Cيمپوزيۋمعا قاتىسۋشىلاردى قۇتتىقتاعان وبلىس اكىمى كوركەمسۋرەت گالەرەياسىنا قازاقستاننىڭ ەڭبەك سىڭىرگەن ونەر قايراتكەرى ساليحيتدين ايتباەۆتىڭ ەسىمى بەرىلەتىنىن ايتتى.
- قىزىلوردا قالاسى - قايماعى بۇزىلماعان قالىڭ قازاقتىڭ, ءتۇبى ءبىر تۇركى مادەنيەتىنىڭ التىن كومبەسى, قازاق رەسپۋبليكاسىنىڭ تۇڭعىش استاناسى. بۇل جەردە سان ءتۇرلى ونەر تۋىندىلارى كوپتەپ كەزدەسەدى. ساليحيتدين ايتباەۆ اتىنداعى كوركەمسۋرەت گالەرەياسىنىڭ قورى ونەر تۋىندىلارىنا تولا بەرسىن!, - دەدى ول.
سالتاناتتى شارا كەزىندە قازاقستان رەسپۋبليكاسى سۋرەتشىلەر كەڭەسىنىڭ حاتشىسى جامبىل ناتباەۆ وبلىس اكىمىنە قولداۋ كورسەتكەنى ءۇشىن العىسىن ءبىلدىرىپ, وعان سيمپوزيۋمعا قاتىسۋشىلاردىڭ اتىنان پورترەت سىيلادى.
ال, س.ايتباەۆقا كەلەتىن بولساق, ول كەسكىندەمەشى, سۋرەتشى, قازاقستاننىڭ ەڭبەك سىڭىرگەن ونەر قايراتكەرى, لەنين كومسومولى سىيلىعىنىڭ لاۋرەاتى, كسرو سۋرەتشىلەر وداعىنىڭ مۇشەسى. ونىڭ "شوپاندار دەمالىسى", "باقىت" كارتينالارى قازاق بەينەلەۋ ونەرىنە ەرەكشە تۋىندىلار ساناتىندا سانالادى. ء"ا.ءالىمجانوۆ", "انا", "اكە", "شوپان", "اباي" پورترەتتەرىن, ورتاعاسىرلىق حيۆانىڭ ساۋلەت ەسكەرتكىشتەرىنە ارنالعان جۇمىستار سەرياسىن جازدى. س.ايتباەۆتىڭ شىعارمالارى ءا. قاستەەۆ اتىنداعى قر مەملەكەتتىك ونەر مۇراجايىندا جانە قازىرگى زاماناۋي ونەر مۇراجايىندا ساقتالۋدا.
داڭقتى سۋرەتشى 1994 جىلى دۇنيەدەن ءوتتى.
قىزىلوردا وبلىسى
