«قالايشا تويدى بۇگىن باستامايمىن
تورىندە قۇتتى مەكەن قوستانايدىڭ!
يىقتا شەن مەن شەكپەن اۋىسقانمەن
قولىمنان دومبىرامدى تاستامايمىن» دەپ باستاعان ارناۋ جىرىندا ەرلان بولات ۇلى مەرەكەمەن جينالعان قاۋىمدى قۇتتىقتادى. دومبىرانىڭ بابادان قالعان مۇرامىز, حالقىمىزدىڭ قاسيەتى ەكەنىن ايتا كەلىپ ارناۋىن:
«كۇي كەرنەپ, توبىل-تورعاي ساي-سالاسىن,
ارقانىڭ ءار قىرىنا ءان تاراسىن.
تورىندە ءار ءۇيىمنىڭ دومبىرا ويناپ,
قازاعىم, دۋمان-تويىڭ تارقاماسىن!» دەپ اياقتادى.
مەرەكەدە اۋداندار مەن قالالاردان كەلگەن انشىلەر اننەن شاشۋ شاشتى. توبىل جاعاسىنداعى كورىكتى ساياباق مەرەكەنىڭ ءسانىن كىرگىزە تۇسكەندەي. انشىلەر اننەن شاشۋ شاشتى.
«ۇلتتىق دومبىرا كۇنى مەرەكەسىنە ءبىز كەڭ اۋقىمدا دايىندالدىق. وتكەن جىلى تەك مەرەكەلىك باعدارلاما دايىنداساق, بيىل باعدارلامامەن قاتار ءار ءتۇرلى اتالىممەن بايقاۋ جاريالادىق. ونىڭ ىشىندە وبلىس اۋداندارى مەن قالالارىنان كەلگەن ءداستۇرلى انشىلەر بايقاۋىن وتكىزىپ, ولاردى ماراپاتتادىق. مەرەكەنىڭ باستى ماقساتى دومبىرانى, دومبىرا ارقىلى بابادان قالعان رۋحاني مۇرالاردى ناسيحاتتاۋ بولىپ تابىلادى. مۇمكىندىگىنشە ۇلتتىق مادەنيەتتى دارىپتەدىك» دەدى وبلىستىق مادەنيەت باسقارماسىنىڭ باسشىسى ەرلان قالماقوۆ.
«ۇلتتىق دومبىرا كۇنى مەرەكەسىنىڭ بەلگىلەنگەنىنە وتە قۋانىشتىمىن. وتكەن جىلى دا وسىندا مەرەكەگە قاتىسىپ, ءان مەن كۇيگە قۇلاق قۇرىشىمىز قانعان ەدى. بيىل تاعى دا كەلىپ وتىرمىن. دومبىرادان توگىلگەن كۇي ادامداردىڭ رۋحىن كوتەرەدى. بۇل ۇلتتىق قۇندىلىقتاردىڭ جاڭعىرۋىنا, جاستار تاربيەسىنە وڭ ىقپال ەتەدى» دەيدى مەرەكەگە كەلگەن قالا تۇرعىنى مەڭزادا سامەمبەت.
مەرەكەگە ءى.وماروۆ اتىنداعى وبلىستىق قازاق دراما تەاترىنىڭ ارتىستەرى دە كورىنىس قويىپ اتسالىستى.
