ش.ساريەۆ اتىنداعى اتىراۋ وبلىستىق كوركەمسۋرەت جانە قولدانبالى ساندىك ونەر مۋزەيىندە قر سۋرەتشىلەر بىرلەستىگىنىڭ مۇشەسى, بەلگىلى سۋرەتشى مۇراتبەك جولاماننىڭ «رۋحپەن سىرلاسۋ» اتتى كورمەسى ءوتتى. شاراعا قازاقستان جانە قىرعىزستان رەسپۋبليكالارىنىڭ ەڭبەك سىڭىرگەن قايراتكەرى, كومپوزيتور, سۋرەتشى ءىليا جاقانوۆ, قر ەڭبەك سىڭىرگەن قايراتكەرى, مەملەكەتتىك سىيلىقتىڭ يەگەرى اقۇشتاپ باقتىگەرەەۆا, قر سۋرەتشىلەر وداعىنىڭ توراعاسى ومىربەك جۇبانيازوۆ پەن مۇراتبەك جولاماننىڭ جۇبايى گۇلجامىش باكەيقىزى قاتىستى.
مۋزەي قابىرعاسىنان ورىن العان سۋرەتشىنىڭ كارتينالارىنان مەنمۇندالاعان رۋحتى, جىگەر مەن قايسارلىقتى اڭعارماۋ مۇمكىن ەمەس.
- وتاندىق بەينەلەۋ ونەرىندە وزىندىك ءىز قالدىرعان مۇراتبەك تاۋفيق ۇلى نەگىزىنەن تاريحي تاقىرىپتارعا باسىمدىق بەردى. قاي كارتيناسىنا دا ۇلكەن جاۋاپكەرشىلىكپەن, دايىندىقپەن بارعانى بايقالادى. ەلباسىنىڭ «رۋحاني جاڭعىرۋ» باعدارلاماسى اياسىندا وسىنداي ونەر يەلەرىنىڭ شىعارماشىلىقتارىن ناسيحاتتاۋ, ەستەتيكالىق تاربيە بەرۋ – ءبىزدىڭ جۇمىسىمىزدىڭ باستى ماقساتى, - دەيدى مۋزەي باسشىسى تولەگەن ورىنباسار ۇلى.
سۋرەتشى مۇراتبەك جولامان 1966 جىلى باتىس قازاقستان وبلىسىندا دۇنيەگە كەلگەن. ت.جۇرگەنوۆ اتىنداعى قازاق ۇلتتىق ونەر اكادەمياسىن بىتىرگەن. 2000 جىلى ومىردەن وزدى. قازىر سۋرەتشىنىڭ جۇمىستارى انگليا, پولشا, كورەيا, تۇركيا ەلدەرىندەگى مۋزەيلەردە ساقتاۋلى. «قۇلاگەر», «ەدىل-جايىق», «سارىن», «تۇمار», «قورقىتتىڭ تەڭىزگە كەلۋى», «قىزعىش قۇس», «اتتيلانىڭ ەلەسى» سەكىلدى باسقا دا كارتينالارى سۋرەتشىنىڭ بيىك ورەسىن, جوعارى تالعامى مەن قالام قۋاتىن انىق اڭعارتادى. اتىراۋلىقتار كورمەنى ءبىر اي بويى تاماشالاي الادى.
