شارانىڭ ماقساتى - حالقىمىزدىڭ ۇلتتىق اسپابىن جان-جاقتى ناسيحاتتاپ, دومبىرا ەرەكشەلىگىن كوپشىلىككە جەتكىزۋ بولىپ تابىلدى. مۋزەي ديرەكتورى, اقىن قايرات سابىربايدى ايتۋىنشا, دومبىرا كوشپەندى حالىقتىڭ رۋحاني جاعدايىن, تۇرمىسى مەن تاريحي شىندىعىن سيپاتتاۋعا مۇمكىندىك بەرەتىن قارىم-قاتىناستىڭ وزىندىك ءتىلى بولىپ تابىلاتىن ۇلتتىق اسپاپ.
-دانالارىمىز بەن دارالارىمىزعا سەرىك بولعان, حالقىمىزدىڭ ءۇنىن عاسىرلار بويى اسقاقتاتىپ كەلە جاتقان اسپابىمىزدى ۇرپاققا ۇلگى ەتۋ ءبىزدىڭ اسىل پارىزىمىز,-دەدى ديرەكتور قايرات سابىرباي,-دومبىرا كورمەسىنە ولكەمىزدەن شىققان ەلىمىزگە تانىمال ۇلت قايراتكەرلەرى جانىبەك كارمەنوۆ, كەلدەنباي ولمەسەكوۆ, بولات سىبانوۆ سىندى تۇلعالار مەن ونەر سالاسىنىڭ مايتالماندارىنىڭ جانە بۇگىندە ايتىس ساحناسىندا ونەر كورسەتىپ جۇرگەن تانىمالى ايتىسكەر اقىنداردىڭ دومبىرالارى قويىلدى. ۇلتتىڭ اسپاپتىڭ «ءان دومبىراسى», «كۇي دومبىراسى» سەكىلدى بىرنەشە تۇرگە بولىنەتىنىن جانە دومبىرا قۇرىلىسى تۋرالى دەرەكتەردى وسى كورمەدەن بايقاۋعا بولادى. سونىمەن بىرگە, قانداي اعاش تۇرلەرىنەن جاسالاتىنى تۋرالى دا اقپاراتتار بەرىلگەن.
تاريحي-ولكەتانۋ مۋزەيىندە وتكەن كورمەنىڭ اشىلۋ قۇرمەتىنە قالامىزدىڭ بەلگىلى ونەر قايراتكەرلەرى, انشىلەرى مەن كۇيشىلەرى ونەر كورسەتىپ, ەستەلىكتەرىن ايتتى. دومبىرامەن سۇيەمەلدەپ, ءان-كۇي ورىنداۋشىلار بەرىك وماروۆ, باتىر فارحاتوۆ جانە №1 مۋزىكالىق مەكتەپ وقۋشىلارى دا شاراعا بەلسەنە قاتىسىپ ءوز ونەرلەرىن ورتاعا سالدى. مەملەكەتتىڭ كەلەشەگى بۇگىنگى ۇرپاق ەكەنىن ەسكەرسەك, جاس بۋىننىڭ ۇلتتىق اسپاپتى قادىرلەۋگە, رۋحاني قۇندىلىققا تەرەڭ بويلاۋىنا بۇل شارانىڭ بەرەرى كوپ بولدى. كەش بارىسىندا اقىندار ارناۋ ايتىپ, حالىقپەن بىتە قايناسىپ كەتكەن دومبىرا تاريحىن جىرعا قوستى.
راۋشان نۇعمانبەكوۆا
«ەgemen Qazaqstan»
سەمەي
