«پرەزيدەنت 2019 جىلعى 26 ماۋسىمدا «قازاقستان رەسپۋبليكاسى ازاماتتارىنىڭ بورىش جۇكتەمەسىن ازايتۋ شارالارى تۋرالى» 2019 جىلعى 26 ماۋسىمداعى № 24 جارلىققا قول قويدى, وندا ءۇش نەگىزگى باعىت قامتىلعان. وسى جارلىقتى ىسكە اسىرۋدىڭ ءبىرىنشى باعىتى ەكىنشى دەڭگەيدەگى بانكتەردە جانە ميكروقارجىلىق ۇيىمداردا ازاماتتاردىڭ جەكەلەگەن ساناتتارى ءۇشىن كەپىلسىز تۇتىنۋشىلىق قارىزدار بويىنشا بەرەشەكتى 300 مىڭ تەڭگەگە دەيىنگى مولشەردە وتەۋدى كوزدەيدى. بەرەشەك سوماسى 2019 جىلعى 1 ماۋسىمداعى جاعداي بويىنشا 3 ملن تەڭگەدەن اسپاۋعا ءتيىس. ۇلتتىق بانك ۇكىمەتپەن جانە نارىققا قاتىسۋشىلارمەن بىرلەسىپ بەلگىلەنگەن ولشەمشارتتارعا سايكەس كەلەتىن ادامدار تىزبەسىن قالىپتاستىرۋ جانە ولاردىڭ بەرەشەگىنىڭ جالپى مولشەرىن انىقتاۋ بويىنشا جۇمىستى باستاپ كەتتى», دەلىنگەن تاراتىلعان مالىمەتتە.
ۇكىمەت «پروبلەمالىق كرەديتتەر قورى» اق-عا (وپەراتور) رەسپۋبليكالىق بيۋدجەتتەن نىسانالى قارجىلاندىرۋ بولەتىن بولادى.
بۇدان ءارى, وپەراتور ازاماتتاردىڭ جەكەلەگەن ساناتتارىنىڭ كەپىلسىز تۇتىنۋشىلىق قارىزدار بويىنشا 300 مىڭ تەڭگەگە دەيىنگى بەرەشەگىن وتەۋ ءۇشىن ەكىنشى دەڭگەيدەگى بانكتەرمەن جانە ميكروقارجىلىق ۇيىمدارمەن شارتتار جاساسادى. ءوز تاراپىنان ۇلتتىق بانك بەرەشەكتى وتەۋ بويىنشا مالىمەتتەردىڭ قارىز الۋشىلاردىڭ كرەديتتىك تاريحىنىڭ دەرەكقورىندا كورسەتىلۋىنە باقىلاۋدى قامتاماسىز ەتەدى.
«ەكىنشى باعىت قازاقستاننىڭ بۇكىل ازاماتتارىنا كەپىلسىز تۇتىنۋشىلىق قارىزدار بويىنشا ەسەپتەلگەن ايىپپۇلدار مەن ءوسىمپۇل سومالارىن ەسەپتەن شىعارۋدى كوزدەيدى. اعىمداعى اي اياقتالعان سوڭ, ۇلتتىق بانك بانكتەرمەن جانە ميكروقارجىلىق ۇيىمدارمەن بىرلەسىپ, كەپىلسىز تۇتىنۋشىلىق قارىزدار بويىنشا ەسەپتەلگەن ايىپپۇلدار مەن وسىمپۇلعا 2019 جىلعى 1 شىلدەدەگى جاعداي بويىنشا سالىستىرىپ تەكسەرۋ مەن تىركەۋدى جۇزەگە اسىرادى. ەسەپتەلگەن ايىپپۇلدار مەن ءوسىمپۇلدى ەسەپتەن شىعارۋ ءبىرىنشى كەزەكتە بانكتەردىڭ جانە ميكروقارجىلىق ۇيىمداردىڭ قاراجاتى ەسەبىنەن جۇزەگە اسىرىلادى. ەسەپتەلگەن ايىپپۇلدار مەن ءوسىمپۇلداردىڭ جالپى كولەمىنەن 30%-دان اسپايتىن سوما ۇلتتىق بانك ايقىنداعان وپەراتوردىڭ قاراجاتى ەسەبىنەن وتەلەدى. بۇل ماقساتتار ءۇشىن ۇلتتىق بانك وپەراتورعا قاجەتتى قارجىلاندىرۋ كولەمىن بولەدى», دەلىنگەن ۇب اقپاراتىندا.
ەكى جاعدايدا دا قارىز الۋشىعا بانككە, مقۇ-عا نەمەسە باسقا ۇيىمدارعا ءوتىنىش بەرۋ تالاپ ەتىلمەيدى. بانكتەر جانە ميكروقارجىلىق ۇيىمدار بەرەشەكتى وتەۋ جانە ەسەپتەلگەن ايىپپۇلدار مەن ءوسىمپۇلدى ەسەپتەن شىعارۋ بويىنشا بۇكىل جۇمىستى دەربەس جاسايدى. ءاربىر قارىز الۋشىنى بانك/ميكروقارجىلىق ۇيىم جۇمىس ناتيجەلەرى تۋرالى حاباردار ەتەدى.
