جارىسقا ەلىمىزدىڭ 25 قالاسىنان بولەك, رەسەي, ۋكراينا, بەلارۋس ەلدەرىنەن 300-دەن استام ويى مەن قولى جۇيرىك ينتەللەكتۋال ازامات قاتىستى.
– جارىس WCA (World Cube Association) ۇيىمى بەكىتكەن 18 ەرەجەنىڭ 16-سى بويىنشا ءوتتى. قاتىسۋعا نيەت بىلدىرگەندەردىڭ باسىم كوپشىلىگى وزدەرىنىڭ باقتارىن العاش رەت سىناپ وتىر, جاس ەرەكشەلىكتەرى دە ءارتۇرلى. ەڭ كىشى ۇمىتكەرىمىز 6 جاستا بولسا, ەرەسەگىمىز – 51-دە. وسىنىڭ ءوزىنەن-اق رۋبيك تەكشەسىنە دەگەن قىزىعۋشىلىقتىڭ قارقىن الىپ كەلە جاتقانىن كورۋىمىزگە بولادى, – دەيدى «Kazakstan speedcubing federation» قب پرەزيدەنتى ارمان ماشيموۆ.
جالپى, زياتكەرلەر سايىسى سەمەيدە ءدال وسىنداي اۋقىمدى تۇردە 4-ءشى مارتە ءوتكىزىلگەن ەكەن. سونىڭ ەكەۋى حالىقارالىق دارەجەگە دەيىن جەتتى. جاستار اراسىنداعى سالاماتتى ءومىر سالتىن ناسيحاتتاۋ مەن حالىقتىڭ رۋبيك تەكشەسىنە دەگەن قىزىعۋشىلىعىن ارتتىرۋدى ماقسات ەتكەن شاراعا سەمەي قالاسىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبى ۇنەمى قولداۋ ءبىلدىرىپ كەلەدى.
قازىر رەسمي ەمەس اقپاراتقا سۇيەنسەك, ەلىمىزدە رۋبيك تەكشەسىمەن اۋەستەنۋشىلەردىڭ سانى 10 مىڭنان اسىپ جىعىلادى.
جارىسقا العاش رەت قاتىسۋشىلاردىڭ ءبىرى گۇلسارا اعادىلوۆا رۋبيك تەكشەسىمەن وسىدان 9 جىل بۇرىن تانىسقان. بۇگىندە قالاداعى مەديتسينالىق مەكەمەنىڭ بىرىندە ەڭبەك ەتەتىن 51 جاستاعى سپيدكۋبەر باق سىناپ كورۋدى ءجون دەپ تاپقان.
– شارانىڭ ءدال وسىلاي جوعارى دەڭگەيدە ۇيىمداستىرىلاتىنىنا سەنبەپ ەدىم. كەرەمەت اسەردەمىن. رۋبيك تەكشەسىن قۇراستىرۋدىڭ جاس ەرەكشەلىككە كەدەرگىسى جوق. كەرىسىنشە پايدالى جاقتارى مول دەپ سانايمىن. بۇگىن العاش رەت قاتىسا وتىرىپ, بولاشاقتا دا ءجيى باعىمدى سىناپ تۇرامىن دەگەن شەشىمگە كەلدىم, – دەيدى ول.
جارىستىڭ العاشقى 2 كۇنىندە قاتىسۋشىلار ءۇشىن ىرىكتەۋ كەزەڭدەرى ءوتىپ, اقتىق سىن قالانىڭ ورتالىق الاڭىندا ۇيىمداستىرىلدى. بارلىعى 16 مەدال مەن «Cubing Semey Open-2019» كۋبوگى ساراپقا سالىندى.
جاقسىلىق مۇراتقالي,
«Egemen Qazaqstan»
