭەيتۋ ماقساتىندا وزگە ەتنوس وكىلدەرى قىزمەتكەرلەرىنىڭ اراسىندا «مەملەكەتتىك ءتىل – مەنىڭ ءتىلىم» اتتى بايقاۋ وتكىزىلدى.
ەكى كۇنگە سوزىلعان بايقاۋعا ۇلتتىق ۇلاننىڭ «ورتالىق» وڭىرلىك قولباسشىلىعىنا قاراستى 6 اسكەري بولىمىنەن 6 اسكەري قىزمەتشى قاتىستى. بايقاۋ اياسىندا قاتىسۋشىلار مەملەكەتتىك ءتىلدىڭ ماڭىزدىلىعىنا توقتالا وتىرىپ, قازاق تىلىندە ءسوز ساپتاپ, ويلارىن كوپشىلىككە جەتكىزە ءبىلدى, قازاقتىڭ عۇلامالارى مەن باتىرلارى جايىندا ساحنالىق قويىلىم كورسەتتى.
قازىلار القاسى قاتىسۋشىلاردىڭ ءتىلدى مۇمكىندىگىنشە ەركىن مەڭگەرگەندىگىنە, ءتىل بايلىعىنا, ءتىل مادەنيەتىنە, داۋىس مانەرىنە, ساحنادا ءوزىن ءوزى ۇستاۋ مادەنيەتىنە, كيىم كيۋ ءۇلگىلەرىنە باسا ءمان بەردى. سونىمەن, قازىلار القاسىنىڭ شەشىمىمەن ءبىرىنشى ورىن قاراعاندى قالاسىنداعى 5451 اسكەري ءبولىمىنىڭ 1 جەدەل ماقساتتاعى باتالونى جاۋىنگەرلىك قامتاماسىز ەتۋ ۆزۆودىنىڭ اعا مامانى (توپ باستىعى), اعا سەرجانت ەۆگەني بەردنيكوۆكە بەرىلدى. سايىس جەڭىمپازى مەن ءجۇلدەگەرلەرىنە «ورتالىق» ءوڭىرلىك قولباسشىلىعى قولباسشىسىنىڭ ارنايى ديپلومدارى جانە باعالى سىيلىقتار تابىستالدى.
وقۋ-ادىستەمەلىك جيىنىنىڭ جالعاسى قوستاناي وبلىسى اكىمدىگىنىڭ «ءتىل دارىن» وقۋ ورتالىعىندا جالعاستى. وڭىردەن كەلگەن ءتىل ماماندارى «كازتەست» جۇيەسى بويىنشا, «لاتىن ءالىپبيىنىڭ ەملەسى» تاقىرىبىندا جانە ادىستەمەلىك ساباقتار ءوتكىزدى. ادىستەمەلىك ساباقتى ءوتكىزۋ بارىسىندا جاقسى ناتيجە كورسەتكەنى ءۇشىن 6505 اسكەري ءبولىمىنىڭ تجاقج بولىمشە باستىعىنىڭ اعا كومەكشىسى, مايور شىنار ايتكەنوۆا ۇزدىك دەپ تانىلىپ, «ورتالىق» وڭىرلىك قولباسشىلىعى قولباسشىسىنىڭ بۇيرىعىمەن «ۇزدىك مامان» اتاعىنا يە بولدى ءارى ديپلوم جانە باعالى سىيلىقپەن ماراپاتتالدى.
مۇراتبەك قۇدايبەرگەنوۆ,
مايور, 6697 اسكەري ءبولىمى تجاقج بولىمشە باستىعىنىڭ اعا كومەكشىسى
