«ارىس تۇرعىندارى ءوز قالالارىنا ورالا باستادى. قازىر ولارعا ەڭ الدىمەن ازىق-ت ۇلىك, جەكە گيگيەنالىق قۇرالدار, كيىم-كەشەك قاجەت. وسىنداي قيىن ۋاقىتتا جۇدىرىقتاي جۇمىلا بىلگەن بارلىق قالا تۇرعىندارىنا العىسىمدى بىلدىرەمىن. اپات بولعان العاشقى ەكى كۇندە مەملەكەتتىك ورگاندار مەن كاسىپورىندار ارىسقا كومەك رەتىندە ءبىر كۇندىك ەڭبەكاقى ەسەبىنەن 200 ملن تەڭگە اۋداردى. كەشە 3 جۇك كولىگى شىققان, بۇگىن تورتەۋىن اتتاندىرىپ وتىرمىز. ال ەرتەڭ تاعى 3 جۇك كولىگىن جىبەرەمىز», دەدى وتكەن جۇمادا جولعا شىققان كومەك كەرۋەنىن شىعارىپ سالۋعا كەلگەن نۇر-سۇلتان قالاسى اكىمىنىڭ ورىنباسارى ەرلان كاناليموۆ.
«جاس سارباز» جاسوسپىرىمدەر اسكەري-پاتريوتتىق قوزعالىسىنىڭ نۇر-سۇلتان قالالىق فيليالىنىڭ توراعاسى اسحات نالشىبەكتىڭ ايتۋىنشا, استانالىق تۇرعىندار ارىستاعى اعايىنعا بارىنشا بەلسەندى كومەك جيناپ جاتىر. «ەلوردا حالقى ارىستاعى اپاتتى كۇيزەلە قابىلداعانىن كومەكتەسۋگە نيەتتى ادامداردىڭ مولدىعىنان بايقاۋعا بولادى. ءوزىم دە ارىستىڭ تۋماسىمىن. وسىندا وقۋعا ءتۇسىپ, جۇمىسقا ورنالاستىم. قيىن كەزدە زارداپ شەككەن جۇرتقا كومەك قولىن سوزىپ جاتقان نۇرسۇلتاندىقتارعا ارىستىڭ تۋماسى رەتىندە العىس ايتامىن. ءوز زامانداستارىمىز قارجىلاي كومەك جيناۋ ءۇشىن بىرلەسىپ بارىپ قان دا تاپسىردى. سونىڭ اقشاسىن كورپوراتيۆتىك قورعا اۋداردى», دەيدى ول.
ەرلان كاناليموۆ ارىس قالاسىنداعى ۇيلەردى قالپىنا كەلتىرۋگە 19 قۇرىلىس جاساعى قاتىساتىنىن ايتتى. «قالا اكىمىنىڭ تاعى ءبىر ورىنباسارى قۇرىلىس ماماندارىمەن ارىستا ءجۇر. ءبىزدىڭ ۇسىنىسىمىزدى ەلوردانىڭ قۇرىلىس كومپانيالارى قولداپ, 19 قۇرىلىس جاساعى قۇرىلدى. ءار جاساقتا كەمىندە 10 مامان بار. قۇرىلىس ماتەريالدارىن دا ءوزىمىز الىپ بارامىز. الدىمەن ءۇي يەلەرىمەن بىرگە ءار ءۇيدىڭ اقاۋ اكتىسى جاسالادى. سول بويىنشا بىزگە بولىنگەن 9-سەكتورداعى 500 ءۇيدىڭ قايسىسىن جوندەۋ كەرەكتىگى انىقتالادى. 19 جاساق پالاتا قالاشىعىندا جاتىپ, ءبىر ايدىڭ ىشىندە ۇيلەردى قالپىنا كەلتىرەدى. 50 ەرىكتى جاس بارىپ, تۇرعىنداردىڭ كوشۋىنە كومەكتەسەدى. قازىردىڭ وزىندە 50 ەرىكتى ستۋدەنت مەديتسينالىق كومەك كورسەتىپ ءجۇر», دەدى اكىمنىڭ ورىنباسارى.
مايگۇل سۇلتان,
«Egemen Qazaqstan»
