ءبىز – كوپ بالالى وتباسىمىز. ءتورت بالام دا مەكتەپتە وقيدى. كۇيەۋىم مەملەكەتتىك مەكەمەدە جۇرگىزۋشى, ءوزىم دە تەرەكتى اۋدانى اكىمدىگىندەگى ءبىر بولىمدە حاتشى بولىپ قىزمەت ەتەمىن. ەكەۋمىزدىڭ دە ايلىق ەڭبەكاقىمىز ەلدەگى ەڭ تومەنگى جالاقى قاتارىنا جاتادى. ونىڭ ۇستىنە پاتەر جالداپ تۇرامىز.
ءومىر بولعان سوڭ باسىمىزدان ءتۇرلى جاعداي وتكەرىپ جاتامىز عوي. 2014 جىلى ەكىنشى دەڭگەيلى بانكتەردىڭ بىرىنەن تۇرمىس قاجەتى ءۇشىن 300 مىڭ تەڭگە نەسيە الدىم. ءۇش جىلعا ەسەپتەپ العان نەسيەمدى 1,5 جىلداي ۋاقتىلى تولەپ تۇردىم. 2016 جىلى كۇيەۋىم اياق استىنان جۇمىسسىز قالدى. قينالدىق. نەسيەنى ۋاقىتىندا تولەۋ تۇگىلى, كۇندەلىكتى تۇرمىس قاجەتىن تابۋ قيىن بولدى. ءسويتىپ, ويلاماعان جەردەن بانككە بورىشتى بولدىق.
ارينە «الماقتىڭ دا سالماعى» بارىن تۇسىنەمىز. بىراق كۇتپەگەن كەدەرگى جوسپاردى بۇزدى. وسىنداي قيىن جاعدايعا تاپ بولدىق. ودان بەرگى سوت شەشىمدەرى جىعىلعانعا جۇدىرىق بولدى. بۇگىنگى ناتيجەسى – بانككە ءالى 400 مىڭ تەڭگەدەي بورىشتىمىن. ونىڭ ۇستىنە سوت ورىنداۋشىسىنا 80 مىڭ تەڭگە تولەۋگە ءتيىستىمىن. قازىر اي سايىن ونسىز دا از جالاقىمنىڭ تەڭ جارىمى سوت شەشىمى بويىنشا «ۇستالىپ», قارىزدى وتەۋگە اۋدارىلىپ وتىرادى.
مىنە, پرەزيدەنتىمىز ايتقان «ومىرلىك قيىن جاعدايدا قالعان قازاقستان رەسپۋبليكاسى ازاماتتارىنىڭ» ءبىرى ءبىز عوي دەپ ويلايمىن. مەملەكەت باسشىسى جارلىعىنىڭ ماقساتى – قيىن جاعدايعا تاپ بولعان ازاماتتارعا كومەكتەسۋ, ولارعا وزدەرىنىڭ وتباسىلارىنىڭ قارجىلىق احۋالىن ايتارلىقتاي جاقسارتۋعا ءمۇمكىندىك بەرۋ ەكەنى ءسوزسىز. شىنىمەن دە بۇل ۇلكەن كومەك بولماق!
ايتا كەتەيىن, ءبىزدىڭ وتباسى ءبىراز جىلدان بەرى تۇرعىن ءۇي كەزەگىندە تۇرمىز. تەرەكتى اۋدانى ورتالىعىندا سۋ جاڭا ءۇش قاباتتى تۇرعىن ءۇي قۇرىلىسى اياقتالۋعا جاقىن قالدى. بۇيىرسا, وسى ۇيدەن ءۇش بولمەلى پاتەر تيەدى دەپ قۋانىپ, ءوز باسپانامىزدىڭ تابالدىرىعىنان اتتار ءساتتى كۇن ساناپ كۇتىپ جۇرگەن ەدىك. بۇگىنگى جىلى حابار جۇرەگىمىزدى ودان سايىن جىلىتتى. مەملەكەتتىڭ ەلدەگى كوپ بالالى وتباسىلارىنا قامقورلىعى كۇن ساناپ كۇشەيىپ كەلەدى. ءبىز وسىنى سەزىنىپ وتىرمىز.
البينا ساربوپەەۆا,
كوپ بالالى انا
باتىس قازاقستان,
تەرەكتى اۋدانى
