كەشەننىڭ اشىلۋ سالتاناتىندا ەلباسى ن.نازارباەۆتىڭ جولداعان قۇتتىقتاۋ حاتى وقىلدى. «كونە دە قاسيەتتى ماڭعىستاۋدا سان قيلى سىن ساعاتتارىندا ۇران وتىن جاققان كارى سەڭگىر وتپان تاۋدىڭ بۇگىندە ماڭگىلىك وتىن مازداتار تاعزىم بيىگىنە اينالۋى جان سۇيسىنەر جاڭالىق, وتكەنگە دەگەن قۇرمەت – بولاشاققا دەگەن جاۋاپكەرشىلىكتىڭ بيىك ونەگەسى دەر ەدىم. بۇل كەشەن ءتۇبى تەرەڭ تاريحىمىزدى ۇرپاقتارىمىزدىڭ ەسىنە سالىپ, جۇرەكتەرىنە يماندىلىق نۇرىن سەۋىپ, ۇلى مۇراتتارعا ۇندەپ تۇراتىن بولادى. ول, سونداي-اق ماڭعىستاۋ وڭىرىنە جولى تۇسەتىن قازاقستاندىقتار مەن شەتەلدىك تۋريستەردىڭ دە ارنايى ىزدەپ بارىپ ءتاۋ ەتەتىن قاسيەتتى مەكەنجايىنا اينالادى دەپ ۇمىتتەنەمىن» دەگەن بولاتىن.
ايتقانداي-اق كوپتەگەن مادەني, تانىمدىق, پاتريوتتىق جانە رۋحاني كوپشىلىك شارالاردىڭ ىزگى ورداسىنا اينالىپ ۇلگەرگەن كەشەندە قىسى-جازى ۇرپاقتى تاربيەلەۋ, وتكەندى جاڭعىرتۋ باعىتىنداعى جۇمىستار جالعاسىن تاۋىپ كەلەدى. الىس-جاقىننان كەلگەن تۋريستەردىڭ ات باسىن تىرەر نۇكتەسىنە اينالدى. ەلىمىزدە جۇرگىزىلىپ جاتقان «رۋحاني جاڭعىرۋ» باعدارلاماسىنىڭ ماقسات-مىندەتىمەن ۇندەس شارالاردىڭ قىزۋ ورداسىنا اينالعان.
قىستا ساياتشىلار مەن قۇسبەگىلەرگە ارنالعان «سالبۋرىن», كوكتەمدە ولكەمىزدە جاڭا جىل بوپ ەسەپتەلەتىن «امال» مەرەكەسى, ەكىنشى دۇنيەجۇزىلىك سوعىسقا قاتىسقان باتىر جەرلەستەردىڭ ەرلىگىنە ارنالعان «ەر ەسىمى وشپەيدى ەل ەسىنەن», «اعادان – اقىل, اتادان – باتا» اتتى اقىندار كەزدەسۋى, جازدا جاستارعا ارنالعان «اي استىندا التىباقان» اتتى ەتنوگرافيالىق شارالار ءداستۇرگە اينالىپ, تۇراقتى وتكىزىلىپ كەلەدى.
كەلەشەككە جوسپارلانعان تاتىمدى شارالار دا از ەمەس. سولاردىڭ ءبىرى – بيىل كۇزدە ماڭعىستاۋ وبلىستىق اۋىلشارۋاشىلىق باسقارماسىمەن بىرىگىپ ەگىنشىلەر مەن مالشىلارعا ارنالعان «ەڭبەك مەرەيى» مەرەكەسىن وتكىزۋ.
ماڭعىستاۋ – تۋريستىك الەۋەتتى ارتتىرۋعا زور مۇمكىندىگى بار ولكە, وعان مەملەكەت تاراپىنان قولداۋ كورسەتىلىپ تە كەلەدى. دالا كەزىپ, ماڭعىستاۋدىڭ تابيعاتىن تاماشالاپ جۇرگەن ءاربىر تۋريست وتپان تاۋعا كەلمەي كەتپەيدى. شەتتەن كەلگەن تۋريستەرگە قىزمەت كورسەتۋدە ولقى سوعاتىن تۇستار – قۇزىرلى ورىندارعا قانشا ايتقانمەن, ءالى شەشىمىن تاپپاي كەلە جاتىر.
كەلىم-كەتىم قوناقتاردىڭ جايعاسۋى ءۇشىن قاجەتتى شاعىن قوناقۇي, نامازحانا, كولىك پەن عالامتور جەلىسى, جول ماسەلەسى, سونداي-اق زاماناۋي اجەتحانا قازىرگى تاڭدا كەشەن ءۇشىن قاجەتتى نىساندار بولىپ تۇر جانە كەشەن باسشىلىعىنىڭ ايتۋىنشا, شەشىمىن تاپپاي كەلەدى.
