بۇل ساپار ءوزارا سەنىم مەن قاۋىپسىزدىكتى بەكىتۋ جونىندە جاسالعان ۆەنا قۇجاتى اياسىندا اتقارىلىپ وتىر. 1999 جىلى ۆەنادا قول قويىلعان بۇل قۇجاتتىڭ باستى ماقساتى – اقپارات الماسۋ, اسكەري سيپاتتاعى قاۋىپتى وقيعالار كەزىندە ارىپتەستىك, اسكەري قارىم-قاتىناستا سەنىمسىزدىك پەن كۇدىك-كۇماندى جويۋ ءۇشىن وسىنداي تانىسۋ ساپارلارىن ۇيىمداستىرۋ, اسكەري باعىتتاعى كەيبىر قىزمەت تۇرلەرىنە باقىلاۋ ورناتۋ بولاتىن.
بۇل جولعى ساپاردىڭ باستى ماقساتى – اسكەري تەحنيكا مەن قارۋ-جاراقتى كورۋ ەمەس, جاۋىنگەرلەرمەن قارىم-قاتىناس جاساپ, ولاردىڭ كاسىبي دايىندىعىن بايقاۋ, جەكە قۇرامداعى وقىتۋ جانە تاربيە جۇمىستارىمەن, ۇلتتىق ۇلان ساربازدارىنىڭ وزدەرىنە جۇكتەلگەن قىزمەتتىك-اسكەري مىندەتتەرىن قالاي ورىندايتىنىمەن تانىسۋ بولىپتى.
ءبىر سوزبەن ايتقاندا مۇنداي شارالار وتاندىق اسكەري قارۋلى كۇشتەردىڭ اشىقتىعىن كورسەتەدى.
ەقىۇ ينسپەكتورلارى «باتىس» قولباسشىسىنىڭ ورىنباسارى پولكوۆنيك پاۆەل سيتنيكوۆپەن جانە 5517 اسكەري ءبولىم كومانديرى پودپولكوۆنيك ماقسات بولتىرىكوۆپەن كەزدەستى. حالىقارالىق باقىلاۋشىلار جاۋىنگەرلەردىڭ كۇندەلىكتى تۇرمىسىمەن تانىسىپ, كازارمانى, سپورت قالاشىعىن, اسحانا مەن اسكەري ءبولىمنىڭ اۆتوپاركىن ارالادى.
- بۇگىنگى تاڭدا ازيا اۋماعى الەم حالقىنىڭ نازارىن وزىنە اۋدارىپ وتىر. قازاقستان رەسپۋبليكاسى وسى وڭىردە وزىنە حالىقارالىق باقىلاۋشىلاردى كىرگىزىپ, تۇرمىسىمەن تانىستىرۋعا رۇقسات بەرگەن جالعىز مەملەكەت بولىپ وتىر. ەۋروپاداعى قاۋىپسىزدىك پەن ىنتىماقتاستىق ۇيىمى قازاقستانمەن ارادا جوعارى دەڭگەيدەگى قارىم-قاتىناس ورناعانىنا ريزاشىلىق بىلدىرەدى, - دەيدى حالىقارالىق اسكەري باقىلاۋشىلار توبىنىڭ جەتەكشىسى كازو دجوزەف مارسەل فرانسۋا.
مارتەبەلى مەيمان قازاقستاندىق ساربازداردىڭ جابدىقتالۋىن, تۇرمىس جاعدايىن جوعارى باعالاپ, اسكەري ءبولىم باسشىلارىنا اشىقتىعى ءۇشىن العىس ايتتى.
باتىس قازاقستان
