ەكى ۇلىمىز ۋنيۆەرسيتەت پەن كوللەدجدە, قىزىمىز مەكتەپتە وقيدى. كەنجەمىز بالاباقشاعا بارادى. ءوزىم جۇرگىزۋشى بولىپ جۇمىس ىستەيمىن. ايەلىم بيىل جۇرەك تالماسى كەسەلىنە ۇشىراپ, جۇمىستان قول ۇزۋىنە, ەكى رەت وتا جاساتۋعا تۋرا كەلدى. پاتەر جالداپ تۇرىپ جاتقان جايىمىز بار. كەزەككە تۇرعانىمىزبەن, قاشان جەتەرىمىز بەلگىسىز. ازىن-اۋلاق تابىس باسپانا تولەمىنەن, بالا-شاعانىڭ تاماعى مەن كيىمىنەن ارتىلمايدى. Nur Otan پارتياسىنىڭ وبلىستىق فيليالى وتىنىشىمە قۇلاق اسىپ, ۋنيۆەرسيتەتتە ءبىلىم الاتىن بالامنىڭ ءبىر جىلدىق وقۋ شىعىنىن وتەپ بەرۋگە كومەكتەسىپ, ۇلكەن شاراپاتىن تيگىزدى.
تىعىرىقتان شىعۋدىڭ جولىن اركىم وزىنشە ىزدەستىرىپ, جاقسى ءومىر سۇرۋگە قاراي تالپىنادى عوي. بالكىم وتباسىلىق جاعدايىمىز تۇزەلىپ كەتەر, الەۋمەتتىك ماسەلەلەردى شەشۋگە وڭ ىقپالى ءتيىپ قالار دەگەن ءۇمىتپەن نەسيە الىپ ەدىك, شىنى كەرەك, ۇلكەن قيىندىققا تاپ بولدىق. بانك الدىنداعى قارىزدى ۋاقىتىلى قايتارا الماي, ابدەن اۋرە-سارساڭعا تۇستىك. كۇندىز كۇلكىدەن, تۇندە ۇيقىدان ايىرىلىپ, نە ىستەرىمىزدى بىلمەي ءجۇرگەنىمىزدە پرەزيدەنت قاسىم-جومارت توقاەۆتىڭ كوپ بالالى وتباسىلاردىڭ, الەۋمەتتىك جاعدايى تومەن, از قامتىلعان جانداردىڭ شاعىن نەسيەلەرىنە جەڭىلدىكتەر قاراستىرۋ تۋرالى جارلىعىن ەستىپ, باستاپقىدا سەنەر-سەنبەسىمدى بىلمەي, ءارى-ءسارى كۇي كەشتىم. ۇلكەن ۇلىم ءمان-جايدى تۇسىندىرگەننەن كەيىن عانا كوڭىلىم بايىز تاۋىپ, ورنىنا ءتۇستى. مەن بۇل قادامدى تۇرمىسى اۋىر وتباسىلار ءۇشىن مەملەكەت تاراپىنان جاسالىپ وتىرعان زور قامقورلىق دەپ ءتۇسىنەمىن. ءبارىنەن دە دەنساۋلىق جاعدايىنا بايلانىستى مۇگەدەكتىك الۋعا قۇجاتتارىن وتكىزىپ قويعان ايەلىمنىڭ قۋانىشىن ايتساڭشى! ول قازىر ءوزىن قۇلانتازا جازىلىپ كەتكەندەي سەزىنىپ, جۇزىنە كۇلكى ۇيىرىلە باستادى. داستارقان باسىنداعى اڭگىمەمىز دە جاراسىپ, ەندى نەسيە الماق تۇگىلى اتىن دا اتاماسپىز دەپ قالجىڭداسىپ قويامىز.
ەلىمىز بويىنشا الەۋمەتتىك جاعدايى تومەن 100 مىڭ ادامنىڭ نەسيەسىن وتەۋگە وراي شىعارىلعان پرەزيدەنت پارمەنى كوڭىلدەرگە جىلىلىق ساۋلەسىن شاشىپ, بانكتەر الدىنداعى بەرەشەكتەرى اقىسىز-پۇلسىز وتەلەرىنە قاتتى قۋانىشتى.
قۇتتىباي ابىلەۆ,
كوپ بالالى اكە
سولتۇستىك قازاقستان وبلىسى
