قر پرەمەر-ءمينيسترى ا. ءماميننىڭ توراعالىعىمەن وتكەن ۇكىمەت وتىرىسىندا پرەمەر-ءمينيستردىڭ ءبىرىنشى ورىنباسارى – قارجى ءمينيسترى ءا. سمايىلوۆ 2019 جىلعا ارنالعان رەسپۋبليكالىق بيۋدجەتتى ناقتىلاۋ جونىندەگى زاڭ جوباسىن تانىستىردى.
ءا. سمايىلوۆتىڭ ايتۋىنشا, مەملەكەت باسشىسىنىڭ قازاقستاندىقتاردىڭ ءال-اۋقاتىن ارتتىرۋ جانە الەۋمەتتىك ماسەلەلەردى شەشۋ جونىندەگى تاپسىرمالارىن ىسكە اسىرۋ, سونداي-اق, پرەزيدەنتتىڭ 26 ماۋسىمداعى «قازاقستان رەسپۋبليكاسى ازاماتتارىنىڭ بورىش جۇكتەمەسىن ازايتۋ شارالارى تۋرالى» جارلىعىن ىسكە اسىرۋ ماقساتىندا ۇكىمەت 2019 جىلعا ارنالعان رەسپۋبليكالىق بيۋدجەتتى ناقتىلاۋ جونىندەگى زاڭ جوباسىن ازىرلەدى.
«ناقتىلاۋدى بيىلعى ءساۋىر ايىندا تۇزەتىلگەن, 2019 جىلعا ارنالعان ەلىمىزدىڭ الەۋمەتتىك-ەكونوميكالىق دامۋ بولجامىنىڭ كورسەتكىشتەرىن ساقتاي وتىرىپ جۇرگىزۋ ۇسىنىلادى», — دەدى ءا. سمايىلوۆ.
2019 جىلعا ارنالعان رەسپۋبليكالىق بيۋدجەتتىڭ نەگىزگى پارامەترلەرى وزگەرىسسىز قالادى: تۇسىمدەر – 10,5 ترلن تەڭگە; شىعىستار – 11,9 ترلن تەڭگە; تاپشىلىق – 1,4 ترلن تەڭگە نەمەسە جالپى ىشكى ونىمگە 2,1 %.
پرەزيدەنتتىڭ تاپسىرمالارىن قارجىلىق قامتاماسىز ەتۋ تىكەلەي ينۆەستيتسيالار قورىن قۇرۋعا كوزدەلگەن قاراجاتتىڭ ءبىر بولىگىن قايتا ءبولۋ ەسەبىنەن ىسكە اسىرىلاتىن بولادى (370 ملرد تەڭگەدەن 300 ملرد تەڭگە).
بيۋدجەتتىڭ شىعىس بولىگىن ناقتىلاۋ ءۇش باعىت بويىنشا جۇزەگە اسىرىلدى.
ءبىرىنشى. حالىقتىڭ تۇتىنۋشىلىق نەسيەلەرى بويىنشا بورىش جۇكتەمەسىن ازايتۋ.
ومىرلىك قيىن جاعدايدا قالعان ازاماتتار ساناتىنا جاتقىزىلعان ءاربىر قارىز الۋشى ءۇشىن تىكەلەي جانە اتاۋلى قارجىلىق كومەك رەتىندە مەملەكەت 300 مىڭ تەڭگەگە دەيىنگى جالپى مولشەردە نەگىزگى بورىشتى جانە ول بويىنشا ەسەپتەلگەن سىياقىنى وتەيدى. وسى ماقساتتارعا جوبا 88,5 ملرد تەڭگە سوماسىندا شىعىستاردى قاراستىرىپ وتىر.
ەكىنشى. جۇمىسپەن قامتۋ, از قامتىلعان, كوپ بالالى وتباسىلار مەن جاستاردى قولداۋ بويىنشا پارمەندى شارالاردى كەڭەيتۋ جانە كۇشەيتۋ.
بۇل ماقساتتارعا 138,6 ملرد تەڭگە باعىتتالاتىن بولادى, ونىڭ ىشىندە:
-
1,5 ملرد تەڭگە وسى جىلدىڭ 1 قىركۇيەگىنەن باستاپ از قامتىلعان جانە كوپ بالالى وتباسىلاردان شىققان بالالار ءۇشىن جوعارى وقۋ ورىندارىنا قوسىمشا 5 مىڭ ءبىلىم بەرۋ گرانتتارىن بولۋگە;
-
2,4 ملرد تەڭگە وسى جىلدىڭ 1 قىركۇيەگىنەن باستاپ تەحنيكالىق جانە كاسىپتىك ءبىلىم بەرۋدە جۇمىسشى ماماندىعى بويىنشا وقىپ جۇرگەن ستۋدەنتتەردىڭ ستيپەدياسىن 30 پايىزعا ۇلعايتۋعا. بۇل 122 مىڭ وقۋشىنى قامتيدى;
-
49,2 ملرد تەڭگە «باستاۋ بيزنەس», قىسقا مەرزىمدى كاسىپتىك ءبىلىم بەرۋ تەتىكتەرى ارقىلى جۇمىسسىزدار مەن ءوزىن-ءوزى جۇمىسپەن قامتىعانداردى جۇمىسپەن قامتۋعا جاردەمدەسۋ شارالارىمەن قامتاماسىز ەتۋگە, سونداي-اق «ەڭبەك» باعدارلاماسى بويىنشا اۋىلداردا شاعىن نەسيە بەرۋ كولەمىن جانە ستارتاپ جوبالارعا بەرىلەتىن گرانتتار سانىن ۇلعايتۋعا;
-
14,4 ملرد تەڭگە نۇر-سۇلتان, الماتى, شىمكەنت قالالارىندا 10 مىڭ ادامدى قامتي وتىرىپ جۇمىس ىستەيتىن جاستار ءۇشىن ساتىپ الۋ قۇقىعىنسىز جالعا بەرىلەتىن تۇرعىن ءۇي سالۋ كولەمىن 1 مىڭ پاتەردەن 3 مىڭ پاتەرگە دەيىن ۇلعايتۋعا;
-
70 ملرد تەڭگە اتاۋلى الەۋمەتتىك كومەك تولەمدەرىن وسى جىلدىڭ 1 ساۋىرىنە كوشىرۋگە بايلانىستى قاراجاتتىڭ قاجەتتىلىگىن جابۋعا;
-
1,1 ملرد تەڭگە تەحنيكالىق جانە كاسىپتىك ءبىلىم بەرۋ مەكەمەلەرى, جوعارعى وقۋ ورىندارى ستۋدەنتتەرىن وقىتۋعا.
ءۇشىنشى. جوبادا ۇكىمەت رەزەرۆىن 72,9 ملرد تەڭگەگە ۇلعايتۋ ۇسىنىلادى. اتالعان قاراجاتتىڭ ءبىر بولىگى ارىس قالاسىنداعى توتەنشە جاعدايدىڭ سالدارلارىن جويۋعا باعىتتالاتىن بولادى.
بۇدان وزگە, 35,9 ملرد تەڭگە كولەمىندە قاراجاتتى ىشكى قايتا ءبولۋ ەسەبىنەن كەيىنگە قالدىرۋعا بولمايتىن شەشىمدەردى تالاپ ەتەتىن بىرقاتار مىندەتتەمەلەر قارجىلاندىرىلاتىن بولادى.
«بارلىق ازىرلەنگەن الەۋمەتتىك شارالار ماڭىزدى. زاڭ جوباسىن پارلامەنت قاراۋىنا باعىتتاۋدى ۇسىنامىز», — دەپ تۇيىندەدى ءا. سمايىلوۆ.
مەملەكەت باسشىسىنىڭ جارلىعىن ىسكە اسىرۋ, سونىڭ ىشىندە كەپىلسىز تۇتىنۋشىلىق زايم بەرۋدى رەتتەۋ شارالارى بويىنشا ۇلتتىق بانك قابىلداپ جاتقان قوسىمشا شارالار تۋرالى ۇلتتىق بانك توراعاسى ە. دوساەۆ ايتىپ بەردى.
ونىڭ ايتۋىنشا, قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ «قازاقستان رەسپۋبليكاسى ازاماتتارىنىڭ بورىش جۇكتەمەسىن ازايتۋ شارالارى تۋرالى» جارلىعىن ىسكە اسىرۋ ماقساتىندا قر ۇلتتىق بانكى ۇكىمەتپەن, بانكتەرمەن جانە شاعىن قارجى ۇيىمدارىمەن بىرلەسىپ, 2019 جىلعى 1 ماۋسىمداعى جاعداي بويىنشا كەپىلسىز تۇتىنۋشىلىق قارىزدار بويىنشا 300 مىڭ تەڭگەدەن اسپايتىن سومادا ومىرلىك قيىن جاعدايدا قالعان ازاماتتاردىڭ بەرەشەگىن وتەۋ تەتىگىن ازىرلەدى.
