«الەۋمەتتىك تۇرعىدا بارىنشا از قامتىلعان ازاماتتار ءتۇرلى قيىن جاعدايلارعا بايلانىستى وزىنە العان كرەديتتىك مىندەتتەمەسىن ورىنداي الماي وتىرعان احۋال قالىپتاستى. كوپتەگەن ازاماتتاردىڭ قارزى جۇكتەمەسى ارتىپ كەلەدى, ولاردىڭ شىنايى تابىستارى تومەندەۋدە. ادامدار كرەديتتەرى بويىنشا قارىزدارىن قالاي وتەرىن بىلمەي وتىر جانە بۇل پروبلەما شامامەن 100 مىڭ ازاماتىمىزدىڭ ومىرلىك مۇددەسىنە قاتىستى», دەدى مەملەكەت باسشىسى.
پرەزيدەنتتىڭ دەرەگىنشە, كرەديتتەردىڭ 86 پايىزدان استامىنىڭ كولەمى 1 ملن تەڭگەگە جەتپەيدى. ال ورتاشا بەرەشەك كولەمى شامامەن 300 مىڭ تەڭگەنى قۇراپ وتىر.
«مۇنىڭ بارلىعى ساراپتالعان جانە ەسەپتەلىنگەن. قازاقستاننىڭ باسشىسى رەتىندە ادامداردىڭ بەلشەدەن باتقان قارىزدان شىعۋعا قاۋقارسىز ەكەندىگىن كورە وتىرىپ, بۇعان ارالاسپاي تۇرا المايمىن. سوندىقتان ۇكىمەتكە ءبىر رەتتىك اكتسيا رەتىندە كەلەسى شارالاردى قابىلداۋدى تاپسىردىم: جوعارىدا اتاپ وتكەن ساناتتاعى ءاربىر زاەمشى ءۇشىن ناقتى جانە اتاۋلى قارجىلاي كومەك رەتىندە مەملەكەت ەكىنشى دەڭگەيلى بانكتەر مەن شاعىن قارجى ۇيىمدارىنان الىنعان جالپى مولشەرى 300 مىڭ تەڭگەگە دەيىن نەگىزگى نەسيەنى جانە وعان ەسەپتەلگەن سىياقىنى وتەيدى», دەدى ق.توقاەۆ.
بۇدان بولەك, مەملەكەت باسشىسىنىڭ اتاپ وتۋىنشە, ولاردىڭ بيىلعى 1 ماۋسىمعا دەيىنگى قارىزدارىنىڭ جالپى كولەمى 3 ملن تەڭگەدەن اسپاۋى ءتيىس.
«نەسيە العانداردىڭ 55 پايىزى, ياعني 250 مىڭ ادام ءۇشىن بۇل نەگىزگى نەسيە مەن سىياقىنى قوسا العاندا جالپى قارىز كولەمىن تۇتاستاي تولەۋ دەگەندى بىلدىرەدى. قالعان نەسيە العان ازاماتتاردىڭ قارىزدارى 300 مىڭ تەڭگە مولشەرىندە وتەلەدى. بۇل ولاردىڭ تولەۋ قابىلەتتىلىگىن قالپىنا كەلتىرۋگە جانە قارىز جۇكتەمەسىن تومەندەتۋگە ايتارلىقتاي سەپتىگىن تيگىزەدى. 2019 جىلدىڭ 1 شىلدەسىندەگى مالىمەت بويىنشا بانكتەردە جانە شاعىن قارجى ۇيىمدارىندا كەپىلسىز تۇتىنۋ قارىزدارى بار بارلىق ازاماتتار ءۇشىن ەسەپتەلگەن ايىپپۇلدار مەن تولەماقى وسىمدەرى ەسەپتەن شىعارىلادى. نەسيە الۋشىلاردىڭ اتالعان تولەمدەرىن ەسەپتەن شىعارۋ, ەڭ الدىمەن, ەكىنشى دەڭگەيدەگى بانكتەر مەن شاعىن قارجى ۇيىمدارىنىڭ ەسەبىنەن جۇرگىزىلەدى. سونىمەن قاتار, نەسيە بەرۋگە, نەسيەگە قاتىستى قىزمەت كورسەتۋگە جانە جەكە تۇلعالاردىڭ 90 كۇننەن استام مەرزىمى وتكەن بارلىق كەپىلسىز قارىزدارىنا بايلانىستى ايىپاقى, كوميسسيا جانە وزگە دە تولەمدەر ەسەپتەۋگە تىيىم سالىنادى», دەدى مەملەكەت باسشىسى.
