قر پرەمەر-ءمينيسترى اسقار مامين قر پارلامەنت پالاتالارىنىڭ بىرلەسكەن وتىرىسىنىڭ جۇمىسىنا قاتىستى, وندا VI شاقىرىلىمىنداعى ءتورتىنشى سەسسيا جۇمىسىن جابۋ تۋرالى شەشىم قابىلداندى.
وتىرىستى قر پارلامەنت ءماجىلىسىنىڭ توراعاسى نۇرلان نىعماتۋلين اشتى. سەسسيا بارىسىندا بارلىعى 5 بىرلەسكەن پالاتا وتىرىسى, ءماجىلىستىڭ 41 پلەنارلىق وتىرىسى جانە سەناتتىڭ 26 پلەنارلىق وتىرىسى ءوتتى, ولاردا 319 ماڭىزدى ماسەلە قارالىپ, 83 زاڭ جوباسى قابىلداندى, ونىڭ ىشىنە 82-سىنە مەملەكەت باسشىسى قول قويدى جانە ولار زاڭدى كۇشىنە ەندى.
سەسسيالار كەزىندە قابىلدانعان اسا ماڭىزدى زاڭداردىڭ قاتارىندا 2019-2021 جىلدارعا ارنالعان رەسپۋبليكالىق بيۋدجەت, جۇمىسپەن قامتۋ بويىنشا زاڭعا تۇزەتۋلەر, دەنساۋلىق ساقتاۋ, كينەماتوگرافيا, كولىك, ستاندارتتاۋ, ماسەلەلەرى بويىنشا زاڭدار, بيزنەس ورتانى دامىتۋ جانە ساۋدا قىزمەتىن رەتتەۋ ماسەلەلەرى بويىنشا زاڭناماعا وزگەرىستەر ەنگىزۋ, ورتالىق جانە جەرگىلىكتى اتقارۋشى ورگانداردىڭ فۋنكتسيالارىن باسەكەلى ورتاعا بەرۋ ماسەلەلەرى تۋرالى زاڭدار بار.
قازىرگى كەزدە پارلامەنت پورتفەلىندە 34 زاڭ جوباسى بار. ولاردىڭ قاتارىندا 2020-2022 جىلدارعا ارنالعان رەسپۋبليكالىق بيۋدجەت, «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكس, جاڭا ەكولوگيالىق كودەكس, پەداگوگ ستاتۋسى تۋرالى زاڭ جوباسى بار.
بۇدان كەيىن زاڭ شىعارۋشىلىق قىزمەت قر تۇڭعىش پرەزيدەنتى - ەلباسى نۇرسۇلتان نازارباەۆتىڭ قازاقستان حالقىنا جولداۋلارىن, الەۋمەتتىك باستامالارىن جانە مەملەكەت باسشىسى قاسىم-جومارت توقاەۆتىڭ سايلاۋالدى باعدارلاماسىنىڭ 10 ماڭىزدى باعىتىن ىسكە اسىرۋدى قامتاماسىز ەتۋگە باعىتتالاتىن بولادى.
