جاۋاپسىزدىققا ۇرىنعاندار جازاسىز قالمايدى
بەيسەنبى, 25 ءساۋىر 2013 2:33
قازىر ەلىمىزدە بولىپ جاتقان جول-كولىك وقيعالارىندا ەسەپ جوق. ولاردىڭ بازبىرەۋلەرى تۋرالى ەستىگەندە توبە شاشىڭ تىك تۇرادى. بۇلاردىڭ كوپشىلىگىندە جۇرگىزۋشىلەردىڭ جاۋاپسىزدىعىنان قانشاما ادام ولىمگە ۇشىراپ جاتادى.
مىنا وقيعا دا سولاردىڭ ءبىرى جايلى دەرەك بىلدىرەدى.
بەيسەنبى, 25 ءساۋىر 2013 2:33
قازىر ەلىمىزدە بولىپ جاتقان جول-كولىك وقيعالارىندا ەسەپ جوق. ولاردىڭ بازبىرەۋلەرى تۋرالى ەستىگەندە توبە شاشىڭ تىك تۇرادى. بۇلاردىڭ كوپشىلىگىندە جۇرگىزۋشىلەردىڭ جاۋاپسىزدىعىنان قانشاما ادام ولىمگە ۇشىراپ جاتادى.
مىنا وقيعا دا سولاردىڭ ءبىرى جايلى دەرەك بىلدىرەدى.
بۇل وقيعا وتكەن جىلعى قىركۇيەكتىڭ 30-ى كۇنى جەرگىلىكتى ۋاقىت بويىنشا ساعات 18.30 شاماسىندا ورىن الدى. وسى ساتتە وبلىستىڭ جاڭاقورعان اۋدانى اۋماعىنداعى تاس جولدىڭ بويىمەن قۇيعىتىپ كەلە جاتقان جۇرگىزۋشى نۇرلان ءابدىرامانوۆ كەنەت ءوزىنىڭ باسقارۋىنداعى «Nissan Murano» كولىگىنىڭ تىزگىنىنە يە بولا الماي, جول جيەگىنەن اسىپ اۋناپ ءتۇستى.
ەڭ قايعىلىسى سول, كولىك اۋدارىلعان كەزدە ونىڭ سالونىندا وتىرعان ينديرا ابيەۆا جانە نۇربينا ەسپەنبەتوۆا ەسىمدى ەكى جولاۋشى بىردەن ءتىل تارتپاي كەتتى. وسىعان بايلانىستى قىلمىستىق ءىس قوزعالدى. بىراق الدىن الا تەرگەۋ بارىسىندا جابىرلەنۋشى مەن سەزىكتىنىڭ تولىق كەلىسىمگە كەلۋلەرىنە وراي قىلمىستىق ءىس وندىرىستەن قىسقارتىلعان.
ايتكەنمەن, ارادا ءبىرشاما ۋاقىت وتكەننەن كەيىن قازا بولعانداردىڭ ءبىرىنىڭ اناسى گ.ابيەۆا اۋداندىق پروكۋراتۋراعا ارىز جازىپ, قابىلدانعان شەشىممەن كەلىسپەيتىنىن جەتكىزدى. سەبەبى, سەزىكتى ن.ءابدىرامانوۆ مارقۇم بولعان قىزىنىڭ قىرقىن, ءجۇزىن, جىلىن وتكىزۋگە تولىق كومەكتەسەمىن دەپ ۋادە بەرگەنىنە قاراماستان, كۇيەۋى ب.ابيەۆتەن الداپ كەشىرىم الىپ, قاراسىن كورسەتپەي كەتكەن. سونىمەن قاتار, وبلىستىق ىشكى ىستەر دەپارتامەنتى انىقتاۋ باسقارماسىنىڭ سەزىكتى ن.ابدىرامانوۆقا قر قك-ءنىڭ 67-بابى 2-بولىگىنىڭ تالاپتارىن قولدانۋدا وقيعا سالدارىنان ەكى ادامنىڭ ولىمگە ۇشىراعانىن نازاردان تىس قالدىرعانى انىقتالدى.
وسىعان وراي جاڭاقورعان اۋداندىق پروكۋراتۋراسى اعا انىقتاۋشى ت.نۇرىمبەتوۆتىڭ قىلمىستىق ءىستى وندىرىستەن قىسقارتۋ تۋرالى قاۋلىسىنىڭ كۇشىن جويىپ, ءىستى وبلىستىق انىقتاۋ باسقارماسىنا تەرگەۋدى جاڭعىرتۋ ءۇشىن كەرى جولدادى. ناتيجەسىندە, باسقارما اتالعان قىلمىستىق ءىستى قايتا قولعا الىپ, قوسىمشا تەرگەۋ امالدارىن ۇيىمداستىردى. وسى بويىنشا ن.ابدىرامانوۆقا قك 296-بابى 3-بولىگىمەن ايىپ تاعىلىپ, جاڭاقورعان اۋداندىق سوتىنا جولداندى. ال سوت ن.ءابدىرامانوۆتى تاعىلعان ايىپ بويىنشا كىنالى دەپ تانىپ, ونى 5 جىل مەرزىمگە باس بوستاندىعىنان ايىرۋعا ۇكىم شىعاردى. سونىمەن قاتار, وعان قك-ءنىڭ 63-بابى قولدانىلىپ, 2 جىل سىناق مەرزىمىنە جىبەرىلدى.
جاڭاقورعان اۋدانى پروكۋرورىنىڭ كومەكشىسى رۋسلان الاتاەۆتىڭ حابارلاۋىنشا, اۋداندىق پروكۋراتۋرا اتالعان ارىزدى قاراۋ بارىسىندا قىلمىستىق ءىس بويىنشا زاڭ بۇزۋشىلىقتاردى انىقتاپ, وبلىستىق انىقتاۋ باسقارماسىنىڭ اعا انىقتاۋشىسى, پوليتسيا پودپولكوۆنيگى ت.نۇرىمبەتوۆتىڭ تارتىپتىك جاۋاپكەرشىلىگىن شەشۋ ءۇشىن تارتىپتىك ءوندىرىس قوزعاعان. ونىڭ قارالۋ قورىتىندىسى بويىنشا وبلىستىق ءىىد باستىعىنىڭ بۇيرىعىمەن اتالمىش قىزمەتكەرگە ەسكەرتۋ بەرىلدى.
ەرجان بايتىلەس,
«ەگەمەن قازاقستان».
قىزىلوردا وبلىسى.
